聖嗜殺書院: 第七章：實驗室

自從知道老師原來都有份玩之後，Joyce 同阿志都有啲唔敢相信，因為始終都係大家平時相處開，又有深厚嘅感情。見到自己熟悉嘅人想殺自己點都會有啲可怕。不過依家最先要解決嘅問題係食物，食水方面根本無需擔心，但因為畢竟係幾百人嘅屠殺，人人為求生存都會搶奪食物。 「大家一陣上到六樓，記著唔好亂行，六樓對我地嚟講係未知領域。雖然嗰到有大量資源，但係比起其他樓層一定危險好多，知道無?」隊長阿志暫時放低剛才嘅事，收拾心情繼續領導我地。 我地跟住領頭嘅阿權，沿樓梯行上六樓。只係行到五樓就聞到一股濃烈嘅臭味，有啲似腐肉嘅氣味。因為太臭嘅原因，我地都用手遮住個鼻。 行到上六樓，一隻手臂咁長嘅老鼠突然係轉角位衝左出嚟，嚇到Joyce 花容失色，不斷尖叫。 「嘩頂！咁大隻老鼠嘅?」阿權似乎都比隻嘢嚇親，不過反應就無Joyce 咁浮誇。 「之前都未見到老鼠，點解偏偏呢到有，仲要手臂咁長。」 「唔理啦，我地繼續行，唔好比啲小事拖慢我地嘅進度。」我地繼續向前行。 六樓嘅課室比較整齊，完全無打鬥痕跡，但出面就令我地成班爻晒底。 「你地睇下，呢啲係咪…子彈窿?」Joyce 指住走廊牆壁上面嘅一個細窿。 「係喎…」「唔通嗰死老喇之前話有槍…係真嘅?」 「睇嚟佢真係嚟堅…」 「我仲以為佢講笑…」 「佢連人都殺埋，仲點會講笑呀！」「總之我地依家開始要小心，對面用嘅已經唔只係刀，而係槍。」阿權繼續領我地前進。 我地行到一間房到，門上寫住生物實驗室，門開住一條罅，門上嘅玻璃窗被人用報紙包住，而且係呢到，嗰陣臭味比起頭先更加強烈。 「等我入去睇下……」阿權打算推門入去，但比阿志一手拉住。 「醒少少啦！你點知裏面有無人?佢貼得報紙遮住都唔方好嘢啦，仲要開條罅比你望呀?我就唔信佢地會咁on居。」 阿權聽到之後向後退左一步，阿志就望左下裏面。 「裏面嘅環境我唔知，但好肯定無人，我入去先，你地跟，ok?」 我地跟住阿志行入去，裏面嘅情境，令人毛骨悚然。裏面凍到好似雪房咁，起碼有0度；一具具屍體比人吊起，有男有女。呢個情境加上微弱嘅白光，令我縮都鳩埋。 「嘩屌…」阿權無表情，阿志就O晒咀「搞乜莖呀…」 「睇嚟屍體離奇失蹤同巨型老鼠嘅問題，呢到就可以搵到答案。」阿權冷靜地做出分析。 突然一把人聲，我嚇到心跳快左3下，其他人同我即刻匿埋係枱底。 一個戴面具，著白色袍嘅男人行左出嚟，後面拖住一係屍體，手攞住一個盒。佢將屍體摔係枱上面，屍體上面有條明顯嘅手術疤痕。個男人打開盒，戴上手套，攞左一個人嘅心臟出嚟，放係另一個盒到。 「噁……」Joyce 差啲就噁出嚟。 「終於搵到一個靚靚仔仔心啦，大人今次應該會開心。」個男人將放心嘅盒放係一個袋裏面，跟住就行左出去。 「嘩，好彩無比人發現啫……」大家都鬆一口氣。 當我地以為可以放鬆嘅時候，個男人番左嚟。 「你地係到做咩！」個男人係腰間攞左枝槍出嚟……（待續）