點解我會變左做靚女架？: 17-移情別戀

我：「唔好意思呀，我去一去廁所先。」

我一入到廁所就崩潰左，眼淚係咁流出黎，原來同愛人離別係一件咁傷心既事。

我同Jayden岩岩開始，就話要結束，我真係好唔捨得。

我根本就未放低Jayden，我打左個電話俾佢：「我好掛住你呀。」

Jayden：「咩料呀？唔好咁gay啦，大佬。」



我：「乜你唔記得哂啦？我地去海水公園既事呢？」

Jayden：「無ｄ咁既事喎。」

我：「嗯，無野啦，係我痴左線。拜拜。」

我返到黎「完氣」之後，硬住頭皮就試下同Katrina情深一吻。

個心卜卜卜卜咁跳，估唔到個感覺同我係水母館同Jayden接吻一樣。



咁即係我可以放低Jayden，繼續同Katrina拍拖啦？

之後Katrina臉都紅哂，好耐都講唔出說話。

食完晚餐，我拖住Katrina行街，問佢：「乜你唔係鍾意Jayden既咩？點解又會同我一齊既？」

Katrina：「係呀，但我唔知點解覺得你都好好，就應承你同你一齊囉。」

一定係天使既魔法，如果唔係點解釋到Katrina會鍾意我呢個成日俾人蝦既Loser？



但係，十四日之後Katrina就會忘記我。

你叫我點樣投入去愛Katrina？我唔知道，但即管一試。



翌日，我同Katrina手拖住手咁一齊返學，全班嘩然，而且再無人敢蝦我。

或者係佢地眼中既我，已經成為左人生勝利組，抱得美人歸。

有人話，一定要趁住中學，著住校服去拍拖，先至唔會有人生遺憾。

如今，我終於實現左，同Katrina糖癡豆咁係埋一齊，一齊返學、一齊食早餐、食lunch，一齊上堂send Message，再手拖手咁放學。

我記得西裝男Michael講過：「你投胎下凡之前，曾經許願想試下做一次少男少女，同埋得到真正既愛。」



我呢一世既任務，唔通只係為左同一個女仔、一個男仔拍拖？

唔理啦，可以同到靚仔靚女拍拖，都係一種幸福黎。

即使我同Katrina拍拖既日子淨係得十四日，我都要努力咁拍。

4月3日，我同Katrina數學測驗都fail左，要留堂補底重測。又係sin cos tan，maths makes me cry。

果日留到好夜，七點幾先走得，最後同Katrina一齊食M記，又係食開心樂園餐，要多啦A夢玩具。

我諗起Carson果句：「乜你鍾意多拉A夢既咩？」，「咁多啦B夢呢？」，我會心一笑。

Carson仲有句：「你知唔知天使同你有咩分別呀？」而家諗起返，原來我真係天使。





4月4日，我意識到我同屋企人只係得返十日既相處時間，我就帶左Katrina去酒樓同我屋企人食飯。

Katrina：「你好呀，伯父伯母，我叫Katrina呀。」

我呀爸：「你好呀，Katrina。多謝你成日關照我地呀清呀。」

我呀媽：「素真，素賢，叫人啦。」

我呀妹簡素真：「你好呀，Katrina。」

我細佬簡素賢：「你好呀，未來呀嫂。」Katrina聽到之後笑一笑。

如果我繼續做人，唔知係咪可以同Katrina組織一個小家庭呢？



但事實我只係得返十日做人，我有ｄ唔開心，望住碟菜心係度發呆。

我呀媽：「呀清，你做咩呆左咁呀，快ｄ食野啦。」

我：「好呀。」果晚我食到好飽，送完Katrina返屋企之後，我就順便散下步。

歸途上有ｄ意興闌珊，好想自己一個人行下，冷靜下。