《日頭嘅我係個學生，夜晚嘅我就係個降魔師》: 《降魔師獵人篇》第二章 Ep.19
「喂，你兩個帶阿洛去整套suit呀。阿洛係我地新嘅降魔官，你地幫佢整得好好睇睇呀。」阿Rick命令All back男同大隻佬。
「吓...真係要好似你地咁著suit呀？」因為著suit真係好麻煩，前前後後咁多件，著住套suit打起上黎又唔方便，其實我真係唔係好想著佢地套野。
「阿洛，我地套suit好舒服架，同埋你去捉鬼果陣佢會幫到你架，乖啦。」阿Rick搭住我膊頭氹我去整suit。
「得啦，整啦整啦。」阿Rick真係好煩麻，雖然睇落好nice，但實際上我完全比佢食住左。
All Back男細細聲係大隻佬耳邊神神祕祕咁講左幾句。
「點呀，你唔抵得阿洛高級過你？」阿Rick問All Back男。
「係又點呀，我就係睇佢唔順呀。一個𡃁仔憑咩坐係我頭頂呀？」All Back男越講就越激動。
「好呀，咁不如你同阿洛打番場，睇下邊個勁D囉。」阿Rick挑釁All Back男。
一聽到到阿Rick咁講我嚇到瀨屎咁滯：「唔好咁啦....」
「放心啦阿洛，佢唔會打得贏你架。」阿Rick對住我擺出一個示懷好意嘅笑容。
「打咪打囉，我唔信我贏唔到個死𡃁仔。你睇我表演啦。」All Back男繼續臭串。
於是乎係阿Rick嘅擺報之下我地去做練習室入面決鬥。
「好啦，講下規則先。呢度有個牌，你地一人拎一個痴去心口果度。你地要搶或暫打爆對方個牌就為之贏。」阿Rick係衫袋入面拎左兩個牌出黎交比我地。
「比你見識下真正嘅降魔師啦，唔係你呢D下三流當捉鬼玩玩下嘅人見得到嘅野黎。」All Back男拎出自己嘅劍，擺好架式。All Back男用嘅劍係西洋細劍，戰鬥嘅方式比較似劍擊果類。
「阿洛，用我比你果把劍啦。」阿Rick指住裝住劍嘅盒講。
我把開個盒，把劍一拎上手就有一種似曾相識嘅感覺。就好似當初我第一次拎起修羅把刀嘅時候咁樣，我感覺到刀上面源源不斷嘅靈力不斷湧入我身體。
「喂喂喂，你咁做唔夠規矩wor。你將把神器比左佢用？佢點用得掂呀？」All Back男質疑阿Rick將把劍交比我嘅做法。
阿Rick托一托眼鏡：「阿洛用唔用得掂，你睇下咪知囉。」
「Err…我想問呢，把刀嘅能力係咩呀？」我拎住佢問呀Rick。
「無人知，因為把劍對我地所有人都無反應。呢把劍只會對佢認同嘅人先會顯現出靈力。」阿Rick再一次奸笑，其實佢跟本就係想借我同All Back男決鬥去睇下把劍嘅力量。
「準備好未，3、2、1，開始！」阿Rick一聲令下，我同All Back男嘅決鬥正式開始！
All Back男先聲奪人，一個弓步殺埋黎。
我向後一退，先避開第一擊。
All Back男一再進逼，打橫砍埋黎。
我提劍一擋，發現All Back男而家先再次出招。
同頭先見到嘅一樣，All Back男用嘅係橫砍。
係擋住All Back男攻擊嘅時候，我又再見到佢收劍再向前突進。
果然無錯，All Back男的確又係向住我見到嘅位置攻擊，而我又再一次擋住左。
睇黎呢把劍嘅靈力就係可以睇穿對方嘅招數。
憑著呢一招，即使All Back男嘅攻勢係幾咁凌厲，我都能夠一一擋下。
「我果然無睇錯人，係你嘅話一定可以發揮到呢把劍！」阿Rick係側邊食花生。
我嘅注意力咁啱比Rick講嘅野分散左，All Back男趁住呢個機會向我進擊。
無啦...已經無辦法避開呢一擊。
「阿洛！」係側邊嘅阿Rick由氣定神閒變到好緊張。
係咁危急嘅一刻，把劍突然發光，然後我就閃現左去All Back男嘅背後。
「係機會啦！」All Back男嘅劍揮空左，一於趁住呢個機會打低佢！
All Back男轉身將劍向住我呢邊拋過黎，為左避開佢嘅攻擊我就再一次閃現去佢身後攻擊。
All Back男嘅劍竟然突發調轉方向，向住我呢邊飛過黎。
「阿洛，佢把劍識得飛架，你要睇住呀。」阿Rick提醒我。
我用預視能力睇穿左All Back男飛劍嘅去向，再配合閃現突進去到佢嘅面前。
「Sorry，贏嘅係我。」我一手將All Back男心口個牌扯落黎。
