(短)《月光狼人傳》: 第五章
第五章
喺條街度行咗十幾分鐘之後，我終於忍唔住同佢講。
我：「喂，條街都冇人，獻鬼獻馬咩？！都係返屋企瞓覺把啦。」
小愛：「喂呀！反正都等咗咁耐落，等多陣啦！再講，你都已經俾我落咗詛咒，根本就唔使瞓。」
……….我竟無言以對
就喺我同小愛七嘴八舌咁吵緊放唔放棄嘅時候，目標出現咗……
我頂！乜你早唔嚟遲唔嚟，係要喺我就嚟勸掂佢嘅時候先黎咖！我真係愛莫能助，可以做嘅野我都已經做晒啦。
小愛：「呢個目標行路東歪西斜咁，應該係飲完酒黎啦。」
我：「係囉，喺人地唔係清醒狀態下殺死人地好似好殘忍喎！不如……唔好殺佢啦。」
小愛：「好！」
又咁好死？！
小愛：「只不過你直至聽日都冇得瞓啫嘛。」
……都估到冇可能咁好死㗎啦。
咁冇辦法啦。
我：「對唔住啊……」
我邊道歉、邊向目標衝過去。轉眼間，目標倒下了。睇住目標嘅眼鏡從原本嘅透明變成紅色。目標嘅衣服從原本嘅一般香港打工仔衫慢慢
染紅，最後變咗富士康員工嘅衫。
我……殺咗人啊。
隨住目標嘅血濺到我的衣服上，小愛嘅身影都越黎越遠，最終消失不見。
呢個時候，有班警察黎咗附近巡邏。你問我點解知？其實具體我都唔係幾清楚。之但係，我好似自從變咗做狼人之後，靠腳步聲就可以知
道係邊個。
既然有警察黎咗，咁此地都不宜久留啦。我用我所能及最快嘅速度跑返屋企，估計跑得仲快過保特。
返到屋企之後，我用最快嘅方法將証據毀滅，具體方法係直接將件血衣丢咗喺大廈嘅垃圾桶到。（好孩子唔好學我咁毀屍滅跡，實會被香港警察搵到並拘捕你㗎！）
丢完垃圾之後，我瞓咗喺張床到。本來以為會瞓極都瞓唔着，點知一覺瞓天光。唔通我真係對殺咗人一啲都冇感覺？！
~~~~~~~~~~~~
第二日朝早，我照常打開電視。
「喺今朝凌晨，警方喺西洋菜南街發現一具男屍，死因有待商確。據知，死者係一個銀行公司嘅普通職員。警方將案件暫時列作兇殺案，
暫時冇人被捕。」
爸：「肯定又係果班死人暴徒啦！呢班人真係最好快啲拉晒佢地添呀。」
正如我之前咁講，喺呢個政治黑暗嘅時代，所有衰嘅野都會瀨晒落果班抗爭者到。即使根本冇可能係佢地做嘅，都會夾硬將件事加諸喺佢
地身上。
呢件事就係最好嘅例子啦！
之不過....我當堂嚇咗一跳，估唔到竟然唔係夢。
~~~~~~~~~~~~
返到學校，我驚奇咁發現家宜竟然遲到。
因為喺我嘅認知裏面，家宜係嗰啲病咗都堅持要番學（玩）嘅人黎嘅。平時全班最早返到黎課室嘅，都係佢。
對於佢今日嘅反常表現，唔止係我，就連班主任都成功將目光放喺佢身上。幾乎全班同學都好好奇究竟家宜發生咩事，當然都包括我。
而喺呢班好奇嘅人當中，有幾個唔怕死嘅義士直接行咗去問家宜。
而家宜俾呢啲人嘅回覆都係因為交通原因，所以唔小心遲咗到。其實本來我都想問佢，但係見到其他人嘅戰績咁慘淡，我放棄咗。
其實我唔去問佢嘅原因，絕對唔係因為我唔想同其他人一樣咁慘。
而係因為……問黎都冇意思。
此話何解？
我身為最（想）接近佢嘅男人，佢住邊度我大概都知嘅……（唔好問我點解我會知家宜屋企喺邊，你會怕。）
咪就喺學校隔離咋嘛，邊度會有交通問題搞到返唔到學啫。
由此可見，交通原因都只不過係佢作嘅籍口、為咗掩飾某啲真正原因而作嘅籍口。既然佢自己本人都唔想講嘅話，咁我都唔勉強佢啦。
我決定要將呢種心態貫徹始終。所以，我決定……放咗學就搵佢嚟嚴刑逼供。
喺放學鐘聲響起嘅同時，我叫走咗家宜。
家宜：「點呀？如果係搵我問今朝發生咩事嘅話，咁就請回啦！」
咪住先，我哩個時候如果用嚴刑逼供嘅話，應該冇乜用㗎喎。
所以，我決定......轉方案，智取！
我：「家宜姐，身為你最好嘅好朋友，我又點會在意呢啲事呢？」
家宜：「咁究竟搵我做咩啊？」
我：「其實呢，我有個秘密想你幫我保守住。你份人守唔守到秘密㗎？」
家宜：「咁要睇下係咩秘密啦！」
我：「咪啦，都係唔講你聽。費事一陣揚到全級都知。」
好一招以退為進。
家宜邊喺地下轆黎轆去，邊講：「你信我啦！你信我啦！」
我：「好，既然你都做到咁嘅樣，我就講俾你聽。」
家宜聽到呢句，即時由兩眼淚光變咗做兩眼發光。
......乜我啲秘密真係咁有價值咩？
我：「不過，相對地，你都要講一個同我相同等級嘅秘密俾我聽。」
各位睇到呢到，係咪好想驚呼一聲城市套路深呢？！
家宜：「好啊！」
再次證明「轎唔怕舊最緊要受」嘅真理。
我：「咁.......我講啦。其實我鍾意咗一個人。佢好可愛，又活潑。佢仲ok靚女添架！」
家宜：「冇架啦？」
我：「冇架啦。」
家宜：「好，咁我都講下啦。」
講出黎咪好囉！
家宜：「家事。」
我：「咁係咩家事？詳細講下。」
家宜：「講完啦！」
我：「講完？唔係掛？！」
家宜：「係咁㗎啦！你話相同價值嘅秘密呀嘛，你又講咁少，所以我都講咁少囉！」
聰明反被聰明誤添……
唔緊要，我仲有Plan B。雖然有點兒廢……
我：「好，我同你講埋個人名，係你。」
怎麼樣，是不是有點廢。我面前的這位少女卻不是這麼想……
家宜：「既然係咁，我就同你講啦，男朋友。我阿爸琴晚死咗啊，佢就是新聞報導入面死咗嗰個……」
我：「唔好意思啊，要你唸返起啲傷心事……」
家宜：「唔緊要啦，講得俾你聽都遇咗啦！等陣間去邊到食呀？男朋友」家宜佢對住我露出不可言語的笑容。
咦，雖然結果我成功知道咗我想知嘅野，但同時間我都好似整咗個大坑出嚟俾自己踩。你哋呢？點睇呀？
題外話：下一章開始嘅內容、寫作風格都會有劇變。我預早喺到講聲，等大家有個心理準備。