點解我會變左做靚女架？: 12-燒烤

過左幾日，就到左春季旅行日啦，我地搭左旅遊巴去咖啡灣燒烤。

我著左件短袖衫同短褲裙，仲戴左頂漁夫帽。

「嘩！你今日著得好靚喎，呀清。」Carson話。

我：「係咩？哈哈。」我尷尬咁笑。

Jayden：「呀清不嬲都咁靚嫁啦。」我聽到之後暗爽，原來做一個靚女既滋味係咁好。



之後班男仔就透爐起火，準備燒野食。

我同Amy坐低左之後，火爐ｄ煙吹哂去我地個位果度，Jayden就首先講：「呀清，你果邊多煙呀，你地同我地調位呀。」

我：「好呀。」跟住我就同Amy坐左去對面，Jayden同Jason就坐左去我地原本個位。

Jayden同Carson叉住ｄ雞翼係度燒，燒完就同時俾我。

Jayden：「拿，燒俾你食嫁。」



Carson：「拿，俾你食啦。」佢地聲疊聲咁同時叫我。

我：「嘩，你地放係我隻碟到啦。」有兩個伙食兵伺侯我，真係笑呵呵。

但見到呢一幕既Katrina，塊臉即刻黑過ｄ煤炭屎。

我捧住碟雞翼行過去Katrina度，問佢食唔食，佢話唔食，我咪唯有俾ｄ江俊傑食囉，因為太多我都食唔哂。

因為Jayden同Carson猛咁塞野俾我食，所以我好快就飽啦。





到個個都食飽，收爐之後，家寶拎左副board game出黎，提議玩「true or dare」。

佢拎左枝又大又空既汽水樽放係燒烤網上面準備轉，如果轉完之後個樽蓋指向邊個，邊個就要受罰。

一係true，即係要講真心話，而回答既問題就係抽board game入面既卡而決定

一係dare，即係做一ｄ大膽既行為，至於係咩行為，都係要抽board game入面既卡而決定。

跟住，我地每人抽一張數字卡，係由1至10。而我咁岩抽中左「7」。

家寶將個汽水樽大力一轉，轉左好多個圈之後終於減速，唔知到最後會指向邊個呢？

係Jayden呀！跟住佢揀左dare，抽左張卡：「擁抱十秒」，跟住抽數字卡，佢抽中左「7」。



換句話，即係要同我擁抱十秒。Jayden見到之後忍唔住笑左出黎，就企左起身，同我擁抱。

家寶一倒數，Jayden雙臂就擁抱住我。唔知點解俾佢抱住，個人覺得好暖，個心仲卜卜卜卜咁跳。

Carson睇到之後眼都突埋，而Katrina就係長期黑臉。

Jayden：「你做咩紅都臉哂？呀唔係，臉都紅哂。」

我：「無呀！無咁既事。」

家寶：「抱完啦，到下一round。」

汽水樽大力一轉，唔知又會指中邊個幸運兒呢？



指中左Carson之後，佢抽中「親吻額頭」，而數字卡又係「7」。唉，又係我。

我俾Carson錫左落額頭之後，就全身毛管動。因為俾男人鍚真係好核突。

家寶：「下一round！」



汽水樽一轉，今次指中左Katrina，佢揀左真心話，抽中左張問題卡。

問題卡上面寫住：「如果你是殺手，你會最想先幹掉當場的哪一位？」

佢無一絲猶豫就話：「簡素清囉，哈哈。」

Katrina冷冷咁笑，我聽到之後都哈哈傻笑起上黎。



家寶：「下一round！」

汽水樽一轉，今次轉中左我，我揀左真心話。

問題卡：「當場各位異性之中，你最想跟誰發生性關係？」嘩，點解ｄ問題咁露骨既？

我：「我唔玩啦，得唔得呀？我都係揀dare啦。」

家寶：「無得咁嫁，你快ｄ答！」

在座既異性有Jayden，Carson，江俊傑同Jason，我答邊個都死。

我：「我唔玩啦，我肚痛，我走先！」我強行離場，家寶都吹我唔漲。



我一走，Jayden同Carson都爭住跟我走。

樹倒猢猻散，我地幾個台柱走左之後，「true or dare」呢場戲就玩唔成啦。

Jayden跟埋黎問我：「係咪食得太多所以肚痛呀？」

Carson：「肯定係鄧駿業ｄ野食有問題啦。」

Jayden：「你就有問題。」

我：「唔好煩啦，我無事喎，我只係唔想玩先至話肚痛咋嘛。」

Jayden：「咁就好啦。」