點解我會變左做靚女架？: 18-最終章

4月5日，Lunch依然係同Katrina，仲有俊傑一齊食。

俊傑：「李卓楠同飛機無再為難我啦，你地覺得係點解呀？」

我心諗，唔通我係女版世界做既野會影響到男版世界發生既事？

定抑或係天使既魔法？算啦，唔理啦。

4月7日，星期日，我要返教會崇拜。今次有人作見證，話自己遇到神跡。



搞到我幾想衝上台話自己就係天使，只不過我唔可以講，如果唔係實好多人信耶穌。

4月8日，星期一，照樣如常同Katrina一齊返學，一齊食飯。

4月12日，又係春季旅行bbq，今次分組同上次一樣。

到我同Katrina燒雞翼，我諗起周星馳套《唐伯虎點秋香》。

唐伯虎：「燒雞翼我鍾意食。」



師爺：「但係你老母講你就快釘。」

唐母：「越係快釘之所以越要整多隻，如果而家唔食以後冇機會再食。」

師爺：「你真係就快釘？」

唐伯虎：「我真係就快釘~~」

三人：「如果而家唔食以後冇機會再食！」



一諗到得返三日既人生，我就苦笑。



4月14日，夜晚。

我同家人同Katrina去左尖沙嘴食最後既晚餐。

食完之後，每個屋企人我都攬一攬，因為呢個係我地既最後一次擁抱。

佢地返左屋企，而我就同Katrina去左海旁，一齊望住個海，海風輕輕吹送，感覺好舒服。

我望住個海，對人間依依不捨。

海旁有人Busking，唱既係「nothing gonna change my love for you」。



但係我就快要返去天家，做天使，換句話說，我即係要同Katrina「分手」。

我好唔捨得。我緊抱住Katrina，然後送左條坦桑石手鍊俾佢。

意味係永恆的愛。

我：「Katrina，聽日之後，我就要去一個好遠好遠既地方啦，你唔好唔捨得我喎，知唔知呀？」

Katrina：「知啦，我會等你嫁。」

然後我就戴上金圈，之後我望見一道白光。

然後去左一個白色既空間。唔通…呢度就係天堂？





Michael：「Hi，你終於都返黎啦。」

我：「Michael，呢度係天堂？」

Michael：「係呀，你通過左天使既考驗，而家終於可以做返天使啦。」

我：「咪住，如果我無估錯既話，天使係可以令兩個人相愛嫁嘛？」

Michael：「係呀，你又知道既？」

我：「係你既魔法，先令到Katrina肯同我拍拖嫁嘛。」

Michael：「哈哈，你咁醒既？咁都俾你發現喎。」



我：「我想按照Katrina之前既意願，令佢同Jayden可以一齊。」

Michael：「你想撮合佢地兩個？」

我：「係。」

Michael：「哈哈，一切自有天命。」

我：「仲有呀，我想知道我係咪gay嫁？」

Michael：「天使本身無分男女，亦無分種族，一時變成男，一時變成女，想點變亦得，得左。而且係大愛面前，根本無分男女。」

我：「好啦。咁天使要做ｄ咩嫁？」



Michael：「你就係Jayden同Katrina既守護天使，負責觀察佢地既言行，向上帝報告，可以用託夢或者潛意識守護佢地。」

我：「好，從今日起，我就係佢地既守護天使。」

其實愛一個人，未必真係要擁有佢。

能夠係遠處觀望住佢，守護住佢，已經係一種幸福。

就好似落花流水咁，淡淡交會過，各不留下印。