與直男共存史: 04 窩心直男

上次輕輕提過窩心嘅直男。

我林窩心呢個詞係建立係體貼同細心上面。

如果所謂嘅細心係指男友人K嘅話，咁男友人E就係細心嘅例子。

之所以話佢細心，係因為有一次佢係電腦室當值完之後，咁啱因為袋入面有幾粒糖，就請我食。

當然我相信係真係咁啱，唔好懷疑。



「呢隻芒果糖好好食！」

我少有地係唔熟嘅人面前表達左我嘅喜好。

自此之後，每次見佢都有糖食，仲要每次都係芒果糖。

我林細心可能係呢個口賤嘅人僅餘嘅優點。

至於集體貼同細心於一身當真屬男友人X莫屬。



同男友人X認識嘅契機係因為一堂Lecture。

成堂我都完全唔明個Professor講緊咩，自然一隻字都冇寫過。

相反隔離嘅男同學（男友人X）不停抄抄抄。

於是我去到中間Break嘅時候，鼓起勇氣問左句：「請問⋯⋯呢度係點解？」

好神奇地，佢又答我。



然後我哋就做左陌生人以上，朋友未滿，至少我係咁諗。

我哋一直都一齊坐同幫對方留位。

直到有一次佢喘哂氣咁黎到上堂。

我望住佢，心入面疑惑不解。

佢一手塞左杯咖啡俾我，而且係我最鐘意嘅口味。

我問佢：「你專登去買架？」

「⋯⋯咁啱⋯行⋯過。」

一睇就知唔係。



事關嗰日係我同佢都要返早，而我仲係啱啱好TEST完勁攰，但係佢淨係買左俾我，冇買到俾自己。

真係有D被感動到⋯⋯

佢係由呢日先開始變朋友。

「好好飲！」我話。

佢低頭望Notes無理我，不過我覺得佢係怕羞啫。

無論咩關係都需要傾注真心和誠意，而且勢利D講句：最好係雪中送炭嘅時候。

【愛情和友情的分別在於是否在適當的時間雪中送炭及承勝追擊，一舉制勝】