「妖!放開我呀!」

「所有野都係乃地搞出黎既!無咁易o厄到鵝!!鵝唔會放過乃!!」

「放開佢呀!...喂,阿叔你仲過黎幫下手!?」

「唉呀,點...點幫呀,佢咁大件...」阿叔係依個時候,又發揮其一貫既仆街作風,扮到好似想幫手但又無能為力咁款。

「鵝屎都要拉埋乃呀!!!」強國男越講就越肉緊,佢痴線痴到咁樣,再係咁落去佢好可能會做出更過火既事。





我本來一直捉住強國男既左手手臂,但強國男突然一下蠻力,將我fing開左一邊,我成個人仆左落去d貨箱度,而佢就捉住西裝友左搖右擺,西裝友一邊嘗試企穩個人,一邊想伸手到自己既西裝褸度拎d野,但強國男無章法既身體擺動,令到西裝友都分身下暇。

「喂,你再係咁輪到我唔客氣架喇!!放手呀!!」

「乃地個個都要屎!」強國男同西裝友好似人地玩捽角咁糾纏埋一齊,而佢地雙方既動作亦越黎越大,不過強國男身型上佔優勢,西裝友無晒辦法咁跟住強國男跌跌撞撞既步法,向廁所果邊靠近。

佢地一連串動作之快,我根本未趕到切幫手。

「你想點呀!?!?」西裝友驚覺,強國男好似想有進一步行動,而西裝友同時亦伸手到自己褸袋。





「等鵝送乃去陪果個四眼仔啦!!!」強國男捉實西裝友,成個人向西裝友果邊仆埋去,西裝友俾強國男咁樣壓埋黎,兩個人同時失去平衡,跌向廁所裡面!

「呀!!!!」

「砰嘭!!!!」


伴隨砰嘭一聲巨響,之後就有零星碎片散落既聲音,然後就全場靜晒落黎。

由於我地企左係側邊,並唔係正面對住廁所門口,所以由我地既角度,只係望到西裝友同埋強國男兩對腳係廁所門口伸出黎,而佢地既上半身就係廁所入面,由佢地雙腳既姿勢黎睇,估計佢兩個應該扒左係廁所地柀上面。





廁所入面無再傳出咩聲音,而西裝友對腳就郁都唔郁下,相反,強國男雙腳就微微顫抖...我有d不詳既感覺。

「老...老公,乃見點呀...?」強國女人一邊講,一邊慢慢探頭靠近廁所,望下入面發生咩事,而我亦都打算企過少少,望下入面既情況。

「呀...呀...呀!!!!」唔望由之可,一望真係嚇撚死,強國女人即係大叫左出黎,而我就擰轉面都擰唔切。

雖然強國男壓係西裝友既上方,但仍然可以見到,頭先果下撞擊,西裝友成個頭冚落廁所缸度,而佢條頸就以一個唔會係常人可以做到既姿勢打橫左一邊...

「老...老公...乃有冇事呀?」

由於眼前既畫面太震撼,我唔敢再正視,只係用眼角偷望下強國男既情況,佢雙腳依然顫抖緊。

強國女人嘗試扶起強國男,先提起強國男一邊手臂,就係依個時候,強國男本來「趴睡」既姿勢就轉過左少少身。

原來有把交剪插晒入去強國男腹部,就只淨番個交剪把手露係外面,而個把手亦都染晒血跡,變成血紅色。





強國男雙眼反白,而本來顫抖既下半身亦都停低左落黎...

「老...老公!!!!!嗚....嗚嗚....」

阿叔同埋阿欣佢地雖然有一定心理準備,但慢慢行埋黎想睇下咩情形既時候,都顯得戰戰兢兢。

「你唔好睇!...唔睇會好d...」我本能反應伸手阻擋阿欣既視線,而佢一聽到我咁講,亦都即刻停止步伐,唔再試圖探頭望下廁所入面。

「嘩我屌你老母!!」阿叔一邊爆粗,一邊用手掩住塊面。

「嗚....嗚嗚....老公,乃應下鵝啦...嗚嗚...」強國女人用力搖晃果個滿身鮮血既強國男,而強國男一d反應都無。

「死...死左?」阿欣無望住廁所既情境,但佢單憑強國女人既反應,都估到發生咩事。





雖然依一插未必致命,強國男可能只係休克左,不過其實同死左都無咩分別,因為根本救唔到佢。

「我諗...應該係...」

「嗚....嗚嗚....老公乃唔可以丟低鵝架...嗚嗚....」

本黎因為有少少眉目既振奮感覺,宜家唔單只完全消退失,個心仲覺得好沉重,明明頭先仲好地地,仲以為大家一齊諗方法就有機會離開依度,點知俾個痴線佬搞亂晒,西裝友真係死得好唔抵。

「自己死就算啦,仲要整埋其他人,正仆街!」我無講出聲,我只係心入面咁諗,事關睇住強國女人哭成淚人咁,已經唔想再多講說話去刺激佢,而我地其他人就係咁企埋一邊,都唔知應該做d咩好。

強國女人本來伏係佢老公身上係咁喊,但突然間佢既喊聲稍為減弱,坐直少少個身,眼神變得好兇狠咁望住我地:「係乃地...最衰都係乃地...全部都係乃地既錯!」

阿叔抵唔住頸:「屌你你有冇病呀,係你老公痴撚左線呀,佢頭先殺左四眼仔,宜家又殺埋西裝友,你仲好意思話係我地錯!?!?」

「鵝唔理!!如果唔係乃地,鵝老公點會死呀!下!!!」





強國女人歇斯底里咁叫,依個時候再講咩佢都唔會聽。

「仆你個街你都忽既,同你講多都晒鳩氣!」

正當阿叔打算收口之際,強國女人企左起身慢慢行出廁所,同時係褲袋拎左把界刀出黎:「乃地唔洗旨意就咁算,鵝老公無命離開依度,乃地都唔可以有命離開!!!」

強國女人右手拎住把刀衝埋去我度,好彩我反應得切,雙手及時捉住強國女人隻右手,再拉高佢隻右手,等把刀唔洗隊住我。

強國女人眼見依下攻勢唔成功,於是立即「發矛」,痴左線咁用口咬我前臂,由於佢咬得好大力,我點都fing唔開佢,情急之下就成個人壓落佢度,大家一齊失平衡跌左係地,咁樣撞一撞,佢個口終於鬆開左,同時佢手上把刀亦都飛埋一邊跌左落地。

我趁依個好機會,捉實佢雙手試圖制服佢,但佢依然發左癲咁,fing晒手fing晒腳,不斷想擺脫我。

「屌你,阿叔你企係度托咩,幫手呀!!!」我大聲喝令阿叔,阿叔應該係見強國女人無左把刀,無咩殺傷力,於是佢終於都走過黎幫手一齊「禁」住強國女人係地下,唔俾強國女人反抗。





勢估唔到依個強國女人發起癲上黎,真係唔係人咁品,要兩個大男人先「禁」得住佢。

阿叔望住貨倉入面既阿欣:「喂,仲係度發呆做咩呀?拿拿淋去7仔門口拎番條泥龍繩綁住依個癲婆啦!」

「哦哦!!」

正當阿欣打算走出貨倉去拎泥龍繩既時候,收銀機果邊傳黎師奶既聲音:「呀...呀...無可能架...無可能架...呀!!!」