[真人真事改編] 慘情四部曲．三個食檸檬的故事 [不定期更新]: 第一部 變格： Ch. 2 改變 Ep. 3

「Vicky 無啦啦約你食飯嘅？」周穎賢帶點覺得奇怪嘅語氣問我。

 「你知唔知我同Michelle 嘅事？」 

「聽過吓啦。」

 「果件事之後Vicky 話幫我放低佢喎，所以約我食飯。」我一路攞住我支樂器同譜行去第一行嘅右邊「不過我都唔知佢會帶我去邊食。」我望住周穎賢縮一縮膊頭咁講，然後就放低支樂器喺櫈上面「呀，我去攞攞口水布先，唔講住。」咁我就行翻去自己個盒度攞啦。 

「哦。」周穎賢亦有少少無奈咁坐低咗喺指揮嘅正前方果張櫈。跟住個幾鐘佢時不時就會望吓我，我見佢望，我又會同佢吹吓水，畢竟成日停低練其他人，我哋冇份吹係有啲啲悶嘅，但總之，一切都好似正常咁啦。 

「冇乜野啦，咁每個人都記得執好自己張櫈同譜架啦！」周穎賢提醒所有樂團嘅人，我平時都會幫手執埋其他野嘅，不過今次真係快快手手執完自己啲櫈呀樂器就走咗上音樂室搵Vicky 啦。 

我喺音樂室門口，都未開完道門，Vicky 就走咗出嚟啦。

「快啲啦！」

「究竟我哋食咩要咁趕呀？」

「今日我哋去食你一直都話想食嘅野，不過要先去一去我屋企，所以要快，咁過到去都成八點架啦！」



「哦。」

我哋好快就上咗Vicky 呀爸架車，有錢人真係唔同啲夜啲翻呀爸會車佢翻去。佢爸爸好好人，同大富翁上面個公仔一樣有執鬚，不過冇咁肥。

「麻煩晒你啦，uncle。」

「你就係呀寶啦？唔麻煩，多謝你一直做呀珊好朋友就真，快啲扣安全帶啦！」 坐喺我左邊嘅Vicky 有少少興奮咁問我：「你鍾意打咩呔？Bow 呔定領呔？」

「Bow 呔，但我唔識打真嘅，所以我只會打領呔。做咩無啦啦咁問？」



「冇呀，叫我工人準備好啲衫，陣間去到屋企即刻就換架啦！」

「吓？做乜無啦啦換西裝？」

「hehe，我哋去食法國菜！」

「吓，唔係半島酒店先要著正裝架咋咩？我哋唔係去半島呀嘛？」

「係就係啦，不過係我哋book 咗一間房我哋幾個family 食飯，我哋幾個後生嘅有間房仔架！」

果然有錢人真係唔同啲，真係理解唔到，分分鐘我成世人唯一一次去半島就係今日。

 我去到Vicky 屋企，間屋又冇話咩三層樓水晶吊櫈咁誇，佢都只係一間小築，兩層咁啦，似村屋咁。我攞咗件西裝去廁所換咗佢，攞咗啲gel，gel 咗個頭，出翻嚟Vicky 嘅工人幫我打一條紅色有啲花紋嘅真係打嘅，唔係後面扣鈕嘅bow 呔。我企喺塊鏡前，見到自己身上套寶藍色西裝，我覺得自己有幾分似美女與野獸隻變翻王子嘅野獸。

 嘎～～～ 



我轉身一望，嘩！
                                                       

大家可以follow 我Facebook page。
歡迎大家留言，甚至DM 我。
有興趣聽吓我啲歌嘅可以Subscribe 我Youtube Channel 'TangTang'。