【屋村7-11驚魂】落樓下7仔食個叮叮飯，竟然咁可怕...: 18
#西裝友好似有其他發現，所以我地都行埋去辦公枱果度睇下。
西裝友遞左張Ａ４紙俾我地睇，而佢自己就繼續對住電腦個ｍｏｎ，似乎佢另外仲搵到ｄ野。
阿欣「依一張係．．．今個月依間７仔既更表！？」
「嗯，無錯，你地睇下依一度。」西裝友指住張更表既其中一格，日子就係今個星期三，即係兩日前，佢指完之後，又繼續望住個電腦ｍｏｎ。
我：「夜晚果一更，依度原本寫住『季嬸』同埋『賢』，但後黎又刪左．．．」
西裝友：「阿叔，你有冇印象，四眼哥仔叫咩名，又或者其他人點稱呼佢？」
阿叔：「你咁問．．．我有少少印象，佢ｄ同事好似叫佢『賢仔』！」
西裝友：「果然．．．成張更表，其他人既名都出現係果排ｌｏｃｋｅｒ度，除左依個『賢』，而由星期三開始打後既日子，『賢』依個名都俾人刪走左。」
依一張更表，進一步印證左我地頭先既推測，就係四眼仔已經唔係依度既員工，所以佢今晚無理由係度出現。
我：「阿叔，咁你前幾晚有冇過黎７仔？有冇見到四眼哥仔？」
阿叔：「前幾晚都冇落黎，係今晚無咩野做我先落黎打躉．．．」
究竟四眼哥仔做咩要扮繼續係度番工？佢係今晚先開始扮？其他員工又發生咩事？
「其實依樣都唔係咩大發現，你地係ｌｏｃｋｅｒ果邊都已經估到，總之結論就係，今晚番夜間既係另外兩個人，但唔知點解，佢地唔見左，就番一個唔應該出現既四眼哥仔係度。」西裝友雖然同我地講野，但佢雙眼無離開個ｍｏｎ
阿欣好緊張咁問：「咁其他夜更員工發生咩事？？．．．唔通四眼哥仔將佢地．．．」
西裝友突然指住個ｍｏｎ：「終於搵到喇！！」
我：「係咩黎架？？」
西裝友：「宜家ｄ連鎖店鋪既閉路電視，大多數都直接連接上網，將拍到既影像ｕｐｌｏａｄ上網儲存。」
我：「你搵到閉路電視ｄ影像？但上到網咩？？自從出面有濃霧之後，我地唔係已經連絡唔到出面咩？？」
西裝友：「無，其實上唔到網，不過依種網絡式防盜系統都有一個功能，就係將近一段時間既影像ｂａｃｋｕｐ一套，然後儲存係公司既電腦入面，放便有需要既時候即刻拎番黎睇。」
阿欣：「咁．．．你係想睇番今晚既影像！？」
西裝友：「無錯，部電腦儲存左依幾晚既影像，每個ｆｉｌｅ名稱都有ｐａｔｔｅｒｎ，應該係防盜系統定時將ｄ影像ｂａｃｋｕｐ左再儲存係部電腦度，而每個ｆｉｌｅ代表一個小時既影像，你地睇下，『２０１４０３１５＿２３００２３５９』，應該就係今晚１１點至１２點既影像，亦係最後既影像！」
阿叔：「最後？」
我：「我估係因為，自從我地失去左外界聯絡之後，防盜系統果邊再ｓｅｎｄ唔到ｄ影像番黎依部電腦
阿叔：「屌，聽到我一頭霧水．．．總言之，我地只可以睇到十二點之前既影像啦！咁仲唔拿拿淋睇下有咩古怪！」
西裝友ｃｌｉｃｋ左今晚十一點至十二點既影像，片段就開始播放，片段有兩個視點，一個就係影住收銀櫃既位置，另外一個就係貨倉入面既一部閉路電視，就正如四眼哥仔之前咁講。
西裝友：「阿叔，你係幾多點入到黎依間７仔？」
阿叔：「幾多點．．．？好似十二點零咁上下啦。」
我：「唔會遲得過十二點半，因為我記得我落黎７仔果陣，係十二點半左右，當時我黎到已經見到阿叔佢同四眼哥仔吹水。」
阿叔：「係呀！咁計既話，我應該係十二點搭三左右黎到。」
