[真人真事改編] 慘情四部曲．三個食檸檬的故事 [不定期更新]: 第一部 變格： Ch. 1 由來 Ep. 6

「我都話我肚餓啦！」

「扮咩丫，你當我唔知點解咩。」

「咁你又問？」

「問吓唔得咩，睇你個樣梗係因為我先行出嚟啦。」

佢又微微撬起個最角，串串貢咁講。我當堂面都紅晒，都唔知點答佢好。真係果然我呢啲人點都唔及Michelle 呢啲有豐富經驗嘅老手，一眼就比佢睇穿晒。

「你快啲食啦，陣間翻都去比人鬧呀。真係服咗你，咁鬼死纏爛打，仲好意思約我出嚟食tea。」

我面露尷尬嘅笑容，我哋正正常常咁就食完個tea。我攞起銀包埋單，我仲攞埋Michelle 張單去埋。

「多謝喎，家寶。」

Michelle 一次過做咗兩件佢未做過嘅事。一，同我講多謝；二，唔係叫我全名。仲要加埋個笑容，我完全呆晒，塊面就紅到好似啲卡通片嘅角色咁。Michelle 見我咁樣，摸一摸我個頭。

「拜拜啦，我行果邊搭巴士，你快啲翻去練野啦。」



我感覺到我嘅靈魂漂咗出嚟，唔知啲人死咗係咪都係咁嘅呢？我望一望錶，嘩，都就嚟五點半，我急急腳就翻去禮堂。

「翻嚟啦？啱啱轉管樂團練習呀。你哋頭先點呀？」

「正！話唔定會得。唔該你呀，Vicky。」

「aiya，進一步啦，唔理你啦，我去弦樂團先，再傾，你慢慢FF 啦！」

唔係講笑，我諗Michelle 可能真係對我改觀。不過成個weekend 我搵佢，佢都只係hea 覆我幾句。都好啦，起碼佢會理我先。



星期一～～～

一起身，天就好黑，唔知做乜鬼。我睇天文台就話落雨，所以我都係攞定把長遮啦。我依舊搭07:38 班地鐵；我依舊見到果個肩披長髮，身型苗條嘅女仔；我依舊間唔中望吓佢，而佢竟然對我笑咗笑，就擰轉頭，係奇跡呀！架車到站，都係喺個深藍色嘅車站，呢個女仔又係一支箭咁落咗車，今日我冇野攞，雖然又做唔到一支箭咁快，但最少冇之前咁同佢分得好開。一路去到出口，果然落大雨，呢個女仔係出口卻步，摸一摸佢書包，即刻嚇到拉開拉鏈不停摷個袋。我行咗埋去，一道陰影就喺我同呢個女仔上面。

「早晨呀，Michelle，介唔介意一齊行？」

Michelle 佢停咗手，望一望上面，再望一望我，向我點點頭，我哋兩個就踏出咗地鐵站。我同佢一直好似星期五咁行，我又間唔中hi 吓佢膊頭咁。

去到學校，Michelle 就去廁所，而我就去canteen 買水，所以我就行前梯，Michelle 就行後梯。上到課室啱啱可Michelle 先入課室，我就喺佢後面行入去。

「嘩，係美女與野獸呀！講開又講，文慧你幾時轉口味食呢隻野獸架？哈哈！」

一個高高哋瘦瘦哋嘅一個MK 菇頭仔，笑住咁講。佢把聲又響又大，方死冇人聽到咁。再加上佢個好大嘅嘴，E 起棚牙咁恥笑。佢一路笑就一路拍佢右邊一個矮啲，個頭成個小夫咁嘅𡃁仔。

「你......你哋......」



                                                       

大家可以follow 我Facebook page。
歡迎大家留言，甚至DM 我。
有興趣聽吓我啲歌嘅可以Subscribe 我Youtube Channel 'TangTang'。