「阿洛,靠你啦,我地唔夠佢地打架。」All Back男拎起自己嘅劍。
「我都唔知夠唔夠佢地打,果邊用拳嘅果個人實力比以前強左好多。即使我預視到佢嘅攻擊都唔一定擋得住。」我答All Back男。
 
「等我黎啦!」大隻佬一手拎起巨斧衝埋偉豪果度,向佢垂直砍落去。
偉豪自知自己接唔過呢一擊,由迎擊姿勢變為急速後退。無可否認偉豪嘅拳係好利害,但大隻佬一擊嘅威力完全係偉豪之上。
雖然力量好強,但速度始終都係唔夠,偉豪都係避開左大隻佬嘅攻擊。大隻佬係地上面打出嘅坑洞直徑比起偉豪所打嘅至少大3倍,係旁邊嘅我甚至感受到地動山搖嘅感覺。
 
因為大隻佬嘅力量太強,所以砍空左之後嘅硬直都令佢嘅身生變得遲鈍。偉豪睇中呢一點,趁大隻佬仲未重整姿勢就搶先一步,一下重拳直入佢嘅中路。
大隻佬就完全食到應一應,即刻彈開十幾米。
 




「接招啦!」All Back男見到大隻佬比偉豪打到飛起,終於都出招。All Back男將劍向住偉豪一下掟埋去,偉豪當然可以一手就擋開呢種低端攻擊。
「得手啦!」All Back男再一次用佢嘅靈力操控半空之中嘅劍係偉豪嘅背後嘅死角位攻擊佢。
 
正當All Back男嘅劍到擊中偉豪之際,隔離嘅後生男終於都出手。黑色嘅閃電由佢嘅手中射向All Back男嘅劍,將佢擊落。
 
眼見情況如此,我都焗住要出手:「接招啦!」
我已經用預視睇穿左偉豪同閃電人嘅招式,將佢一一避開,再跟據預測位置攻擊偉豪。
 
「點解你會做到...」偉豪對於我將佢地招識睇穿嘅能力大感驚訝。
 




「對唔住,我一定要係度打低你。」我將劍向偉豪砍過去。
突然間我預視到有條鎖鏈向住我呢邊攻過黎,雖然差少少就可以打低偉豪,但無辦法之下我唯有閃現避開鎖鏈嘅攻擊。
 
「係時候啦!」黑布蒙頭,操縱鎖鏈嘅人向住唔知邊度發出指令。然後就有兩個黑影從天而降,飛躍到All Back男同大隻佬嘅身上,將佢地刺殺。
 
呢一刻我都自身難保,跟本就無辦法再擔心佢地。只見All Back男成口血咁向住我叫:「走呀!唔好理我地啦!」
 
無錯...呢個情況又再一次發生係我面前。即使有人死係我面前,我都係無辦法救到佢地。但我自己都無信心一個打低對方咁多人,無奈之下我唯有再次自己一個逃走...
 
