「係wo,先生,究竟頭先你係出面見到d咩發生咩事??頭先你話你一直係便利店出面無幾遠,但點解好似跑左身水身汗既?」

西裝友俾我咁問,佢好似係度回憶番一d可伯既事,面色唔多好:「都唔知撞咩鬼...頭先我出左去7仔,諗住過對面條馬路番屋企,點知到行左十幾步,周圍都依然咁大霧,我已經拎部電話當係電筒咁用,但都係無用,咩都望唔到!我怕唔少心行出左馬路自己唔知,所以最後無行過去,我其實都有係附近左右行多幾步睇下會唔會好d,但都一樣係大霧...」

「咁跟住呢?」

西裝男抖一抖大氣:「跟左我就諗住行番轉頭入黎7仔等多陣lor...點知間便利店唔見左!」

「有咩理由呀!?」





「係真架!!雖然大霧到咩都睇唔到,但我只不過行左出去十幾步,間便利店明明應該就係我後面,但當我行番轉頭既時候,行左好耐都係咩都唔見!連依間便利店都見唔到!」

西裝友講既情況,我唔係聽唔明,而係理解唔到,因為太唔會乎常理。

「我越行就越驚,於是乎就打電話俾女朋友,但佢聽唔到我講咩,我再打多次,已經打唔通...驚起上黎,我唔理三七廿一係咁跑,唔知跑左幾耐,最後終於跑番入黎...」


「有冇咁神奇呀?會唔會出面太大霧搞到你行錯左路咋?」地中海阿叔對西裝友既說話抱有懷疑。
 
到目前為止,有幾件怪事同時發生,咁即係話一切都唔係巧合咁簡單。





依個時候,我終於忍唔住講出自己既諗法:「各位,我諗繼續等警察黎都唔係辦法...我地要有最壞打算,就係無人會黎搵我地...」 其他人都係度思索我依句說話。

「痴撚線你講咩春呀?我屋企就係隔離咋,你講撚到我地流落荒島咁款,哈哈真係屌你。」

「佢無講錯...只要你試過行出去你就知,概本唔係你想像中咁簡單!一定有d野發左!」
西裝男認同我既講法,似乎佢都相信,有d好匪夷所思既事情發生左。

我仲記得,以前係高登睇過一個叫「紅Van」既科幻懸疑故事,當時個故仔有好多人睇,雖然最後俾好多網友屌佢爛尾,但我反而有好大得著。
我老死阿強曾經問我:「你有咩得著呀?」




當時我答佢:「依個故仔爛尾,令我明白到,一件極之荒謬離奇既事,你要當佢係故仔咁寫都寫唔落去啦,都莫講話要發生係現實世界,所以話,訓啦柒頭!」


我承認,當時我真係細路仔唔識世界,而不可思議既事情宜家正正就發生係我面前。

我完全無視阿叔,繼續講落去:「大家有冇睇過漂流教室?」
 
大家聽到我咁問就你眼望我眼。

「有...我以前睇過...你係想話...??」長髮女仔唔係好肯定我想講咩。

「我係想話,我覺得宜家既情況,同漂流教室有d相似...」

地中海阿叔:「咩教室呀?咩黎架?」





四眼哥仔:「係十幾年前一套日本漫畫,我以前讀書果陣時都睇過,當年好hit架。」

強國夫婦聽到我地既對話,一頭霧水,努力嘗試理解我地既說話。

師奶:「咁果套漫畫同我地有咩關係?」

我:「果套漫畫,故事內容係講一間學校入面既學生,佢地留係學校玩活動,突然間學校外面好大霧,結果離開唔到學校,要留係學校度過夜,點知第二日發現,學校以外既人同建築物唔見晒...宜家7仔出面既情況,令我諗起依套漫畫...」

師奶好奇咁問:「咁...果班學生究竟係發生左咩事??」

我:「漫畫入面大慨係話,唔知咩原因,成間學校同d學生都去左第二個時空...而原本世界既人就搵唔番佢地...」

師奶好驚慌:「咩話?咁你既意思即係我地都一樣!?點會咁架!?」

地中海阿叔:「你都發神經!公仔書講既野你都當真?所以話你依d師奶,成撚日睇埋d白痴電視劇睇到自己都白痴埋一份。」





依果時候,長髮女仔開始好認真咁分析我講既野:「之但係,有兩樣野解唔通。第一,如果成間便利店去左第二個時空,咁點解釋季嬸唔見左呢?照道理,佢應該會同我地一齊去左第二個時空先o岩。第二,雖然我地部手機打唔通,但用便利店打左兩次999都唔見有問題,如果係咩時空轉移,應該唔會咁樣掛?」
 
估唔到長髮女仔既分析力有番咁上下,的而且確,按照一貫既常理,頭先佢講兩點我係無辦法解得通,之但後,面對眼前咁離奇既現象,我地仲可唔可以按照常理去諗呢?

地中海阿叔:「所以我咪叫你地唔好痴根痴上腦lor,好信唔信走去信d公仔書,你都忽既!」

西裝友:「邊個係季嬸呀??」

地中海阿叔:「阿季嬸咪就係依個四眼仔既拍檔lor,平時佢地一齊番夜更既。頭先阿四眼仔話季嬸走左入去貨倉個廁所,之後就唔見撚左人,我就話9成9係四眼仔自已記撚錯左,係度自己嚇自己。」

「我真係無記錯架...我明明記得佢係入左去廁所...」四眼哥仔份人就係咁怕事,俾人兇幾兇就鳩縮。

長髮女仔依個時候提出另一個假設:「我反而聯想到一套西片,係講成班人係一間超級市場入面,又係因為出面好大霧所以困住左,d人一出去就會死...原來...原來係因為...」





我:「你想話,出面果d係神秘氣體?」

師奶:「你地講講下,我又好似睇過,好似話唔知咩神秘氣體,搞到d昆蟲變到好大隻,所以d人一出去就俾d昆蟲殺死...」

「咁樣講唔通啦!你講既情形,只不過係解釋左出面點解咁大霧姐!你又點解釋我頭先係出面搵唔番間7仔先!?」西裝友突然插嘴,然後再指住強國夫婦:「仲有佢兩個,頭先佢地話自己行黎行去都會番黎依間7仔,你又點解釋?」

本來我同西裝友既諗法都一但,點知個長髮女仔提出左一個好似幾合理既解釋:「果套西片入面,d氣體會令昆蟲變大...咁如果,宜家便利店出面既氣體,係會令人產生錯覺呢?你地覺得咁又有冇可能?」

我好似明白長髮女仔既意思:「你係話...西裝友佢覺得自己跑左好耐都搵唔番依間7仔,其實係幻覺!?」

長髮女仔:「嗯,無錯,或者佢真係係出面跑左好耐,所以先會流咁大汗,但根本冇人知道佢係咪真係一直向住依間便利店既方向跑,有可能係因為受到d氣體影響,產生幻覺,令佢覺得自己係向住依間便利店既方向不斷跑...」

我:「咁就同時解釋左,點解果對強國夫婦話自己行黎行去都會行番黎依間7仔!係因為幻覺!...仲有季嬸...無錯,可能四眼哥仔都受到d氣體影響!」

西裝友、四眼哥仔同埋師奶都恍然大悟。





師奶:「唔怪之得無警察黎到依度...可能出面既人都俾d氣體搞到有幻覺!所以無人成功走到入黎!」