(校園/純愛/籃球) 《我係插班生，我追緊一個冇人追到嘅女神》: Chap. 2 - 為了她，我願意改變
翌日⋯⋯
(飛的感覺未開始 風景也不知 飛出去未開始 可以盡量地構思⋯⋯)
鬧鐘鈴聲令我找回意識。
沒錯，我跟她的故事還未開始，未來我們會怎樣，沒有人會知。
時鐘顯示着時間：「07：45」，我馬上整理行裝然後出門。
回到學校，一個足以傾城的笑容又再出現在我眼前。這也許是我上學的最大動力吧。
「早晨呀然！」
「早⋯⋯早晨」
「做咩成日都發佝瞀呀你」
「冇呀⋯⋯」
其實是因為你，我才會緊張成這樣。
「喂，If仔。」
「你叫我呀？」
「係呀！你同佢點呀？」
「咩If仔呀？不過我連佢電話都冇，可以點。」
「你叫余若然嘛，如若同若然英文都係if，咁你英文名咪if囉！你主動啲大膽啲啦好冇。你真係諗住等佢自己中意你之後佢向你表白呀？」
「你又啱喎！咁我又係想咁嘅⋯⋯但係⋯⋯」
「但咩係呀！聽我講，係中意人就主動啲去搵人啦！我等改口叫呀嫂架啦！」
「但係我應該點樣做先？」
「咁啦，遲啲學旅行日，我叫啲巴打幫手，搞返個聯班旅行啦！」
男人，除了有愛人和家人，有這種兄弟也是這種幸福。
「嗱，平時執下自己個Look，唔好淨係着波衫，你做開運動，加上你嘅身高，絕對有做男神嘅潛質呀！」
為了可琳，我願意改變。正所謂，人靠衣裝，贏波靠靚裝。首先就從外表入手吧！
如是者，我用了一週的時間搜尋了一些適合自己身型的參考圖，並在星期六相約灝楠哥一起買新衣，請他給我一些建議。經過一番舟車勞頓，終於都買了幾套風格比較斯文的套裝。不外乎一些前後都寫有英文字句的T恤、純白、天藍、淺粉紅色的襯衫和幾條黑色的修身牛仔褲。
「掂呀！咁着實冇死，起碼儀容分唔會低，唔會令佢覺得你同佢唔啱style，之後得米咯，你先着返波衫都得啦。你遲啲搵髮型師剪個All-back頭，外型部份就完啦。」
回家後，慈母見我滿載而歸，便問道：「又買波衫呀？同你講幾多次，你好多波衫架啦，成日着到咁冇女仔中意你架啦。」
「唔係呀，你睇下先啦」
「咦！今次買啲衫咁型嘅？做咩呀？中意左一個女仔呀？靚唔靚女架？」
果然是我娘親，「咁你都估到⋯⋯好靚架佢，所以我諗住買啲新衫，諗住同佢出街嗰陣着，費事襯唔起佢。啲錢儲左咁耐，諗住第時買樓，估唔到而家係用係追女仔到。」
「傻仔早啲講嘛，我捭錢你買嘛。買左幾錢呀？我捭返你啦，當係支持下我個乖仔。唉～大個啦，識媾女啦。」
「多謝呀媽，估唔到你會同意我拍拖⋯⋯」
「傻嘅，你呀媽我以前都拍拖啦，我明白嗰種感覺嘅。加油啦～到時記得帶女朋友返嚟捭我見下呀！」
「嗯，我會架，多謝呀媽。係呢，應該點樣約女仔出街會好啲？」
「冇嘅，睇下佢中意咩活動囉，佢同你一樣中意運動嘅話，你問佢同佢一齊打下波或者行下運動用品店都得架。如果佢係文靜啲嘅，帶佢去睇下靚風景，影下文青相都唔錯架！」
「好！咁我去搵下資料先！」
週末過後，是學生和上班族最怕的星期一，而我卻非常期待，因為我又可以跟她見面了。我約了灝楠吃早餐，所以比平日早起床。
「早晨呀灝楠哥，琴晚我同左我媽講我中意左可琳。」
「下？咁大膽？佢有冇反對呀？」
「冇呀，反而好支持我，仲捭左啲建議我，睇下可以約佢去邊同做咩。」
「咁不如就推薦你搵嗰啲地方嚟做學校旅行嘅目的地啦！順便當做你兩個第一次約會！」，他露笑一個奸狡的笑容對着我說。