西裝友：「即係條片仲未拍到你地入黎果陣．．．等我將條片拉到去最尾個十分鐘，睇下四眼哥仔出現左未。」
拉到最尾果十分鐘，西裝友再「禁」左ｆａｓｔ ｆｏｒｗａｒｄ制，我地見到兩個７仔職員係收銀櫃果邊，基於拍攝既角度，睇唔到職員既正面，不過由髮型同側影黎睇，好明顯兩位都係女性，應該就係果個季嬸同Ｍａｒｙ姨。
片段一直播放，都無咩特別事發生，大約過左一分鐘，其中一位職員就離開左收銀機位置，之後佢既身影就係貨倉既鏡頭再出現，估計佢係去洗手間。
由於夜晚比較少客人，依段期間，先後只有兩個客人行去收銀機俾錢。
望住依段片既時候，我覺得有一種「不協調」既感覺，但又講唔出係咩原因，段片繼續播放，頭先去左廁所又行番去收銀機果邊，兩個職員又吹起水上黎，無幾耐又有一位客人行埋去俾錢，最後段片就播放完畢。
阿叔：「咩話！？咁就完架喇？？」
唔只阿叔，我地幾個都好疑惑，成段片同我地所預期既好唔同，至少，最奇怪既係，直至十二點前，四眼哥仔原來都未出現過係７仔入面。
另一方面，我果種「不協調」既感覺越黎越強烈。
阿欣：「不如將段片再拉前少少，睇下仲有冇其他發現。」
於是，西裝友將段片再拉前多二十分鐘，然後「禁」ｆａｓｔ ｆｏｒｗａｒｄ制，不過結果都係一樣，四眼哥仔未有出現過係７仔。
綜合各種證據，即係話四眼哥仔係十二點前都仲未現過身，但又突然係十幾分鐘之後出現係７仔同阿叔佢吹水，咁依十幾分鐘內究竟發生左咩事？
唔通四眼哥仔係短短十幾分鐘內殺左季嬸同埋Ｍａｒｙ姨？先唔好理四眼仔既動機係咩，我認為要實行起上黎都好困難，雖然夜晚７仔唔算多客，但話晒７仔打開晒門做生意咁開揚，而且久唔久都會有人入黎，短短十幾分鐘，要殺晒兩個職員，清理好現場既同時又唔會俾人發現，咁實在無咩可能。
就係依個時候，我發現影片入面有一個好奇怪既地方：「咪住！可唔可以將段片拉番去之前果度，用正常速度播放一次？」
阿欣：「你係咪見到ｄ咩？」
我：「第一次睇段卡既時候，已經覺得有少少怪，但我又講唔出問題係邊，直到頭先播番前少少既時候，我好似發現到係咩問題。」
阿叔追問：「咁係咩問題呀？？」
由於我仲未好掌握到自己既諗法，所以都有ｄ支吾以對：「嗯．．．我覺得．．．依段片所拍攝既『今日』，好似唔係我地依家過緊既『今日』．．．」
大家聽到之後都一臉茫然，唔只佢地，其實我都唔係好肯定自己想講咩。
西裝友將條片拉番去半分鐘之前，用正常速度播放，片段入面有個女仔行左埋去收銀機度俾錢。
我：「停！係依度喇！」
阿叔：「做咩事？有咩問題？？」
我用手指指住電腦ｍｏｎ上面果個女仔隻手：「你地睇下，係一把遮！唔止依個女仔，頭先播既時候，仲有幾個客人都拎住遮入黎７仔！」
「依．．．？遮．．．！？」阿欣應該知道我想講既問題係咩，唔只一個客人拎住遮入黎，即係話，段片拍攝既前後一段時間落緊雨／落過雨，但奇怪既係，今晚明明都冇落過雨！
西裝友將段片拉前拉後再睇，印證左我既講法，的確有唔少客人拎住把遮入黎７仔。
阿叔：「喂喂，你肯定依段片係今晚既片？有冇搞錯日子呀？？」
西裝友：「段片右上角有個日子同埋時間既標記，唔單只咁樣，就連ｆｉｌｅ既建立日期同時間，都係今晚．．．」
