星期一,當我從港鐵落嗰陣,已經感受到死亡離我不遠。係路上見到我地學校嘅人,個個都懷著一股強烈嘅殺氣,對住何都抱有仇視嘅感覺。一個中六生用眼尾掃中我,對我露出一個前所未見嘅笑容,好似提醒緊我:我一陣第一個就殺你先。

 學校,短短一個星期就變為人間煉獄,一場腥風血雨嘅困獸鬥正式開始。直到依家,我都唔明點解警察係一啲行動都無,係因為真係唔知,定係……

 警察已經被收買?講真,我一直都唔明點解個變態校長可以有咁大嘅權力,去計劃呢一個視法律為廢紙嘅殺人遊戲,我估佢後面一定有人支持佢,幫佢撐腰。

 不知不覺就番到學校,見到校門出面被鐵絲網圍住,啲鐵絲網有大約3至4米高,鐵絲網旁邊有一部機器,形狀似發電機,一堆電線連住部機同鐵絲網,但實質都唔知係咩嚟。

 入到學校,只係見到平時熱鬧嘅操場一個人影都無。上到課室,同一班人,但硬係同平時有所不同,佢地唔係我認識嘅佢地。呢個時候,中央咪有宣布,係變態校長嘅聲音。





 「各位親愛嘅同學,你地係咪好開心呢?我等左呢一日好耐啦!哈哈哈哈……我會長駐係校長室,你可以嚟殺我㗎,如果你殺到嘅話。遊戲會係半個鍾之後開始,有咩要準備嘅快啲啦!呢個遊戲會直到最後只係淨低四個人為止。遊戲其間可以隨意殺人,不論方法。請大家好好享受接下嚟嘅遊戲啦!哈哈哈哈……」

 「華仔!」阿志,Joyce 同埋阿權一齊嚟左搵我。「快啲行啦,要去準備一陣啲嘢啦。」阿權攞出一張紙「呢到係要準備嘅嘢同埋可以囉到嘅地方」「咁行啦。」我攞住阿權張紙,去搵要用嘅嘢。「棒球棍:體育室,通渠水+漂白水:廁所……吓?要通渠水漂白水做咩呀?」「做化武。」讀化學科嘅阿志解釋呢啲嘢用途「將呢兩樣嘢加埋一齊,會產生有毒嘅氯氣。」「ok……」「flask +膠塞:chem lab, 背囊:體育室,水,電筒」呢啲裝備,十足打仗咁款。

 距離開始時間,只剩下5分鐘。

 「裝備執齊,依家講埋行動方式。」身為隊長嘅阿志攞出一張紙,畫低行動嘅陣式。「阿權你攻擊能力係四個人裏面最高,你行最前;我輔助你,行第二;Joyce 比較弱,但佢紅十字會隊長,有一定嘅急救知識,行中間;而華仔你就行最後,呢個位好重要,要不斷留意後面有無人偷襲,同埋要負責保護Joyce 。我比得呢個位你,係因為我信任你。」

 我身負重任,難免會覺得緊張,因為雷到隊友唔單單只係輸咁簡單,而係有可能會死。





 「我會盡量做好。」

 「我係體育室攞到一副跆拳道隊嘅護甲,刀就防到唔喇,手、棍嗰啲就唔係問題。時間無多,快啲著左佢先啦。」「記著」「如果我有咩事嘅,你要幫我保住Joyce ,唔好比佢有事,知道嗎?」「放心,我唔會比佢有事,我亦唔會比你地有事。」係呢個關乎生死存亡嘅時候,我當然唔會比我嘅朋友有咩冬瓜豆腐。「叮」一下響亮嘅聲音,就象徵住生命正進行倒數,我唔知幾時會完,我亦都唔想知。
(待續)
已有 0 人追稿