《小松奇妙物語！》: 06

「老頭子，小松天賦異禀，唔可以白白浪費。」外公嚴峻的面容，泛起一絲的愁色。


「你果然仲對佢嘅靈能力念念不忘啊。」爺爺抬頭大喝清涼的啤酒，目光定在天花上的吸頂圓燈：「唔通你仲想佢經歷多次⋯⋯「嗰種事」？」


二人沉默，只有嘴嚼的聲。


「但佢總會長大，到時候，就必須獨自面對一啲事情。」外公反問：「唔通你妄想，佢會一輩子留喺到，我哋兩老總會有離開嘅一日。」






「遲啲再講，至少等佢讀埋個中學先。」爺爺收起平日嘻皮的笑臉，重拾老人的成熟：「等佢有個開心嘅童年。」


這兩老，到底在談論什麼？


「佢天資高，但相對地，體質差，容易累，唔適合走你嗰條路。」進食完畢的外公，工整地放下筷子於碗上。






「又嚟你兩套陰陽理論？」吃完炸豬排的爺爺，再握起串炸肉丸：「體質差咪操吓，唔一定要學你個陰陽屎忽鬼嘅，有肉搏先係真男人！！」


「下下都好似你咁，小松多妖狐嘅九條命都唔夠用。」外公淡然地說。


爺爺嘻嘻大笑：「我自己都喺地獄爬過出嚟幾次。但點都好，時機成熟，我就會將畢生嘅心血都傳授俾佢，你準備好未啊～？小白臉。」






「難道我就唔會？」


「點知你哋啊！」轉眼間，爺爺已把桌上的食物，都吃進肚裡：「你都知你哋陰陽師幾攻於心計嫁～」


「難道你哋驅魔師又好大情大性？」外公冷冷地反問：「小松係我唯一孫女同血脈，我當然會傾囊相授。」


「最好啦～人類嘅最終，都只不過係傳承。」爺爺咬起牙籤，說。


茶餘飯後，兩老沒再談論小松的事，轉了別的話題。






「話說⋯⋯」喝著熱茶的外公，把杯子放下：「老頭子，前幾日，你感唔感受到？」


「感受到？乜嘢，有屁快放，唔好成日賣關子啦。」爺爺正專心地觀看電視，雙手緊張地抓住褲子：「今集大結局，阿津準備同梁曉晴告白啊！喺佢返德國之前⋯⋯！」


「睇少啲無營養嘅電視劇。」外公用遙控器，一按關下電視：「我講嘅事，好重要。」


「重⋯重要！！？」爺爺激動萬分地轉身，想要奪回遙控器：「無嘢緊要得過睇一個男仔會唔會成功同到心儀女仔表白！！！」


在爺爺靠近之際，外公以遙控器抵在他的額前：「四聖獸。」






「⋯⋯」


「前幾日，我感覺到，有近乎「四聖獸」嘅恐怖力量，湧現喺人界，仲離我哋好近。」外公說下去：「不過好快就消失，我追查唔到來源。」


「話唔定只係唔小心走出咗紫魅世界啫！」爺爺依然不放棄，想要搶奪遙控器：「呢啲事經常發生嫁喇！」


「力量咁強大嘅生物，無可能會貿然出現喺人界。」外公續說：「你應該好清楚，力量強大嘅生物，只要一出現就會吸引好多陰陽師、驅魔者過去，捕捉或者殺戮佢哋。」


「咁嗰日係咪紅月、藍月相交嘅日子～？」爺爺此刻才認真起來。






「未到七月十四。」


「咁係幾有趣嘅，不過我哋兩老都無心無力去調查喇，哈哈哈哈。」爺爺笑著離開。


外公凝視爺爺離開的背影，眼神掠過一剎光波，像想起了什麼！


「唔好走住！你想唔洗碗唔執檯！！？」外公呼喝。


除了爺爺的笑聲，就只留下一整桌的冷菜餘飯。

整晚都在聽兩老的對說，耳朵也累透。


填滿肚子的我，準備返回小松的房間休息。


不需一會，就飯氣攻心呼呼睡去。


這已是我進入這家庭的第⋯⋯


