[真人真事改編] 慘情四部曲．三個食檸檬的故事 [不定期更新]: 第一部 變格： Ch. 1 由來 Ep. 2

「妖！唔做啦！......呀～～～唔得喎陣間就交，唉。」

突然有人撞一撞我左面膊頭

「點呀，Vicky。」

「徐佩珊你都啱嘅咩......佢咁惡。」

「嘩，肥行，搞咩呀你，又要肥，又要剪啲飛輪海頭，知唔知柒嘅英文係咩呀？」





「umm......」

「係D-I-C-K-Y-L-I，Dicky Li呀！」

「妖，唔好笑我個頭先啦，你睇吓 Michelle，你唔幫佢，冇人幫佢架啦。」肥行好串咁講，聾嘅都知你暗示啲乜啦。

「鬼夠膽咩～～～」

都未講完，佢就推咗我過去。我同Michelle 四目交投，我就成塊面紅到喊，Michelle 就西我面......





「你想點？」

「ummmm～～～冇～～～我見你好似唔識做，洗唔洗教吓你？」

「你自己都冇做啦，你點會識呀？收皮啦！」

Michelle執起啲野轉身就走去操場，翻去班果條隊度啦。

「原來你未做架，你加油啦，我幫你唔到。」





肥行都就咗去排隊準備早會，咁我都唯有食埋啲野行去排隊。Michelle 咁講我令我深深不憤，追咗佢咁多年都係咁睇死我。難怪佢同兩個人拍過拖，再同我一齊留班都唔要我......陣間早會之後仲有一堂先到Eng Lit 堂，唔知Michelle 做唔做得晒呢，或者我可以偷偷比啲寫咗point 嘅紙佢嘅............唉，算啦，佢都唔會理。喺佢角度裏面，我同垃圾有乜分別？丫，有嘅，垃圾起碼曾經都有用過，或者係一件有用嘅野落咗喺一個唔啱嘅人手上，或者曾經造就過一啲有用嘅野；而我就係完全冇用。

 「Freude, schöner Götterfunken, Tochter aus Elysium,」

「梁家寶，你喺度唱緊啲乜？正經啲！」

「Joyful joyful we adore thee....... 呢首歌原文係咁架，唔識野......」

我好細聲咁講。其實早會真係悶得很，到個老師分享果陣，我諗翻起頭先同Michelle 果吓四目交投，好似似曾相識咁。
 某一日放學之後，我好熱衷咁參加咗藍社嘅啦啦隊預備活動，我好落力咁學緊跳啲啦啦舞。成班人一齊跳咗成個鐘，係時候放個break。我行到門前，跣咗一跣，咁就攤咗喺地下，成件衫嘅背面濕晒。呢個時候，我見到個肩披長髮，身型苗條嘅女仔，面上帶着小小嘅微笑，彷彿就好似因為我呢個滑稽嘅行為，而吸引到佢嘅注意。我快快咁起咗身，我哋兩個四目交投，為免尷尬，我點一點頭轉身就去咗廁所。當我再次返到去課室，佢已經走咗喇，我問我個同學佢叫做咩名，佢話佢叫Michelle Leung。

 當晚我返到屋企打開電腦，登入Facebook，就係搜尋欄上面打咗Michelle Leung。第一個搜尋結果就係Man Wai Leung，有18 個共同朋友，profile picture 上面有兩隻企鵝。我見啲共同朋友我都識，咁我就將浮標對準「加為朋友」然後撳咗落去。

                                                       





大家可以follow 我Facebook page。
歡迎大家留言，甚至DM 我。
有興趣聽吓我啲歌嘅可以Subscribe 我Youtube Channel 'TangTang'。