「阿洛、阿洛,阿洛!」

「咩事呀?邊個叫我?」我如夢初醒。

「阿洛你今堂訓左好耐喎,你係咪有咩唔舒服呀?」歐陽sir拍拍我膊頭問我。

「哦,我無事呀,無事,只係有少少唔訓姐。」我講完之後就坐番直個人繼續上堂。

歐陽sir係我班嘅班主任,佢對學生好好,係個非常關心學生嘅老師,好多同學都好中意佢。因為歐陽sir係教中文嘅,所以對於中國嘅文化佢都好有認識,包括鬼節。



「大家又知唔知呢,我地中國自古以來都話七月鬼節,鬼門會打開,唔知大家又信唔信有鬼呢?」歐陽sir同我地講解鬼節。
「呢篇課文嘅作者就正正係藉住描寫農歷七月嘅鬼身去抒發對過左身嘅爸爸嘅思念。」歐陽sir原來係講緊課文,我仲諗緊佢點解會無啦啦講鬼節。

「歐陽sir,我想問下你信唔信呢個世界有鬼呀?」落堂之後我心血來潮想問下歐陽sir。

「我信架,話曬呢個世界仲有好多我地未見過,未知嘅事物,所以你話有鬼都唔出奇架。」歐陽sir一邊整理課本一邊同我傾。

「咁,你覺得鬼對人類黎講係一個點嘅存在呀?」我繼續問。

「我覺得個個人嘅睇法都唔同,有d人好驚鬼,又有d人好想見到鬼,而我就覺得鬼就係應該留番係佢地應該出現嘅地方。」歐陽sir好正經咁講,搞到我覺得自己好似講錯野咁樣。


