點解我會變左做靚女架？: 15-海水

去到海水公園之後，我地第一時間坐摩天輪，但係我畏高又驚離心力，所以我就一路捉實Jayden隻手，一路嗌。

摩天輪每行一格，我都用力捉住Jayden隻手，愈驚就愈用力。玩到落車既時候，我見到Jayden隻手紅左。

我唔玩機動遊戲，所以Jayden主力都係陪我睇動物，睇魚。

去到澳洲館，果度有樹熊，我就話Jayden好似樹熊，跟住佢就露出一個「唔係掛」咁既表情出黎，真係好可愛。

又去到金魚館，Jayden第一時間就話：「hehe，叔叔帶你去睇金魚啦。」



我：「咦！金魚佬呀。」

Jayden：「我係金魚佬，咁你係咩呀？」

我：「錦鯉（咁你）係魚呀。」

Jayden：「……」

Jayden：「做咩又學埋哂Carsonｄ爛gag呀？」



我：「哈哈，係咪唔抵得人地幽默過你呀？」

Jayden：「超，佢個樣就幽默。」

我：「哈哈，唔好人身攻擊啦。」

有人話：「靚仔講咩都係笑話，醜男講咩都係性騷擾」，其實呢句真。





Jayden：「扯旗蘭壽？」

我：「咩話？你扯旗呀？」

Jayden：「唔係，我話呢種金魚個名呀。」佢指住魚缸上面個名牌，真係寫住：「扯旗蘭壽」。

原來有種金魚個名咁搞笑。

我：「嚇死我咩，你扯旗既話，我唔會幫你解決性需要嫁。」

Jayden：「我知你係好女仔黎既，你想結婚之後先做果ｄ野，我都明既。」

我：「知就好啦。」但其實我並無諗住同佢結婚，因為我始終要返去男版既世界。

望住ｄ金魚，我諗起中文堂教既咩「子非魚，焉知魚之樂？」



其實係我眼內，ｄ金魚真係好似好開心咁。但係有多野，未做過真係唔知。

就好似做一個美少女咁，唔做過都唔知有幾爽，仲有當中既辛酸呢，未做過真係唔會知。

睇睇下金魚，有個MK仔撩我：「喂，小姐，你一個人呀？」

MK仔：「哥哥帶你睇金魚呀？」

我：「唔好意思，我有男朋友嫁啦。」

MK仔突然扯住我隻左手：「黎啦，唔怕喎。」

Jayden見狀，即刻打走MK仔隻手：「信唔信我地告你非禮丫拿？」



MK仔見勢色唔對，即刻逃跑，真係估唔到呢個世界原來真係有金魚佬。



之後，我地去左睇水母。到左幽暗既水母館，七彩燈光映射住半透明既水母，係度浮下浮下，真係好靚。

Jayden仲幫我影左好多女神相。

打卡呃like，唔洗半個鐘，就有成百幾個like。

ig inbox每個禮拜都有好多狗公問我：「hi, be friend?」之類既說話。

但唔好意思，我已經有男朋友啦，所以我已讀不回。

水母館入面昏暗既環境，真係好浪漫。呢個時候，Jayden叫我合埋雙眼。



我無防備，就俾佢抱住我，一下kiss左落黎，我馬上打開雙眼，想反抗都反抗唔到。

Jayden個嘴輕輕印落我既嘴唇，呢一瞬間，我好似觸電咁，個心仔卜卜卜卜咁跳。

「卡刷！」閃光燈影照住我地。

原來我地俾人影左相，邊個影嫁？係你？西裝男？

我行過去西裝男度，問：「點解你又會係度嫁？」

西裝男：「因為你夠鐘返去啦。」

咩話？