[武俠甜故] 古裝武俠有味巨著 - 鐵血丹飛: 第十五章 - 刺探軍情

黑衣人正繼續聚精會神住下面黎講, 「仲差兩個, 不過啱啱出左黎之後, 而家佢兩個又走番入去屋內入便!」
 
龍飛 : 「咁佢地番入屋度做咩呀?」
 
黑衣人 : 「個女嘅正發哂姣話要入屋再黎多次, 而家就等佢地搞埋野之後, 跟住一到人齊我地就要落去準備郁手!」
 
龍飛望吓天台四周, 「喂, 我地就得咁少人, 聽講佢地啲武功好犀利過喎, 咁我地夠唔夠佢地打架?」
 


黑衣人 : 「咪傻啦, 要打我地都只係企響側邊度執吓死雞咁啫, 真正出手果班高手而家就響廚房後面埋伏緊!」
 
龍飛 : 「哦, 咁都好啲, 但我地呢便又有幾多個高手咁呀?」
 
黑衣人 : 「你唔使咁緊張, 夠架嘞, 話哂我地都係殺人幫會黎吖嗎, 而且尋日響船度比佢地殺左幫會入便幾個大佬, 所以而家就引哂佢地黎呢度, 一陣就會將佢地全部送哂上西天架嘞!」
 
龍飛 : 「咦, 咁匿響後面果班高手又係啲咩路數呀? 聽講話佢地啲武功好特別過喎?」
 
黑衣人正在沾沾自喜, 「哈, 識野喎細佬, 第二個就講唔倒比你地知, 不過我囉…….., 但又之不過, 我點解又要話比你地知呀?」
.


龍飛 : 「唉大佬, 細佬自問見識淺薄, 咩都唔曉, 十足十係井底之蛙, 但大佬你就唔同囉, 人又英俊, 而且博學多材, 加上武功又夠高強, 真係比多十年時間我, 我都無本事學到大佬你嘅一半, 所以話, 若然我無睇錯嘅話, 大佬你將來必定會係一人之下, 萬人之上架!」
 
踎響隔離嘅丹娜亦都係咁點住頭。
 
黑衣人比龍飛讚到鬆毛鬆翼, 「嘿, 咁你又知唔知我至憎就係你呢亭人呀? (龍飛正緊握住手上嘅劍) 就係….夠坦白呀, 咁啦, 見你都幾識得講野, 咁就等大佬講吓班高手啲秘密比你地知啦!」
 
龍飛同丹娜正在拍住掌。
 
黑衣人 : 「咳, 嗱, 我地個幫會不嬲人強馬壯你都知架啦, 而我地一早就已經係秦皇嬴政嘅心腹大患, 所以亦早已成為朝廷嘅頭號捕殺對象, 但就因為班大佬嘅武功詭異同高強, 再加上合眾人之力, 就連朝廷嘅錦衣衛都未必會係佢地對手, 所以亦因為咁, 近年我地幫會嘅勢力就愈日益壯大!」
 


龍飛同丹娜聽到正響心內發毛。
 
黑衣人再繼續, 「仲有樣野包你地估唔倒添呀, 就係我地幫會個呀頭, 亦即係武功最高強果個, 其實就係人所共知嘅…震…丸…鏢…局…吳總鏢頭嘞, 我地呢個幫主, 做事不嬲都心狠手辣, 不過佢亦係我偶像黎嘅, 我由細到大都……」
 
龍飛無興趣聽佢講舊屎啲野, 「得嘞得嘞, 咁到底佢地係使啲咩武功咁呢?」