[真人真事改編] 慘情四部曲．三個食檸檬的故事 [不定期更新]: 第一部 變格： Ch. 2 改變 Ep. 2

「寫低佢咪作咗首歌囉。」 

我冇開燈，喺好暗嘅小聖堂裏面，呢個唔係好高嘅女仔慢慢行入穿透咗花窗玻璃嘅陽光，喺七彩嘅暗光下稍稍見到佢個少少陰都冇嘅all back 頭。 

「你又知我喺度嘅？」 

「呀大鋼琴家，我話晒都坐你隔離丫。咁嘅時世，你唔搵全校最孤癖嘅琴，唔通你去lobby 果部彈咩？食咗野未呀，我買咗個巨無霸餐呀。」

 「多謝。」我接過呢份巨無霸餐，佢仲係暖嘅，果然頭先份三文治係唔夠飽，好快就開始食呢個餐。 



「我係唔係好蠢？」咬住個包嘅我，咬字不清咁講。 

「直頭on9 啦，公廁你都要。人哋都擺到明唔要你啦，你仲嘥時間喺佢度。」

 「咁我放唔低佢嘛。我愛一個女仔有咩錯喎？」 

「人哋唔要你愛丫嘛。姑勿論Michelle 係唔係走寶，呢啲咁嘅人點都唔值得你愛佢。努力搵過另一個，忘記Michelle 啦！」 

「講就易囉。」 



「唉，咁啦，幫吓你啦我。星期五練完樂團之後不如一齊食飯啦。」

 「你話點就點啦，拿，俾翻$21 你，多謝你幫我買飯。」 


星期五～～ 


「陣間你管樂團完咗，快快手執埋張自己啲野就嚟音樂室搵我啦！」 



「哦，我哋食咩要咁趕呀？」

 「唔好理啦！」

 Vicky 跟住攞住佢部大提琴上音樂室，我就等啲弦樂同學行開晒就幫手將管弦樂團嘅拜位轉成管樂團嘅擺位。正當我搬緊啲櫈，長笛首席周穎賢 Joyce走過嚟搵我。佢矮我一個頭到啦，啲皮膚好好好白嘅，有少少肥，真係好少，望落唔會瘦到好似會一掂佢就斷果種，因為佢同我同一間小學，係一間唔準女同學留長髮嘅學校，所以佢自然慣咗短頭髮，係呢幾個月先開始留長，而家就扎咗一條好短嘅辮。周穎賢係我喺樂團裏面最好嘅朋友，除咗因為我哋識咗好多年之外，仲因為佢同我一樣都好鍾意音樂，樂團裏面唔係個個都咁鍾意音樂，有啲就係啲比較初級嘅同學，佢哋同常都唔會同啲首席呀，玩得高級啲嘅同學玩。變咗我哋啲鍾意音樂嘅就會自己玩，所以平時周穎賢走過嚟搵我都冇乜特別，但今次佢好似帶點膽心，有少少皺起眉咁走過嚟。 

「Vicky 無啦啦約你食飯嘅？」周穎賢帶點覺得奇怪嘅語氣問我。
                                                       

大家可以follow 我Facebook page。
歡迎大家留言，甚至DM 我。
有興趣聽吓我啲歌嘅可以Subscribe 我Youtube Channel 'TangTang'。