暫時逃離現場之後,我見佢地無追上黎。我就即刻打電話打阿Rick:「我地比人襲擊呀!我地完全唔夠打。」




 
「咩話?你地係邊?我即刻帶人黎。」阿Rick一聽到有敵人就即刻好緊張。
 
「我send左佢位置比你,而家得我走甩左,佢兩個好可能而經死左...」我同阿Rick講。
 
「阿洛你係果度等我地,我地到之前乜都唔好做。」阿Rick吩咐。
 
按照阿Rick嘅指示,係原地等佢地過黎。
唔洗一分鐘阿Rick佢地就黎到,佢地成Team人係一個好似奇異果博士嘅傳送門過黎。
 
「阿洛,佢地係邊呀?」阿Rick黎到第一句就問。
而我就指住我一路走過黎嘅方向同阿Rick講。
 
「好,阿洛你都入黎啦,我地過去啦。」似乎呢個傳說門就係阿Rick嘅靈力。
 




「阿洛,果邊一共有幾多個敵人?」阿Rick問。
 
「有一個用拳嘅,一個用閃電,一個係鎖鏈,仲有個係操縱影子,一共四個。」我同阿Rick講番果邊嘅情況。
 
「鎖鏈?我地陣間一去到就即刻打低用鎖鏈果個人先,佢好有可能係用緊神器,只要一比佢條鏈鎖仲就用唔到靈力,要小心。」阿Rick同大家講。
 
阿Rick一到場就二話不說,即刻搵出鎖鏈人嘅位置再用傳送門描準佢嘅要害一槍打落去。
比阿Rick射中之後,鎖鏈人就𣊬變粉身碎骨,阿Rick只係開左一槍就已經有咁大威力...
 
而係另外一邊,阿Rick帶黎嘅其中一個人利用操控冰嘅靈力將偉豪雪成冰,禁錮左佢嘅行動。
 
而另一個人就利用靈力係半空之中創造一個個嘅結界陣,再踏上結間陣上面係空中拉近同閃電男嘅距離。先用手上嘅結界陣防禦閃電男嘅迎擊,再用另一隻手嘅結界陣攻擊閃電男。
 
影子人一直都隱藏自己嘅位置,只係用靈力所造嘅影子傀儡戰鬥。就算消滅左影子傀儡,對佢黎講跟本就一D傷都無。
 




「我叫你地去狩獵降魔師,乜你地又比人打番轉頭呀?」天上傳黎一把聲,一聽就知呢個係歐陽sir—「黑翼」。
 
「黎得好呀!等我收拾埋你,一網打盡!」阿Rick再一次舉起槍,用傳送門描準歐陽sir連開3槍。
 
「你唔係諗住呢D招數對我有用呀?」係半空嘅歐陽sir接左阿Rick三槍仍然毫髮無損。
 
「咩話...點解會咁架...」明明阿Rick一槍就打爆左鎖鏈人,但對住歐陽sir竟然一D效果都無。
 
「唔通...係反靈力防護罩!?」阿Rick似乎知道歐陽sir嘅秘密。
 
「無錯,你地所有嘅攻擊對我都係無效,乖乖地投降吧啦。」歐陽sir身上嘅邪氣不斷散法出黎。
 
呢一剎那,我嘅預視能力預見到影子男向住阿Rick衝埋去刺殺佢。
「阿Rick睇住!」我即刻閃現去阿Rick身後保護佢,擋左影子男嘅攻擊。我把握機會再向佢砍第二劍,影子男嘅反應非常快,立刻舉刀防禦。
點知我把劍竟然穿過左影子男嘅刀,直接砍落影子男嘅身上。




 
「唔係掛...竟然仲有穿透能力?阿洛你究竟係咩人黎架?」唔止阿Rick,在場嘅所有人包括我自己都睇到目定口呆。
 
「你太心急啦,你地成班廢物殺得果兩個茄呢啡,都係要我自己出馬收拾你地。」歐陽sir再一次拎出佢嘅黑色鐮刀,彼上黑色鎧甲向我地衝埋黎。
冰佬一拳打落地下,召喚出一座冰山迎擊歐陽sir。
 
「細路仔玩泥沙!」歐陽sir三兩下手勢就砍碎曬成座冰山,完全阻擋唔到佢。
係冰山之後仲有結界男殿後,用盡全身上下嘅靈力鍊成結界封印住歐陽sir嘅行動。
 
「得手啦!」結界男加大馬力,將結界壓向中心,打算就咁碾碎歐陽sir。
 
「唔好咁天真!」歐陽sir仰天長嘯,身邊嘅邪氣源源不斷咁爆發出黎,周圍嘅結界陣亦都𣊬間瓦解。
 
「大家小心,佢係我地頭號目標,唔係咁易對付得到。」阿Rick見識到歐陽sir嘅鋒茫之後就一時退卻。
 




「有咩方法破解到佢嘅反靈力防護罩?」我問阿Rick。
 
「我都唔知,我聽就聽過,但我都係第一次親眼見識到...」阿Rick講。
「我地遲左一步...我嘅子彈可以將目標體內嘅靈力一次引爆,實力越強嘅人效果就理應越大。再加埋我配合傳送門嘅必中技,理應係無敵,只可惜佢先一步得到防護罩...」阿Rick繼續解釋。
 
