[新手][愛情][排球]那天我成為女之後 我的人生不再一樣: 25.Desmond的心意

之後去到警署時，就請左我入間房入面話錄口供，咁都係問返我去左邊，做咩野，點會經過果度咁上下，又問我出黎指證佢地肯唔肯咁？雖然我真係好驚，但我一定會出黎指證佢地！
 
錄錄下口供就有一個叩門入黎話捉到人，之後同我講人捉到咁，錄完叫我簽個名就走，到時會聯絡我。
 
一出房，原來Desmond佢都錄完，佢係過兩間房度錄。之後我Desmond行左埋黎
 
「Katrina，你冇咩嘛？」
 
「冇……返去喇。」我冇表情講
 


「送你？」Desmond問
 
「嗯……」我都由佢送，費事又再奶野啦
 
咁準備走時，果先攬住我果個女警就話
 
「伍小姐，你真係好勇敢，加油！」
 
「嗯…..我會指證佢地，等其他女仔唔會受害！」我講
 


「我地都多謝你肯指證佢地，好啦，唔阻你同你男朋友仔喇。」女警講完就走左
 
然後Desmond就跟住我後面一齊走。咁一路行我一路諗，成件事都好奇怪，點解係Desmond叫警察黎而唔係佢上前救我？咁一直行，行到去輕鐵站時Desmond都冇出聲，於是我就問
 
「做咩你唔出聲？」
 
「下……Er……」Desmond口窒窒咁
 
「其實你頭先係唔係睇得好開心？」我擰轉身問佢
 


「下……唔係呀，我……我……我……」Desmond口窒窒講
 
「答我呀！係唔係你都想好似佢地咁樣呀？」我愈講愈激動
 
「唔係呀你唔誤會喇，如果我衝左過黎，而又唔夠佢地打，仲點樣救你？」Desmond好緊張咁講
 
我諗諗下佢又錯唔曬，真係佢都比人打低埋咪ＧＧ，咁我又覺得佢都未衰曬，但諗到自己頭先差Ｄ比人搞時佢又冇出黎幫手果下，又真係忟忟地，所以最後佢送我返去既全程都冇咩出過聲。
 
到差唔多返到去樓下既時候，其實我條氣都比起頭先順返好多，都有諗過唔係佢我都比佢地女女女左。
 
「頭先Sorry呀，係我語氣重左，唔係你我都唔知點。」我講
 
「唔係既，我都有唔好，應該報完警再幫你既。」Desmond講
 
「算啦，你都係好心姐，但今日既事我唔想你同人講。」我講


 
「一定唔會，我會自動Delete，但今日陪你既記憶我係唔會Delete。」Desmond講
 
「下？！你講咩？」我問
 
「Katrina，可唔可以講我聽你叫咩名？」Desmond問
 
「冇啦啦做咩問人個名？」我好疑惑問
 
「因為都識左你一排，但我都仲未知你全名，其實我真係好想知，頭先聽個女警講你伍小姐，想問下你叫咩名？」Desmond講
 
「其實咪又係一個名，真係咁執著要知道咩？重要咩？」我問Desmond
 
「咁一個名真係咁重要咩？點解要唔肯講我知？」Desmond問
 


的確佢咁講我真係駁佢吾刀，我諗左一諗，算啦，又唔係咩秘密
 
「我叫伍潔瑤，英文名就係Katrina。」我講
 
「呀瑤……個名都唔錯呀。」Desmond講
 
「咪又係女仔名一個，都冇咩意思既。」我講
 
「就算有冇意思，對我黎講都係好有意思。」Desmond講講下面都紅埋
 
「下？！咪玩啦，咩好有意思呀？」我講，其實你估我唔知佢中意我咩
 
「因為我第一下見到你，就好似見到天使下凡咁，真係好正好氣質。你知唔知我見到你既第一下，我已經係認定左係你架喇？呀瑤！」Desmond講
 
「Er…..你想叫我中文名都係叫我呀潔啦，冇人叫我呀瑤架……另外呢，你講真架？」我一副詫異既樣問


 
「係呀，我真係好中意你架！」Desmond講
 
「咪玩啦，同你識左一個月都冇，又有幾中意我呀？同埋，你知我係個咩人咩？」我問
 
「咁感情可以培養既姐，可以慢慢再認識架，係唔係先？」Desmond問
 
「老實講，唔係話你唔好，其實有個問題困擾住我，我唔想拍拖住。」我講
 
「有咩問題咪一齊去解決囉，有咩唔可以一齊面對？」Desmond問
 
「唔好玩啦，我真係唔想拍拖住，我真係唔想拖住你，你搵過個啦。加上我自己既問題都未解決到，我唔想將個問題，搵其他人一齊同我解決。」我講
 
「你可以講出黎一齊諗架。」Desmond講
 


佢講完我地都靜左，之後都行到樓下
 
「Sorry，個問題我自己會解決，你係個好男仔，我諗有人更加適合你既。」我講完之後就轉身
 
「我到喇，今日唔該曬你。」我再講，然後就推門入去，跟住我聽到Desmond大叫
 
「呀潔，無論問題再難解決，我都會同你一齊去解決架，我永遠都會係你身邊去等你架，有咩事都可以同我講架，我等你。」
 
我聽到之後就擰轉頭望一望佢，佢舉起佢既手指公，我望完之後就擰轉頭望返前面，然後入Lift。我心諗，點解我會有小小感動？點解……？再諗，如果你知我本身係男，你仲會唔會對我咁有興趣？男人呀男人，你應該都係想同我合體姐。