「會唔會太快呀⋯⋯我同佢都未係好熟咋喎。況且我都唔敢同佢單獨相處啦⋯⋯」
「一次生兩次熟，三次大結局呀！唔試點知唔得，有啲嘢唔迫下你做唔出，但係一迫，龍汁都出呀！你都唔想呀嫂捭人搶走架。」
「都冇一齊到，嫂咩姐⋯⋯By the way我試下啦⋯⋯」
「捭啲信心啦，冇信心又點大膽。」
幾個小時的精神旅行之後又到最期待的選修科課，老師說趁有時間想先為我們分好做實驗的小組。我心裡當然很想和可琳，雖然如我所願，但同組的是和可琳坐在一起、叫張學晨的男子，跟一位戴眼鏡、紮了馬尾、叫呂桐的女同學。為何不是我所想的那樣！唉⋯⋯算吧，只要能跟她一組，於願足矣。我藉着同組這個契機，向可琳索電話號碼。
我下課後股起勇氣走到她跟前：「唔知你⋯⋯介唔介意捭你電話號碼我呢⋯⋯？」
「傻佬個大group咪有囉！9372 XXXX嗰個呀～」
「哦係喎⋯⋯」我搲着頭便離開了。
我這樣也算是稍為更主動大膽了吧⋯⋯
我回到課室跟灝楠說了這件事。
「咁我都算係進步左掛⋯⋯」
「算架啦繼續努力啦。而家你有佢電話啦，咁你就要主動啲搵佢，得閒搵佢傾下計，有機會搵埋佢出嚟玩啦，不過兩個人出嚟呢，佢可能會有戒心，始終識得唔耐，如果你想約佢，叫埋我同佢個friend啦，冇咁尷尬之餘唔會令佢覺得奇怪，而且我都幾中意佢個friend，係我中意嘅style～」
「原來你有私心嘅～得啦，大家兄弟，到時我都識做嘅。」
「估唔到你又幾有義氣喎。咁有義氣，不如今年叫埋呀鋒、呀文同呀龍一齊打班際籃球賽呀，今年我地差一個先夠一隊，冇後備都唔緊要啦，咁啱而家識到你，一齊打下啦好嗎？」
「我？我打開街波架咋，而且好耐冇打過，5 on 5 game又唔係好識打。得唔得架？」
「冇問題嘅，我信得過你，今日放學留低一齊打波，了解下大家實力先。」
其實我不太想打，因為某些往事，我一早己經放下了籃球，但灝楠看來很想打班際賽，又幫我解決感情問題，我作為兄弟，有恩必報，有難必幫，唯有重新拾回籃球。
之前沒有注意到學校的籃球場，原來是兩個籃球場並排着。我跟灝楠先到球場，後來又來了三個人，之前上課都沒有好好提起精神，完全不知道他們是呀鋒、呀文和呀龍，經過灝楠介紹才知道。
「呀鋒，全名周子鋒，身高169cm，司職小前鋒，身型偏瘦帶點肌肉，樣子給人一種陽光氣息。」
「呀文，全名陳煒文，身高172cm，主要得分投籃手，身型比呀鋒更壯一點，也有點肥胖，樣子看起來斯文帥氣。」
「呀龍，全名謝浩龍，身高178cm，主要是打低位、搶籃板，我們之中身型最壯，樣子很兇。」
介紹完他們三位後便開始討論位置分配。
灝楠：「咁啦，呀鋒同呀文繼續打返小前同得分後衛，至於呀然你打法係點？你仲高過呀龍喎，可能會撞位。」
「我打開街波，乜都識啲嘅，你想我點打？」
呀鋒：「我同呀文都係進攻型，灝楠你就組織型，呀龍就搶板嘅，咁呀然你不如打防守呀，進攻嗰陣就同呀龍一齊搶板，有機會我地都會分波捭你單打。你地覺得點？」
呀文：「OK呀，咁樣平均啲。」
呀龍：「冇問題呀，我進攻都唔算太扎實。可以唔洗我做～」
灝楠：「咁就咁話啦！然後而家我地要試下呀然嘅實力，我地一人同呀然打返場1 on 1先啦！邊個入波先邊個贏！」
我嚇了一跳，但我知我逃不了，唯有掙扎一下：「哇我好耐冇打過架啦，你地輕手啲呀。」