「阿洛...我地無可能走得甩架啦,不如你將『黑翼』嘅手下殺死,再嘗試下召醒修羅啦。」阿Rick諗左一陣,最終唯有咁決定。
 
「我明白啦...」我舉起劍,將閃電男都解決左。
 
我行到去冰封嘅偉豪面前:「對唔住...估唔到件事會發展成咁...我都唔想咁做,我一定會搵到創世沙漏番去以前拯救大家!」最後,連偉豪都死係我嘅劍下。
 
佢地兩個持有嘅靈力都唔簡單,但我都無咁過殺左佢地就已經令修羅有反應,「修羅?你係咪要番出黎啦?快D出黎啦,修羅!」
 
「阿洛你好嘈呀!」修羅係我嘅身體入面覺醒,我全身都沐浴係修羅之火入面。
「你番黎啦...靠你啦!」我對修羅嘅力量給予回應。
修羅之火變成鎧甲披係我身上,亦都再一次召喚出修羅嘅刀。
 
修羅之刀、羅剎之劍本為一對,如今再次重遇,兩把神器合而為一,集合曬兩者嘅靈力。有左佢,睇黎可以同歐陽sir決一死戰!
「上啦修羅!」我舉起劍,同歐陽sir殊死一戰!
 
「你做咁多野都係無用架!我有反靈力防護罩!」歐陽sir舉起鐮刀砍埋黎。
 
「你有反護罩,我都有預視睇穿曬你嘅招數啦!唔會再好似上次咁架啦!」我閃現避開歐陽sir嘅橫砍。
 
「哼...唔好咁得戚呀!」歐陽sir將邪氣集結係手上,做出一隻大鬼手抓埋黎。
 
我再一次閃現避開歐陽sir嘅攻擊,再食住個勢向歐陽sir反擊。我嘅劍穿過佢嘅鐮刀砍到佢身上,只惜都係唔夠力砍開佢嘅防護罩。
 
進攻失敗之後我同歐陽sir拉開距離,再向佢放出修羅之火。比修羅之火燒中嘅歐陽sir似乎覺得好痛苦,睇黎呢招行得通!
我扎穩馬步,再加強靈力輸出,為求將歐陽sir一把火燒成灰。
 
「唔會咁易比你得手架!」歐陽sir將更加多嘅邪氣集結係自己嘅身上,歐陽sir已經變成一隻怪物,呢一刻嘅佢已經不似人形。
「呢個係咩黎架...」阿Rick望住佢都呆左。
 
歐陽sir已經失去左理性,淨係對住周圍不斷破壞。
 
「修羅...有冇信心打贏佢?」我問修羅。
 
「交比我啦!」修羅再一次操縱我嘅身體。
 
修羅嘅戰鬥技術比起我嘅技巧完全係唔同層次,乾淨俐落嘅砍擊,無論係閃現嘅時機,抑或係用火攻嘅時機都拿捏得非常好。
 
「做得好!開始有效果啦,不斷攻擊佢嘅弱點位,一有破綻我就出招解決佢!」阿Rick舉起槍係則邊stand by,準備隨時出招。
 
修羅嘅攻勢越黎越凌厲,靈力輸出越黎越大。
「修羅...我就黎頂唔住啦...」我心入面出修羅講。
 
修羅認戰嘅時候消耗得太多嘅靈力,靈力輸出太大令到我唔係好受得住。
 
「阿洛,就黎得架啦,頂住呀!」修羅嘅攻勢比顯比起啱先收斂左。
 
「唔好啦,全力一擊啦!全盡我所有能量chur盡佢!」我同修羅講。
 
「我明白啦。」修羅一句簡單嘅回答。
我只係感受到靈魂被抽乾嘅感覺,跟住落黎發生咩事我就完全唔知...
 
已有 0 人追稿