[新手][愛情][排球]那天我成為女之後 我的人生不再一樣: 16.多年一遇天文現象
比Ｄ姨媽搞一搞，搞到我都醒曬，咁我就望望個鐘，其實都十點。再望一望間屋，呀媽又消失左，睇黎又唔知去左邊啦。
咁我就打算去落樓下食返個早餐先啦，咁落去之前我行左去枱面，搽Ｄ護膚品先落去啦，要保養下架嘛，咁搽一搽，又揀返套衫，最後都成十一點先出到門口，咁我就一於去屯市食，順便出去買埋Ｍ巾，好！
發覺做女仔其實真係一件好開心既事，我行到邊，Ｄ男仔都會好自然咁望過黎，就算拖住女朋友既都會係咁望，我仲留意到佢地女朋友個樣……真係好好笑。
落到輕鐵站，照樣都係度等車啦，都冇咩特別事發生，去到屯市之後就去左上次Ada帶我去果間萬寧，我就行到去Ｍ巾果個位，唔知點解依加自己要買既時候有Ｄ尷尬，好似覺得全世界都望住我，知我黎Ｍ咁。於是我見人少少，咁拿拿聲拎左兩包，然後諗起Ada講咩日用夜用……於是我就返轉頭，拎返t字頭果隻既咩特長夜用咁上下，就走左去比錢。比完錢就拿拿聲袋返好就行返出去，感覺好似同人大戰完咁。
買完當然就去食野啦，咁我係屯市兜左個圈，最後就走左落去食譚仔就算，因為都唔知食咩好。咁落去到都成十二點幾，食飯時間比較多人，但因為等一個人所以都唔洗等位就直接比Ｄ姐姐叫左入去。
坐低我餐牌都唔洗睇就舉手
「寫野丫唔該。」
「係唔係死野呀？」譚仔姐姐問
「係呀，要雞肉麻辣中辣，飲凍奶茶多奶少冰少甜。」我講
「等等蝦呀妹，街肉麻辣中辣，忍咩話？」譚仔姐姐問
「凍奶茶多奶少冰少甜。」
「鞋……凍禮茶多禮少田少鞭…..多謝曬」譚仔姐姐就行開左喇
咁坐左係度等碗米線黎既時候，無啦啦有個人坐左埋黎，仲同我揮手，
「Hi。」
咁我當然冇理佢啦，但佢又繼續
「係我呀，上次我比左電話號碼你果個呀。」
我聽到依句之後我就望一望佢，諗一諗……！我先諗起早兩日果個毒撚。
「咁岩既，你又係食譚仔呀？」佢問
「呀…….係呀。」我心諗唔係食譚仔，坐係度做咩？
「我都係呀，你食咩呀？」佢問完都未等我答就拎左我張單黎睇
「嘩！咁食得辣既？中辣！仲要飲凍奶茶，但女仔人家唔好飲咁多凍野呀。」佢再講
「下？！飲下姐，唔洗咁掛。」我講
「係呢，你中秋果日有冇睇果個天文現象？」佢問
「咩天文現象？」我問
「哦！果個百年一遇架，我都係睇到小小咋，果晚天氣差，好多雲，月亮都睇唔到咁制。」佢講
(咩天文現象唔係重點，都係就返個故既姐，所以大家唔好咁執著喇)
「咁個現象係幾時開始？」我問
「夜晚….啦，八點左右開始，跟住就開始天氣差到有雷添。」佢一邊諗一邊講
「夜晚……」我係度回想緊……
「竹笙生哥酸辣大辣找搞牙，街肉麻辣中辣，邊位？」譚仔姐姐拎住碗米線問
咁我地自行認左頭之後，我再問
「其實你會唔會聽過有傳說係依個天文現象會有奇異既事發生？」我問
「唔明。」
「姐係好似Ｄ科幻片咁，由Ｄ現象發生呢，會有奇怪既事發生。」我再講
「咁又冇聽過喎。」佢邊食邊講
「做咩咁問既？」佢追問
「冇呀。因為Ｄ人成日講百年一遇既天文現象出現之時，總有Ｄ事會發生既……」我都係吹下水，chok下佢。唔通同佢講話出事果個係我咩！
「哈哈，你會唔會睇得太多科幻片呀，呀…係喎，未問你叫咩名添。」佢好似突然醒覺咁款問
「下？！」抹緊筷子既我都比佢嚇一嚇
「我叫呀豪呀，或者叫我做Desmond都可以。」佢伸左隻左手黎想握手
「Er……叫我Katrina啦。」我講，但冇同佢握手
「Katrina，你好呀，嘻嘻，終於知你叫咩名。」呀豪笑到見牙唔見眼咁講
「下？！……不如講返果個天文現象先？」我開始食住碗米線問
「哦！果個天文現象就好似話好耐先一次，對上果一次都成19…..19…..1918年……好似係，確實既都唔太記得，但就話好耐先一次，今次你錯過左，下次想睇都睇唔到架喇，可惜。」佢搖搖頭咁講
「但識唔識人清楚依Ｄ天文現象？」我問
「我諗大學Professor可能會清楚Ｄ。」佢講
「但冇啦啦就咁走去大學搵Ｄ professor問咩？咁Odd！」我講
「唔洗驚！就黎大學info day！你到時問咪得囉，又唔奇怪，又可以扮對學系有興趣。」佢好有自信咁講
「睇唔出你又幾醒架喎。」我托托頭望住佢講
「洗咩講。但我又估唔到你對天文既野又咁有興趣喎，我係學校就係天文學會會員黎既１唔知你興趣係咩呢？」
「打下波咁啦……」我講
咁係問，係食米線既過程就問左佢個天文現象既問題，到臨走時佢又再抄多次牌，咁見佢又幫到手，咪比佢抄，等係有需要既時候可以搵佢問下幫下手。
咁之後我地就散左水，無耐電話震一震
Desmond：你好呀，我係呀豪呀，Katrina你好。
我：你好，頭先唔該曬你（面紅嘟嘴樣）
Desmond：客咩氣呀，需要既搵我，隨時答你！
就係咁我就暫時理佢都費事，就再睇下其他whatsapp，都不外乎我幾時得閒，出唔出街，功課唔識可以搵佢咁。真係香港地，靚女同豬扒既待遇唔同，男同女既待遇更加唔同。有時真係唔明Ｄ女有小小蝕底時就大叫男女平等，咩Gentleman風度，有時我覺得男方讓你就人情唔讓係道理，女方唔諗下自己平時拎拎埋埋唔少福利。作為女既我，有時見到Ｄ男既，溝女溝到成個公公咁，我係女都食住你啦，係唔係先？當然我講既蝕底係執輸果隻啦，唔係走光被抽水果隻啦。
講太遠添，返返黎先！我再望真Ｄ，原來Ada有搵我
Ada：呀潔起身未呀？
Ada：我想去葵廣呀，你去唔去？
咁我見冇覆Ada，就打左比佢，就約左佢一陣葵廣等。咁我就落去搭巴士出發喇。