「咩話....個細路竟然贏左...」係隔離嘅大隻佬比呢個賽果嚇親。
「我唔服，等我同佢打過啦。」大隻佬拎出佢嘅巨斧向住我衝埋黎。
「停手。」阿Rick拎支槍出黎指住大隻佬，再講：「放低把斧頭。」
「係...」大隻佬完全聽曬佢嘅話。
「好啦，阿洛已經贏左，你地都睇到啦，把劍嘅能力阿洛佢發揮到咩程度。」阿Rick繼續講。
「係...我明白啦，我而家會帶佢去整suit…」All Back男dup低頭同阿Rick講。
「咁阿洛你就整到好睇D嘅suit啦，搞掂之後再黎搵我啦。」阿Rick講完就行左番自己office。
「Sorry呀...之前對你咁無禮貌，係我唔啱。」All Back男打輸比我之後就低聲下氣同我道歉。
「你呀，都唔好對人咁無禮貌。」All Back男再同大隻佬講。
「到啦，係呢度。」All Back男將架車停低係一間睇落好高檔嘅西裝鋪門口。
「老細，我地想幫呢個後生仔整套suit呀。」All Back男一拉開門就同西裝鋪老細講。
「新同事呀？勁喎，咁後生就做到降魔師，睇你個樣仲係學生黎喎？」老細打開櫃桶拎出軟尺等等嘅度身工具。
「係呀...其實我仲讀緊中學咋...」我帶住幾分尷尬同老細講。
「你唔好睇少佢呀老細，佢係總降魔官親自挑選，一入黎就已經係降魔官啦。」All Back男拍一拍我膊頭。
「睇唔出喎，估唔到你人仔細細但又咁勁抽。細佬遞一遞高隻手呀。」老細先幫我度一下手嘅長量。
「係喎，阿洛你以前收服過咩妖怪？」All Back男好奇一問。
我望一望天花板，回想一下過去嘅事：「我最記得嘅就係可以操縱亡靈死靈術士。」
「唔撚係掛？」大隻佬一聽到我咁講就變左做樹熊樣。
「我地之前同死靈術士嘅無頭騎士打過，但我地成team人夾埋都唔夠佢打...」All Back男講。
「但係我見你頭先一黎就用阿Rick比你果把劍，咁你之前用咩捉鬼架？」大隻佬問。
「之前我係用修羅嘅刀，但係因為我打輸比歐陽sir,所以修羅仲沉睡緊。」我將修羅嘅事同佢地講。
「修羅！？唔怪得阿Rick會將羅剎之劍交比你啦...」All Back男一聽到我提起修羅就睇透曬成件事。
「我想問呢...邊個係歐陽sir?」大隻佬問。
「係『黑翼』，佢想向所有嘅降魔師復仇。」All Back男解釋。照All Back男咁講，睇黎「黑翼」係佢地對歐陽sir嘅稱呼。
「好啦，度完Size啦。你揀一套自己啱心水嘅款啦。」我闆帶左我入去show room入面揀suit嘅款式。
「就呢套啦！」我指住一套深藍色，簡約之中帶一絲華麗嘅suit。
「我明白啦，整到之後我會打去你地office通知你地架啦。」老細將我嘅尺寸、心水款式一一都mark低係簿仔上面。
「咁我地番去搵阿Rick啦。」All Back男出去拎番架車。
「點解你會做左降魔師嘅？」All Back男撻著架車。
「我會接觸到呢個靈界嘅野都係因為海澄...」一諗起海澄，我心入面又有一種好酸嘅感覺。
「海澄？姐係你屋企見到嘅果個靈魂？」All Back男問。
「係，佢就係海澄。」
「乜係咁呀...Sorry呀，提起D咁嘅野。」All Back發現自己講錯野。
「睇住！」大隻佬一手捉住個軚盤向左甩，而係我地右邊就傳黎一聲巨響。
「落車呀！有人襲擊我地！」All Back男大大聲咁同我講。
一落到車就見到車隔離果一忽地比人打爆左，如果唔係大隻佬我地已經三個都死曬。
「喂，乜你咁都打唔中架。」係路嘅前方有個同我差唔多年紀嘅人行埋黎。
「哼，你咁勁你黎打囉。」係後面傳黎一把似層相識嘅聲音，無錯，襲擊我地嘅人就係偉豪。
「佢地係歐陽sir派黎架！」我同All Back男仲有大隻佬講。
All Back男一聽到就臉色一轉：「係『黑翼』嘅人！？」
「無錯無錯，大佬派我地黎殺你地，唔止你地，仲有成個降魔師協會嘅人都係我地嘅目標。」前面果個男仔講。
「無錯，我地傳在嘅目的就係為左狩獵降魔師！」偉豪一講完就向住我呢邊衝埋黎。
睇黎歐陽sir嘅復仇大計終於都開始，而佢地第一步就係要狩獵我地呢班降魔師。