「係呢,做咩無啦啦咁問嘅?」歐陽sir又變番平時咁樣。

「無呀,見你頭先上堂講起,隨口問下姐,好啦,我去食飯先啦。」我同歐陽sir揮手再見之後就去左同阿峰、Anson佢地食飯。

「喂阿洛你呢排好似成日都好攰咁嘅,你真係無事?」阿峰問我。

「無,無咩事呀,咪有d攰囉,我地叫左野食先啦。」我舉手叫樓面呀姐落單。

「食咩呀細佬?」呀姐問。



「要個炒貴刁!凍奶茶唔該!」我指住個餐牌同呀姐講。

「同佢一樣啦。」阿峰同Anson異口同聲咁講。

「好啦,叫完野食啦,我地講番啦,阿洛你呢排做咩呀?」難得阿峰會咁正經咁問我,我決定將成件事話比佢兩個知。

「其實我...」
「得!我知!」Anson打斷左我嘅說話。
「你一定係溝到女啦!日日同人地一齊!唔係溝到仲可以係咩呀?」Anson笑淫淫咁講。

「我同佢無野架!你唔好亂up啦!」我好激動咁講。

「哇哇哇,有人怕醜豬囉。」Anson好挑逗咁講。

「阿洛你都鬼馬啦,背住我地去溝女!溝完仲要唔同我地講!」阿峰同Anson兩個左右夾攻我。



「屌,都話無囉!」我再一重申一次。
「唉,我今日唔同你地番去啦,我約左海澄呀。」上一秒先話無野,下一秒就話約左人地,連我自己都覺得我嘅辯解好無說服力。



其實我同海澄又唔係淨係得鬼鬼怪怪嘅,我同佢都會有正常社交,好似普通嘅朋友咁樣,所以海澄今日約我唔係想講鬼,而係海澄想試一間cafe。

「阿洛呀,我地今日終於都唔係講鬼啦。」海澄好輕鬆咁講,就好似放低左心頭大石咁。

「係呀,我地之間一直嘅話題都係講鬼,今日終於都可以放低啦。」

「阿洛你想食咩呀?」海澄一邊揭餐牌一邊問。

「我無所謂呀,睇下你有冇咩想試咁囉。」



「你幫我揀呀,呢兩樣我都好想食呀,邊樣好d呀?」海澄推左個餐牌過黎我度,指住d野食問我。

「咁一係兩樣都叫囉,我同你share啦。」我望住海澄。

「好呀,有你係度我先可以試曬兩樣咋。」海澄伸一伸利。

其實海澄嘅性格都唔錯呀,唔會好似某d女同學咁港女,再加埋佢人又幾可愛,最重要嘅係竟然海澄咁正都無人追!咁睇黎都要靠我追佢啦。

「阿洛,你要唔要試一啖呢個呀,好好食架佢!」海澄一邊食一邊望住我問。依加嘅海澄真係好可愛,同捉鬼果個佢完全唔同,望住佢都咪話唔心動。

「好呀,我試下呀。」
「啊~」海澄擺左隻叉埋我嘴邊餵我食。
呢一刻我完全係小鹿亂撞,竟然有個咁可愛嘅女仔餵我食野。



「哇阿洛你....sorry呀,我無心架,我都係走先啦。」竟然咁樣都會比歐陽sir撞到,仲要比見到海澄餵我食野。

「咦...」歐陽sir望一望海澄條頸鏈跟住就走左。

「海澄...」
「做咩呀,你好驚比佢見到咩?」海澄咬住隻羹問我。

「唔係呀,可能我多心啦,歐陽sir佢頭先臨出去之前停一停低望你條頸鏈。我覺佢可能知d野。」我放低餐具同海澄解釋。

「哎呀,唔好講住啦,我地下次問佢囉,我地講左話今日唔講呢d架嘛!」海澄扁嘴咁同我講。

「得啦,咁我地唔好理住先啦。」我拎番起餐具繼續食野。
雖然講就咁講,但心入面始終都係覺得歐陽sir知道d野。
 
我心中對於歐陽sir嘅疑問一直都揮之不去,於是我的起心肝去問佢。


 
「歐陽sir…我想問你d野呀...」我係落堂之後係歐陽sir身邊細細聲咁問。
 
「係咪課文睇唔明呀,有咩唔識就問啦。」歐陽sir放低手上嘅file望住我。
 
「唔係呀,唔關上堂事架...我地去第二度講啦,呢度唔係咁方便...」我將手上嘅中文書合埋,而歐陽sir睇黎都get到我想講咩,於是我地一齊去左學校天台。
 
「呢度講啦,呢度無人架。係咪感情問題呀?」歐陽sir拍拍我膊頭。
 
oh my fucking god,原來歐陽sir誤會左我想問感情:「呀sir,我...」
 
「呀sir我都做過學生嘅,我都明白架,我讀高中果陣想追我嘅女神,點知結果比人收左做兵。」歐陽sir打斷左嘅說話。
 
「唔係呀...我係想話...」
 
「哦,你唔係兵呀?哦,原來一齊左嘅。咁你兩個係咪鬧交呀?但果日撞到你地都見到你地無乜野架?」歐陽sir再次打斷我。
 
「無錯,就係你撞到我地果日。我見呀sir你望住海澄條頸鏈,你係咪...」
 
「我都覺得會比你見到架啦,我望住佢條頸鏈咁耐,係呀,我同你地一樣,都係有靈力嘅。」歐陽sir第三次打斷我講野,但今次終於去到我想知嘅事。
「阿洛...你同佢唔好再掂呢d野啦...好無呀...果邊嘅世界唔係你應該接觸架...」
 
「佢屋企一直都係捉鬼嘅,而我就係太爺交低比我嘅。」我好直接咁同歐陽sir講。
 
「你地仲未見過...果個世界有幾咁恐怖...不如算啦...」歐陽sir不斷咁嘗試遊說我收手,唔好再捉鬼。
 
「唔得!呢個除左係太爺嘅希望之外,亦都係我自己嘅希望!我唔想我嘅人生淨係讀書,畢業,番工...我唔要咁無聊嘅生活呀!」我對住歐陽sir講出自己嘅心聲。
 
「唉...咁無辦法啦,我真係唔想你地差隻腳埋黎,但你...唉,好啦...我明白啦。」我終於都講掂左歐陽sir。
 
「係咁嘅話,阿洛,你放學帶埋海澄黎搵我啦...」歐陽sir講完之後就自己行番落樓下,而我亦都番去自己果層樓搵海澄。
 
「海澄!我問左歐陽sir啦,原來佢都有靈力架!佢叫我地放學去搵佢呀!」我捉住海澄隻手好興奮咁講。
 
「吓!?真架?你點知嘅?」海澄聽到歐陽sir都有靈力嘅時候都覺得好出奇。
 
「我頭先問左佢呀嘛,我地放學果陣一齊去搵佢啦!有咩到時再問佢啦。」
 
「好啦,我今日都無野做。」海澄點頭示好。
 
「就咁話啦,我放學黎搵你呀。」我講完之後就揮手離開。
 
我一番到自己班房,阿峰就問我:「點呀?洛少爺,你今日同唔同我地去打波呀?」
 
「唔啦,我今日...」
我講到一半阿峰就打斷左我:「約左海澄呀嘛,得啦,我同Anson兩個去,你淨係溝女得架啦,唔撚洗理我地架啦仆街。」
 
「唔係呀,我...」阿峰頭也不回就同Anson一齊走左。
 
算啦,我依加要搵左歐陽sir先,阿峰佢地嘅事遲下再算啦....
 
「係呢度啦wor。」海澄指住雜物房門口。
「係wor,但歐陽sir真係叫我地黎呢間房架wor。」雖然我係咁講,但我都覺得歐陽sir講錯地方。
 
呢個時候,雜物房嘅門突然之間打開。
「係呢度啦,你地無黎錯地房。」
開門嘅人,就係歐陽sir:「歡迎你地,日頭嘅你係個學生,夜晚嘅你就係—降魔師。」
已有 0 人追稿