（短篇）每一口煙，都有個故事: 《一支煙的時間》（六）

回到K房後，Adam唱過了幾首歌，老實說，雖然聲音有點沙啞，但唱得不賴，畢竟他有挺厚的音樂底子。
 
大概凌晨三時，大家都感到有點疲累，於是我們坐在梳化上聊天，任由歌曲一首接一首播放着作背景音樂。
 
「Emma你唱歌都幾好聽啵，有無興趣一齊jam下歌呀？」Steven問。
 
「哈哈，麻麻哋啦，點夠資格同你哋jam歌呀？」Emma莞爾一笑，謙虛地回應。
 
「唔緊要呀，大家一齊玩吓咋嘛！」Steven鍥而不捨地遊說Emma。
 


「Scarlet都一齊嚟啦！」Arthur忽然提起我的名字，驚醒了本來睡眼惺忪的我。
 
「Scarlet彈琴好叻㗎，搵埋佢彈keyboard啦！」我還未來得及反應，Emma已搶先說。
 
「好喎，咁我哋可以玩多啲唔同嘅歌啦，歡迎你哋。」Steven笑得很高興，其他人都拍手歡呼。
 
我不由自主地望向Adam，他向我微笑點頭。
 
想不到有機會能夠跟他繼續相處，心中不禁泛起一陣悸動。
 


明明大家都累得很，但昏暗的房間令人慵懶得不想移動，所以我們便攤在梳化上，有一句沒一句地搭着話，而我在昏昏沉沉之間入睡了。
 
「喂喂，起身喇。」一把枯啞的聲線把我從睡夢中拉回來，我一邊揉揉乾澀的眼睛，一邊坐直身子，一件西裝外套從我身上滑落到腿上。
 
Adam坐在我身旁，大腿上放着他的一雙鼓棍。
 
「Emma呢？」還未睡醒的我四處張望，尋找着Emma的身影，但四周無人。
 
「佢同其他人去咗洗手間，我哋要走喇。」Adam溫柔地對我說。
 


我伸了一個懶腰，然後呆呆地拿起了蓋在腿上的西裝外套，一陣淡淡的煙草味傳入鼻腔，刺激了我的大腦。
 
我立刻認真打量手上的外套，咦？這件外套不是Adam的嗎？
 
「唔好意思，俾返你⋯⋯唔⋯⋯唔該你。」我臉頰一熱，低着頭把外套遞給他。
 
「唔洗，係Emma見你瞓到縮埋個人，所以問我借件衫俾你。」Adam微笑着解釋。
 
我尷尬得不知如何回話，但心底還是興奮莫名。
 
「好喇，行喇，佢哋喺出面等緊。」Adam拍拍大腿，把外套掛在左手手臂上，然後站起來。
 
我連忙站起來，匆匆整理一下裙擺，然後與他離開房間，跟其他人在外面匯合。
 
走到了地鐵站，我跟Emma與其他人乘搭不同方向的列車，因此我們在月台分別了。


 
臨別前，Steven建立了一個WhatsApp群組，說是我們組成了一隊新樂隊。我就這樣得到了Adam的電話，不費吹灰之力。
 
在繁忙的都市中，連首班列車都很繁忙，我和Emma拖着疲憊的身軀，跟早起的上班族擠在狹小的車廂中。
 
「同Adam發展成點呀？」Emma冷不防問到。
 
「吓？咩⋯⋯咩點呀⋯⋯」我猶如一隻驚弓之鳥壓低聲線。
 
「你成日望住人，兩個人走咗出去，又一齊返返嚟，你當我盲嘅咩？」Emma囂張地調侃我。
 
「無⋯⋯無呀，傾咗兩句咋。」我低下頭小聲地道。
 
「咁⋯⋯佢件西裝褸暖唔暖呀？」Emma的笑容很邪惡。
 


「你仲好講，係咪你專登問佢借嘅？」我惡狠狠地瞪了她一眼。
 
「幫你呀傻妹！點呀，暖唔暖呀？」她居然興奮得擠眉弄眼，還用肩膀輕輕撞我，可惡。
 
「瞓着咗點知喎！」我回撞她一下，她又再撞我一下，結果兩個人笑着互相碰撞。
 
「你呀，要把握機會呀，知唔知？」Emma突然認真地跟我說。
 
「呃⋯⋯哦。」我有點被她的認真嚇倒了。
 
「嚟緊一齊夾band大把機會呀，你唔好甩底呀。」她繼續一臉認真。
 
「我唔會嘅，夾band應該會幾好玩。」我回應道。
 
「你應該要多謝我啦，係咪？」她打趣道。


 
「多謝你。」我是由衷地感謝Emma的，多謝她一直以來對我的關顧。
 
雖然前文已經講過一次，但我還是很想再講一次，有Emma這樣的好朋友，真好。