[新手][愛情][排球]那天我成為女之後 我的人生不再一樣: 17.習慣做女仔？

我就落左商場下面等巴士，正值九月都仲好熱下，唔知做靚女係唔係咩都好彩Ｄ，等左一兩分鐘架車就黎到，可能因為兩點幾，Ｄ人都出曬去，所以樓上都仲有位，咁我就坐埋去窗口位。
 
坐低左之後，就突然有個男既坐左係我隔離，心諗周圍咁多位，做咩要坐係我隔離。咁架車好快上左屯門公路，咁架車繼續行，我就有我望風景。到過左轉車站(果時轉車站未起好)，個男就望過黎問
 
「你好呀，想問下你叫咩名呀？」
 
我比佢嚇一嚇，就望左過去，望真Ｄ其實佢樣唔算太差，你就係有陣MK味，似係想食女咁。
 
「下？！我……好似唔識你。」我講
 


「唔緊要，唔識依加識，我叫細輝。你呢？」
 
「下……Er……Kat…Kat…Katrina。」我口震震咁講
 
「你好呀，你讀邊間學校架？」佢問
 
「下……」我無奈咁講
 
「大家認識下嘛。我讀ＸＸＸ中學。」佢繼續講
 


「下？哦。」我覺得佢真係好煩，人地真係唔想理佢佢仲要咁厚面皮繼續講
 
「靚女果然係cool既，你電話幾號。」佢再問
 
「Sorry，唔係咁方便，唔該借借。」然後我就行左落去企算
 
落去企左一陣之後架車都去到荃灣，個MK就走左落黎，跟住又再問
 
「都係認識下姐，又冇壞既。」佢繼續講
 


我諗諗下，我就用返上次果招，叫佢比電話我，咁我拎完佢電話，佢又蠢唔曬，係咁叫我打返比佢，但我就話冇分鐘，數據唔多咁推左佢，話返到去會搵佢咁，然後佢就係荃灣千色店落左車之後我先輕返一口氣。
 
好快就去到葵芳，就落車行左去葵廣門口，我就Whatsapp Ada佢我到左。
 
見到Ada之後我就同佢講岩岩先有咩事發生左咁，佢都話靚女就係咁，叫我睇開Ｄ，如果你唔靚既，又點會有人黎識你？人就係咁膚淺，樣行先，你果時係男既你都想識靚女啦唔係咩？
 
咁我地行行下，Ada問我做咩唔覆佢Whatsapp，我話咪打左比佢，講講下，我就拎左電話出黎睇返佢whatsapp我Ｄ咩，原來佢有講叫我睇住黎Ｍ，但都係今朝既事喇…..
 
咁我同左佢講我黎到一床都係，佢就笑我話好多女仔都有類似經歷，叫我唔洗咁上心。
 
我地就由頂掃到落底，但因為我頭先食左個譚仔，所以唔算太餓，就陪佢行陣，都猜點買野食，咁行行下行到入去Ｄ賣衫既巷仔，我就好興奮咁衝左入去睇，睇完一間又睇第二間，又拎件衫同裙拍落自己度下，然後我問Ada點先叫岩身，又冇得試，佢教我左一Ｄ小小既技巧，咁我就買左隻衫同裙。
 
跟住再落多層，再行下，發覺Ｄ衫都幾似，Ada就話可能貨源差唔多，咁最後因為差唔多所以就冇再買，就走左去買返杯野飲就算。
 
我地就過左隔離既新都會度去個廁所，一黎急，二黎都要搞搞我下面塊野既……係依樣最麻煩，又唔舒服……唉，好彩冇Ｍ痛姐。


 
出去洗手時，我想開個水洗個面，但Ada阻止左我，話女仔唔會係街洗面，因為你遲Ｄ化妝既咪洗甩曬。咁我覺得又有Ｄ道理，就聽左佢講。
 
最後我地係新都會兜左個圈，Ada帶我買枝唇膏之後，我地就坐車返去。我都想不約而同揀左巴士，一黎有得坐，二黎唔洗轉車。
 
咁我地上到去坐低時，我讓左Ada坐窗口邊，而我坐出面。唔知點解今日Ada好似成日都望實我咁，於是我就問
 
「其實你今日做咩好似係咁望實我咁既？」
 
「嘻嘻，冇呀。」Ada笑笑口咁講
 
「講啦！」我「支」佢條腰
 
「哈哈哈！！！！！！唔好「支」啦，係喇係喇…….哈哈哈！！！講喇。」佢比我「支」到係咁笑
 


「無呀，我今日留意左你好耐架喇，我發覺你真係似返個女仔。」Ada繼續講
 
「似返個女仔？」我疑惑咁問
 
「唔……予其話你似返個女仔，不如話……你愈黎愈似女仔。」
 
「唔明。」我好疑惑咁問
 
「字面上既意思，你本來好男仔既行為，愈黎愈冇左。你自己唔覺姐，就好似你話，會怕醜唔敢講野咁；二，就係你見到衫會好開心，我相信男係唔會咁；三，你睇化妝護膚品都睇得好入神，男既又點會咁丫係唔係先？仲有就係你講野既語氣，同埋你既行為，正如坐姿咁，你依加都好會合埋對腳咁坐，你係男時都唔會合埋腳坐啦，同上你依加應該都習慣左著裙，係唔係？」Ada手托下巴，成個偵探咁講
 
「下？！…….」我真係比佢講到冇聲出，因為佢講中曬！