不記得多少天了。



「吱吱⋯啾啾⋯⋯」清晨，一隻小鳥在窗前停下唱歌。


「好嘈⋯⋯」我被牠弄醒了，那隻鳥兒唱歌很難聽。


我迅速地跳落床單，跳上桌子並接近窗戶，想要打走那隻小鳥，但臨門一掌卻被人硬生生地阻止，一對纖瘦骨幼的手將我從後抱住。


「將軍，你唔可以咁嫁！大家都係小動物。」是小松，她將我緊緊抱住：「要和平相處，你睇吓呢隻鉛色水鶇幾可愛。」


「吱啾！」那隻水藍色羽毛的小肥鳥，學紳士般向小松鞠躬。


小松將我放到腿上，讓我坐定。


她推開桌前的窗戶：「琴日訓之前呢，我訂閱咗「墨報」喇。」放鬆躺在椅背的她，正享受天然的日光浴。


「咁個篇新聞報導講咩。」我問。


「佢篇報導話，嗰到出現咗⋯⋯」小松也自覺莫名其妙地說出：「強大嘅聖獸。」


「聽落，同芳冇任何關係。」


「我都唔知啊，份「墨報」好似第二個世界咁。」小松苦惱地按額：「咩鬼魂出現啊、女巫聚會啊，都用報紙形式咁寫出嚟，成件事痴線得嚟又好吸引我。」


收音機正播放「My Little Airport」的歌，曲風清新又輕快，很符合小松的性格。


「咁睇嚟⋯線索都斷哂。」我說。


「唔洗灰心，仲有機會搵得到嘅。」


「墨報」的出現，沒有為我帶來芳的去向，卻為小松開拓了另一個世界。


這份報紙，如低級記者生芥草所言，表面上是份報導一般新聞的東西。實際上，只要付費訂閱，就能看到一些異想天開的新聞內容。


「巫壇市集，幾得意咁。」小松邊滑手機，邊吃牛奶玉米片：「話唔定你朋友，同呢啲神神怪怪嘅嘢有關。人哋話呢，貓同靈異事物好易接觸嫁。」


我走到她的碗前，舔了幾口牛奶潤喉：「我識芳咁耐，都唔覺得佢同神神怪怪有關。」


「將軍將軍，你點睇呢啲嫁？」她逗趣地問。


「地球咁大，我唔相得人類可以住哂。」我說。


「噢，好型。」小松稍微驚訝。


「？」


「有自己一套嘅諗法，你真係貓咪界嘅天才。」小松讚揚。


「⋯⋯你誇獎。」


「唔係啊，如果我問阿毛呢，你知唔知佢會點答？」小松裝扮那隻金毛犬的天真聲音，說：「小松我要出去散步步～小松我要玩拋波波～～小松我要你幫我刷毛毛～～～」


「佢只係溫室嘅小孩，會咁樣好正常。」我說。


野貓為生存，要絞盡腦汁，筋疲力盡才能休息。


但在伙伴中，牠們稱我為「將軍」或「指揮官」也是因為我懂很多，例如人類的文字、物品的功用。


因此，總由我擔任著領導。


「係喇，一直以嚟叫你將軍，咁其實本名係咩？」最後一口玉米片，把小松雙腮塞得滿滿的。


「葵，單名一字。」


「你媽媽幫你起嫁？個名幾靚喎。」


「係芳幫我起。」我伸懶腰，準備去逛逛：「我冇見過家人，係佢喺愛護動物協會入面救出我，原本⋯⋯我即將會被人道毀滅。」


小松抿抿嘴：「難怪⋯⋯你咁想搵番佢。」


「我會用盡所有方法搵佢。」


「好有情義嘅，好貓。」小松以指尖輕掃的我頭殼。


「任何一隻貓，都應該係咁。」我跳落桌子，以前向她：「唔應該學似人類⋯⋯」


「呯──！」忽然，小松撲向地板，側身將我抱住。


「哈哈哈哈哈，呢個就係我鐘意動物嘅原因囉。」那淺淺清朗的笑聲，使人耳朵舒適。


「返學。」我拍打她的臉蛋。


「係喎⋯⋯」小松呆然了：「你又知嘅？」


