風水佬講鬼: 狐狸
唔知有冇人鍾意食燒雞頭？
個雞頭燒到脆脆哋，好香，好好味。
咁生雞頭會唔會更好味呢？有冇人試過食生雞頭，食到骨都唔會𦧲？
...
肥英同我係由細玩到大既朋友，幾日前佢喺日本返黎，就約我食晏拎手信。
成餐飯我都望住佢個look，佢着得好奇怪，普通恤衫牛仔褲，但頸就掛住一條好舊既紅巾。
「喂！你個條咩黎嫁？好唔襯你喎！」我指住條紅巾。
「你唔好理啦！今餐你請！我買畀你個件手信係風水野黎！」肥英拎住一份好大既盒。
「係？你會咁好死？」我接過手，搖咗兩下，感覺有尐重，就準備拆開。
「唔好拆住！埋咗單先拆啦！」肥英伸手㩒住份手信，直到我埋單，佢先鬆開手。
我拆開包裝紙，見到入面有個盒，打開之後，發現入面又有另一個盒。
直到打開第六個盒，先見到一個手指公大既招財貓，下面仲有一條彈弓，隻手係咁搖下搖下。
「嗱！係咪冇呃你呢！都話風水野黎！我幾有你心！」肥英。
「哇！真係好有我心喎！」我。
「你冇聽過千里送鵝毛既故仔咩？物輕情義重啊！」肥英。
「我覺得個盒重好多囉！」我。
其實我呢個朋友，細個唔係咁市儈，只係有尐懶，同埋冇乜上進心。直到幾年前，佢老婆嫌佢冇錢，跟咗第二個男人，先性情大變。
依家既佢為咗錢，可以食飯埋單走數，為咗一兩蚊同人嘈，凡係同錢有關既嘢，都會斤斤計較。
「你等陣有冇野搞？不如上我屋企睇風水？記住唔好收錢啊！」肥英。
「做乜？你唔係唔信風水既咩？」我。
「呢排唔係好順！咪想搵你睇下囉...」肥英戚一戚條紅巾，好似仲有嘢想講，但冇講落去。
我認真咁望住佢，佢對眼有尐耷，印堂有尐紫，似係沾咗尐衰氣，個樣仲有尐邪。
我哋離開餐廳，行過街市，肥英係咁撩尐街坊傾計，應該話佢係咁搵尐街坊笨，但個個畀佢氹得好開心，冇同佢計較。
佢行去雞檔，雞檔阿姐同佢傾咗幾句，就好順手俾咗袋雞頭，仲要冇收錢添。
「喂！今晚加餸！」肥英。
「吓！雞頭？點食啊！？」我。
「雞頭好好味嫁！！」肥英講咗句，就戚起個嘴，笑得好邪。
唔知點解望住佢，背脊就有尐寒！
一路行，肥英都係笑住既表情，好幾次叫佢，佢都冇乜反應。
佢時不時拎起袋雞頭聞兩下，流晒口水，對住個膠袋係咁舔。
汪汪！
一隻大黃狗豎起毛，咿起棚牙，對住肥英係咁吠，好似想衝埋去咬佢，但好快就畀主人扯走咗。
肥英嚇到震咗幾下，成個人跌咗落地。
「喂！你無嘢嗎？」我伸手去扶佢，摸到佢隻手就縮返起，因為佢隻手真係好凍！
肥英停一停，好認真望住我：「我好似惹咗尐，唔應該惹既野返黎！」
「不如上你屋企睇咗先，或者我幫到你！」我。
一入到肥英屋企，就覺得有陣騷臭味。間屋好黑，開燈之後，尐燈眨咗幾下。
我望住佢個影，好似多咗條尾！但燈着晒，就再睇唔到。
唔通我眼花？
驟眼望過去，間屋四四方方，風水上都冇乜大問題，但唔知點解我覺得好唔舒服。
愈行近肥英間房，個陣騷臭味愈濃，房門冇閂，直望過去，成地都係毛。
「喂！做乜你間房成地毛？」我喺房大聲叫，但冇人回應。
行返出房，我周圍望都唔見佢，但係聽到嘖嘖聲，好似有人食緊野咁。
我行近尐睇，就呆咗！
「你...你做乜生食雞頭？」我。
肥英縮埋一角，眼神好空洞，一個一個雞頭咁塞落口。我拍咗佢幾下，佢無理我，只係重複：「好...好味...好好...味...」
我拎開袋雞頭，佢就擰住身望住我，對眼變咗藍色！
肥英畀嘢上咗身！
冷靜！冷靜！
㩒住個心口，我深呼吸咗一下，盡量令自己冇咁緊張！
佢見我企定定，就撲過黎，伸手去搶袋雞頭！我將佢㩒喺地下，佢掙扎咗幾下，就擘大口咬住我隻手！
隻手畀佢咬到流晒血！
忍住！
我將袋雞頭打落佢個頭，佢先鬆開口。好快佢又撲多次，我下意識就扯住佢條紅巾。
嘶！
我畀佢推到成個人向後中，緊張關頭我伸手一拉，扯咗條紅巾落黎，佢突然定住咗，個動作依然係飛撲緊。
向後褪咗幾步，肯定佢唔會撲過黎，我先睇下條紅巾。
唔通隻野喺入面？
「喂！快尐醒！」我拍吓佢塊面，叫咗好多次，佢郁都唔郁！
我㩒住佢個人中，佢先慢慢擘大眼，迷迷糊糊咁望住我。
嗚嗚...
聽到聲我即刻避到好遠，佢㩒住個肚係咁嘔，尐雞頭嘔到一地都係...
「你邊到惹尐咁既野返黎？」我指一指手上條紅巾。
「之前聽人講，話拜狐狸好旺財，我就諗住搬一座返黎日日拜，不過太重我搬唔郁，就拎條紅巾返黎。點知一戴，就知出事！」佢望住我隻手流晒血，個樣有尐內疚。
「你真係發錢寒！發到癲咗！！就算比你有錢又可以點？」我。
「錢好重要！如果我有錢，我老婆就唔會跟佬走！佢就唔會落咗我同佢既bb！就唔會覺得我無鬼用...」肥英。
講講下佢就停咗，因為...我手上面條紅巾郁咗一下。我同肥英即刻對望，大家都見到，證明唔係錯覺。
我嚇到爭尐想扔走條紅巾，但諗咗一下，就叫肥英拎個手信盒黎，逐個打開，將條紅巾塞落去。
「哼！六個盒睇你點走！」我將隻招財貓放落袋，就啤一啤肥英。
「大佬！玩下姐！唔好咁記仇啦！」肥英。
入面條紅巾好似想走出黎，個盒間唔中都會震幾下。肥英就拎咗幾卷膠紙，圍住個盒係咁黐，直到用晒為止...
...
今次真係死好命，咁都無事，撞彩執返條命。肥英將個盒寄返去日本，就再冇發生過食雞頭事件。
或者好多人會覺得到肥英好貪錢，但我有一個唔同既見解。
曾經我聽過一個故事，有兩隻感情好好既馬騮，其中一隻死之前，就抓傷另一隻。未死既馬騮唔想忘記對方，每日喺受傷位置抓一個新傷口。結果佢抓得太多，就流血過多死咗...
其實貪錢只不過係一個掩飾，咁多年肥英一直都唔捨得佢老婆...
http://bit.ly/2tCFHh2