阿欣提出進一步既質疑：「又或者，會唔會係有人刻意將段片做左手腳？」
西裝友：「咁當然，唔排除果個防盜系統俾人做過手腳，用一ｄ舊片黎扮係今晚既片．．．就好似，我地之前打９９９咁．．．」
阿叔：「咁十成十係啦！如果唔係又點會咁奇怪姐。」
正當大家估計段片係假／舊片既時候，我反而有另一個諗法，我心入面果種不協調感仍然揮之不去，類似既感覺今晚都好似曾經出現過。
為左搞清楚自己既諗法，我先將自己既感覺講出黎：「我唔係咁睇．．．我覺得段片可能係真，真係今晚既影像．．．」
阿叔：「點會係真呀？？頭先你都睇到啦，段片入面既晚上應該係落緊雨，但係今晚一滴雨都冇，點會係今晚架呢？？」
阿叔依一點，我當然諗過，正因為係咁，我更覺得好匪夷所思。
我開始分析落去：「o拿，我就當依段片係假／舊片，係有人刻意整出黎，咁你地覺得，對方搞咁多野去整段假／舊片既目的係ｄ咩？？」
西裝友嘗試接落去分析：「好正路咁諗，搞一大輪將條假／舊片扮係今晚既片，一係就為左掩飾某ｄ真相，例如原本果段真既片拍到ｄ不可告人既秘密，另一可能性就係為左誤導我地。」
我：「如果只係為左掩飾某ｄ真相，其實對方根本唔洗做咁多野，直接將原本段片刪除左就足夠，又洗咩整埋晒ｄ假／舊片．．．」
大家聽左之後都覺得有道理。
阿叔：「咁即係話，對方既目的係要誤導我地啦！！」
依一個講法，我亦都唔同意：「如果對方係想誤導我地，咁你地認為想誤導我地ｄ咩呢？」
西裝友：「假如手上各種證據都係對方刻意整出黎誤導我地，按照依堆假證據繼續推測落去，我地好自然會信相，四眼哥仔依個人有古怪，事關佢明明今晚唔應該出現係７仔，因為ｌｏｃｋｅｒ同更表都反映左佢已經俾人炒左。」
阿欣：「即係話，眼前依ｄ證據，其實都誤導我地，要我地覺得四眼哥哥有古怪？？」
我：「如果係咁既話，就有ｄ奇怪．．．若然真係想誤導我地去相信四眼哥哥有古怪，咁ｌｏｃｋｅｒ既佈置同更表都算吻合，唯獨係電腦入面既閉路電視片段，若然係假證據既話，咁反而出現左一個矛盾既地方。」
西裝友唔多明白：「你所指矛盾既地方係．．．？」
我：「首先，假如真係想誤導大家，我至少唔會整一段假既片扮係今晚十一點至十二點既片段，就只有直至十一點既假片段就足夠，因為咁樣做，就可以令大家覺得，由十一點開始直至阿叔走入黎既一個鐘頭入面（沒有閉路電視影片的時間），可能真係發生左ｄ事，而四眼哥仔亦有足夠時間（依個零鐘入面）去消滅證據，咁樣一切就變得較為合理。但依家情況唔係咁樣，宜家電腦入面有十一點至十二點既片段，我地睇左之後反而會覺得奇怪，會覺得四眼哥仔冇咩理由係十幾分鐘內做到咁多野，咁樣反而減低左依ｄ假證劇既說服力！」
由西裝友同阿欣既表情黎睇，佢地都開始意會到我所講既野。
於是我繼續落去：「仲有一點好重要，假如對方真係整一大堆假證據（ｌｏｃｋｅｒ、更表、影片）出黎想誤導我地，換句話講，即係四眼哥仔其實並沒俾人炒，而佢今晚真係番夜班，咁既話，對方又點會預計到阿叔佢幾時行入黎７仔同四眼哥仔吹水呢？如果阿叔係十二點之前就已經入左黎７仔，咁對方整既假影片豈非不攻自破！？．．．」
大家已經唔知點反駁，而我就作出一個自己都唔想相信既結論：「所以，唯一既解釋，就係依ｄ唔係咩假證據．．．所有野都係真，影片係今晚既片．．．」