「你個日歷有寫。」我從她柔軟的手臂掙出頭部，望向掛在牆上的日歷：「２４號，今日，要英文測驗，夜晚就出席同好會。」


「你居然有時間觀念！」小松放開我、站起身：「決定咗，以後你就做「貓咪報時器」，逢朝早六點半報時。」


「我唔會咁早起身！」


小松上學後，屋子又回復平靜。


今天她的衣服，跟平日不一。


是件藍色的女童軍制服，上面還掛了好幾個領章。


「我出門喇！」小松喊了聲，就徒步而出。


「啊！！！！！！！！」對面屋子的兩老，卻發出激動的叫聲。


緊接，又是一陣撞門碰牆的聲音，兩老喘噓噓地跑出來，爺爺的褲子更只是穿到一半。


「小松今日我接你返學！！」兩人異口同聲地說。


「唔洗喇，我搭小巴。」小松明潔的笑齒，消除兩老激鬥的決心。


更一起溫暖地回笑，提醒小松要小心安全。


「呯」門關上。


「唉⋯⋯」爺爺無奈地笑道：「哈哈哈，小孫女嘅笑容，總係令我心一甜。」


「然後咩要求都搭應佢～」外公也無奈地說。


「小松已經冇咗媽媽，我哋盡力去愛佢都應份，至少⋯⋯佢應該都會感受到家庭溫暖？」爺爺抓抓自己那半禿的頭。


外公苦澀地點頭，回到屋中。


中午。


沒了早上的清涼，反添一些炎熱。


蟬在你不知道的地方鳴叫，耳朵也逆來順受了這一種聲音。


「叮噹～」門聲響起。


鈴聲勾起了我的好奇心，多麼希望是芳正在按鐘。


「汪！」金毛跑到另一間屋子，呼叫兩老。


「嚟嚟嚟～」爺爺不緩不急地過去，把門開啟：「杞家，搵邊位？」


來訪者，是名身穿白道袍、頭戴黑烏帽的中年男性：「你好，大師，請問長老在？」他恭敬誠誠地問。


「佢好似喺入面一邊飲茶，一邊人格分裂咁同自己捉棋～」爺爺讓開，給他進來：「急事啊？」


「非常緊急。」對方點頭，就速速進去。


我跟上白袍男人，去到兩老的屋子。


相對小松那間閒逸的屋子，這裡相對清幽，符合老年人的風格。


「大長老。」這男人真麻煩，在門口又躬了躬身才進去。


那麼在意小細節，注定做不了大事。


「嗒」外公把棋子放下。


「點解唔用紅線耳筒通話，我印象中無壞到。」外公說。


「咁係因為，事態太緊急。」白袍男說。


「關於前幾日嘅一時動盪？」


「嗯。」


「調查咗來源未。」


「我哋派出一切陰陽師菁英，只係猜到一、二。」白袍男將說出的事，讓我心有餘悸：「經過調查，隱約發現動盪嘅力量，係「四聖獸」嘅白虎，。」


「果然係「四聖獸」⋯⋯」外公並不感到意外：「白虎，佢當年都俾人封印咗起嚟，又會突然出現⋯⋯」


「唔排除，有人破除咗封印。」他說下去：「應該同前幾日，石澳一宗車禍有關。」


石澳車禍⋯⋯


還有「墨報」所報導的。


難道，真有其事！？


芳真的隨住某些不明力量，而下落不明？


「嘻嘻，偷聽人講嘢嘅貓。」突然，我被爺爺抱起。


「唔好啊！聽緊重要嘢！」我極力掙扎，可是他的手握力比想像更為之大。


「小松點解會鐘意你？」爺爺把我帶到花園，抱高高地打量：「我哋屋企嘅啦啦好似可愛啲。」


「個隻叫巫茲啦啦嘅貓？！」對了，我完全忘記牠的存在。


亦或說，牠的存在感太薄弱？


我幾乎一次都沒有見過牠。


「咁喇！今日我心情好，代小松帶你出去散步。」爺爺勉為其難地說。