火花不等人: 愛到入城大

「Sorry，頭先講緊電話，啱啱收線。」一個小小的謊言。
「女朋友？」
「嗯，類似喇。」
「女朋友都有類似？」
「分咗手無幾耐。」
「oh. . . . . . 放唔低？仲想追番人?」
「原本都希望係，但依家無喇。」
「最衰都係Twins﹗」
「阿Sa同阿嬌？」
「係呀，我地愛到入城大也分開，係預計之中，因為佢兩個咀咒City！」


「哈，你越說越激動，有被咀咒？」
「有，不過同你相反，係我個Ex唔肯放棄。」
「我地兩Pair四個人應該坐低交流下心路歷程。」
「哈，係，我要請教你個Ex點樣可以令對方死心。」
「咁呢樣我可以教你，下次佢打畀你，你搵個男仔幫手接，然後同你個Ex講話你沖緊涼。」
「嘩，咁激？我驚佢受唔住刺激自殺喎。」
「有無咁易呀？你睇我，都未死。」
「下？佢真係咁同你講呀？」
「咪講咗話我啱啱講完電話囉。」
「下‧‧‧你無事呀嗎？」


「正話準備擒窗咖喇，好彩見到你MSN hi我。」
「咁我真係你搵命恩人喎！」
「直情要以身相許喇！」
「咁我諗到喇，就由你負責幫我接佢電話，話我沖緊涼喇！」
「下？你個Ex會唔會找我晦氣咖？」
「咁你有無打算搵頭先接你電話個男仔找晦氣啊？」
「咁又無‧‧‧」
「咪就係囉！唔洗驚！就咁決定喇﹗」
「到時再算喇，哈哈。」
「話時話，你點解畀人飛嘅？」我當時還未學會欣賞袁頌婷的率直。


「你呢？咩事飛人？」我沒有回答，連消帶打反問袁頌婷。
「我覺得同佢距離越嚟越遠，佢會考之後就無讀書，出咗嚟做野。」
「你嫌人地學歷低？」
「學歷唔係最重要，但我真係睇唔到佢有上進心，就算唔讀書，都可以有好多出路，兩年前我同佢一齊會考，兩年後我考完A-Level入大學，佢兩年時間無份工做得長，又唔肯去進修，完全對將來無打算。我就向前行，佢就好似原地步，我想有個人係同我步伐一致。」
「你梗係唔知一般男仔無女仔咁成熟，可能要過多幾年佢先識得諗你依家諗緊嘅嘢。」
「我唔想等呀。」
「你好趕咩？」
「佢無讀書之後我地成日嗌交，好攰呀！其實講咁多都係藉口啫，過到尾就係無Feel囉。」
「你都幾坦白。」
「我都有唔開心咖，我講完，到你，咩事畀人飛？講喇講喇！」

那個晚上，我倆交換往事，我告訴她我跟那個她的故事，她告訴我她跟那個他的情節；我告訴她我跟中學一班死黨的瘋狂事，她告訴我她在女校被師妹追求的浪費史；我告訴她我從小便是游泳健將，她告訴我她長期是校內羽毛隊的頭號好手；我告訴她我爸媽常在家以印尼話交談而我一直也學不會，她說她父母已分開媽媽移居了加國她經常會很掛念母親；我說愛吃辣；她說她嗜甜。

神不知鬼不覺的情況下，袁頌婷沒收了我地獄通行證。