聖嗜殺書院: 第五章：初期勝利

我地係走廊前進，步步為營，阿權一邊行一邊窺探其他課堂裏面嘅情況，以防萬一。「我地採取被動，以防為主，唔好亂打，等人地開打我地先打，ok?」阿志細細聲講策略。
 「呀！！！！」「我仆你個街，我唔斬7死你我唔姓黃……」係不遠處傳來一陣相信係廝殺嘅聲音，刀鋒插入人體嘅聲音、血如泉湧嘅聲音、人嘅尖叫聲……全部都清晰可聽。「睇嚟前面唔只得一個人，大家小心。」阿權繼續係前面領導我地。我地企係轉角位，貼住牆，阿志窺探一下前面嘅情況。「嘩……似古惑仔劈友多啲喎，不過佢地得三個人，上啦！」說罷，阿權同阿志就衝左出去，我護住Joyce 。
 「咦？多左三件喎……條女幾正喎。Leo、David ,識做啦?」疑似阿頭嘅中四生叫另外兩個中三上前。
 「係嘅！」佢地嘅裇衫由白色變成左紅色，個中四身邊有兩條屍，相信係剛才嘅廝殺中死亡嘅。
 「食屎啦……」個啦字都未講完，就被阿權手起刀落，一棍扑穿頭，真係爆頭嗰種，啲血連埋頭漿爆埋出嚟，部分更加噴左落阿權件衫到。
 「屌，好核突呀！」阿權將棍指向另一個中三生「阿志，呢件你嘅。」個中三即時爻晒底， 手震腳震，冷汗都出埋。
 「你唔係爻呀嘛?想有女搞就上啦！」個中四叫個中三上前打，但自己就屈係後面食花生。
 個中三攞住一把家政室嘅刀，衝向阿志。佢一刀斬向阿志，阿志隨即用棒球棍擋住，再一腳踢個中三落地下。
 「想搞我條女?收皮啦！」阿志一棍打落準備轉身想走嘅中三到，仲要啱啱好打中後頸後腦嘅位置，骨頭斷裂嘅聲音十分清晰。「搞定兩個……咦?仲有一個喎?」阿權望向剛才一直係到食花生嘅中四生「你身為領袖，枉你啲隊友咁相信你，你竟然送佢去死?你根本唔配做領袖！食屎啦！」阿權用棍打落個中四到，棍棍都打落頭、背呢啲容易一擊即斃嘅位置。
 「呀！！！唔好打呀！！」嗰中四被人打到皮開肉綻，血如泉湧。「喂！嗰邊有人喎！我地趁火打劫去殺死佢地啦！」不遠邊方有一班人行左埋嚟，相信係被嗰中四生嘅慘叫聲吸引左。「哈哈……你地……都唔活都幾耐㗎喇，㗎大班人，我睇你地點打，哈哈哈哈……」之後嗰中四生就訓左係到，郁都唔郁。「衝呀！！」遠處嘅人向我地衝左過嚟，阿志立即將Joyce 推入旁邊嘅空課室，叫Joyce 唔好亂出嚟。




 「Joyce 你留係裏面，華仔同我地一齊守住。」
 班人睇落有7至8個人，人數上嚟講我地係處於劣勢，不過我地勝在有課室做避難所。
 「一陣如果唔夠打嘅，阿志同華仔你地入課室，我頂多陣，知道未？」睇嚟阿權都洞悉到我地人數上處於劣勢。「如果可以嘅，迫佢地入其他課室，咁我地嘅氯氣彈就有用啦。」阿志提出一個近乎無可能做到嘅計劃，不過我都會盡力打。雖然佢地人多，但武器無我地咁勁，有啲人只係得支鐵通，有啲人赤手空拳。
 「呀！！」
 阿志用棍一下就ko左一個人，連續打低兩件，而阿權就出現困難，因為對面對阿權瞭如指掌，知道阿權係武術世家嘅仔，就用人海戰術對付阿權，但佢地無人埋我身，可能因為我著左甲嘅原因。我立即上去幫阿權，打低左兩件。
 對面仲有4個人，但佢地嘅防線已經退到接近走廊嘅盡頭，走廊盡頭有一間空課室，佢地真係如阿志所講，退守入課室。「啱晒，佢地入左去，化武就有用處啦！」阿志將Joyce 從課室內帶番出嚟「Joyce ，攞啲嘢出嚟。」「係嘅。」

阿志用熟能生巧嘅技術將通渠水同漂白水溝埋一齊，同時確保所產生嘅氯氣唔會洩漏出嚟。
 「搞掂！」「華仔阿志，幫我打開上面個通風窗，掉啲氯氣入去之後即刻閂埋佢。」
 我企係阿權膊頭上，接住阿志比我嘅嘢，我打開窗，將氯氣樽掉入去之後立即閂窗。裏面嘅人連唯一嘅通風系統抽氣扇都無開，結果不足半分鐘，氯氣就充滿成個課室，裏面充斥住痛苦嘅叫聲，如地獄一樣。




 兩場戰鬥，一個鍾，朝早嘅十點半。呢一個鍾，係我人生中最漫長嘅一個鍾。而我地亦係遊戲嘅早期就相當順利。