「你......你哋......」

「喂喂喂,我哋嘅鋼琴家媾到女喎!Aiya,掛住媾女咪冇時間練琴囉!不過唔緊要啦,《夢中的婚禮》都唔識同唔識彈冇分別架啦。」成個小夫個男仔咁講。

我同Michelle 即係面紅耳赤,我擘大隻眼𥇣住佢哋兩個,眼裏面燒起咗團火。我見住Michelle 嘅背影,佢僵直咁棟咗喺度,雙手捉住書包條帶。我哋就係咁企咗喺門口,冇郁到,一直望住課室嘅中間。走廊、窗外通通都係一片黑暗,仿佛我哋就喺舞台上面,射燈照住嘅我哋就被射燈外嘅觀眾睇住。
Michelle 𢱕低頭,谷住道氣咁講:「楊偉文、黃汶澤,你......哋......憑咩咁講?」

「我睇住你哋兩個架,一路行翻嚟就雨中漫步咁,嘩,喂,Romeo 呀,你遮得呀Michelle 咁開心呀,但呢個係Michelle 咋喎,唔係Juliet 喎!你哋唔講真係唔知原來沙士比亞果套叫Romeo and Michelle 呀。」果個MK 菇頭好囂張咁對住Michelle 講。

「楊偉文,佢遮我,我比佢遮除咗代表我冇帶遮之外,我唔見得代表啲咩其他野。」



「喂,Ronald。」果個小夫類嘅人拍吓個MK 菇頭膊頭講
「上星期五已經見到佢哋兩個就拍住拖咁行出咗課室,間唔時Romeo 又偷偷哋同Michelle肩貼肩咁行。最緊要係Michelle又唔介意架喎,你哋就係咁一直keep 住咁行過canteen。嘩,但係聽講Romeo 你要練樂隊架喎,唔知我同Miss Chu 講咗會點?」
MK 菇頭就拍一拍個小夫頭

「Jayden 唔好咁斷人後路啦,人哋已經廢到得翻音樂架啦,你咁Michelle 會覺得有咗件垃圾做男朋友好自悲架。」MK 菇頭就行埋嚟我身邊,大力鏈一鏈我個右膊頭。跟住喺我耳邊細聲講

「Romeo~~你放心。(跟住好大聲咁講)我唔會同人講梁家寶你為咗你女朋友梁文慧而走咗樂隊練習架!唔信你問吓你女......」

「夠啦!」Michelle 一手拍咗落張枱度,用佢最強嘅高音嗌咗出嚟。



「我同呢條躝癱一啲關係都冇!」

Michelle 行咗埋嚟,推開咗MK 菇頭,一手扯起我啲頭髮,一手指住我話:「呢條咁嘅碌柒,邊閪個會鍾意佢?要我鍾意佢,我不如去食屎算。」

「乜你仲係咁諗我架?」我呆咗咁講。

「你同我收皮!」Michelle 一巴車埋嚟。

「你痴線架?!」Vicky 一手扯咗我出課室,就一路帶咗我上7樓。「佢有冇野呀,痴線,有乜理由
對佢咁好都會一巴打過嚟?」



「咁我搞到佢比Ronald 同Jayden 屈嘛。」

「咁就可以打人架啦?」

我冇出聲,淨係𢱕低咗個頭,翻學果陣原有嘅笑容已經一早冇咗,換嚟嘅只有扁嘴同皺眉。

「我哋打鐘先落翻去啦,寶。」


                                                       

大家可以follow 我Facebook page。
歡迎大家留言,甚至DM 我。
有興趣聽吓我啲歌嘅可以Subscribe 我Youtube Channel 'TangTang'。
已有 0 人追稿