火花不等人: 剖白

「你有興趣知咩？」袁頌婷又何嘗不是以問題答問題呢，這種自我防衛的機制人皆有之，每當面對不想回答的問題，又未能即時找到藉口，便以問題作回應，企圖拖延時間，其實我真心認為，這被說謊好。
 
至於應對的方法，就是莫視對方的反問，把自己的問題再問一次。
 
但當時我沒有追問，因為我確實不太感興趣。
 
「正話先講我地識咗唔似好耐，但係又好似好了解我咁喎。」
「啱啱相反。咪講咗囉，都唔知你諗乜，點了解你呀？」
「咁你想了解啲咩呢？」我由衷的感謝袁頌婷，剛才不到兩分鐘的演說讓我很感動。
 


「你係咪鐘意我？」
 
沒有繼續依在我肩膀，袁頌婷正襟危坐望著我問。
 
「係」一個字，無尾音，無感情。
 
這個答案根本不用修飾不用包裝。
 
「咁你放低咗佢未呀？」
「咁你呢？比較完我同佢未呀？」死性不改的以問題答問題。


「依家係我問你呀﹗」袁頌婷已經學會如何應付，盤問技巧再度有所提升，加上胸口的一掌，我沒法再反問來拖延時間。
深呼吸一下，然後嘗試把袁頌婷帶入我的回憶﹕「個朝你問路，第一眼見你，覺得你好靚。」
「賣口乖。」
「咁你又笑？」
「跟住呢？」又一掌。
「當時我係度諗﹕「你係唔係嚟救我咖？」」
「Peggy都好靚女喎，Vicky都唔差，個個都可以係嚟救你咕喎。」
「係，但係偏偏係得你咁白痴，嚟拍我膊頭問路嘛。」
「頂你﹗」又一掌。
「大人，咁落去，我未講完已經畀你打死。」



聽到我投訴，袁頌婷雙手捉住我的衣領，把我拉近。

近得二人嘴唇互碰了一下。

電光火石的一下。

呆了半刻，我失笑，有氣無力的說：「我鐘意咗個顛婆‧‧‧」

「以家無事喇？快啲繼續。」袁頌婷得意洋洋的在笑。

再一次深呼吸，以平復因為剛才那一下觸碰而暴跳的心臟，再繼續跟袁頌婷回憶過去的幾個月。

「之後我地寫Memo、MSN、SMS、你霸咗我個Locker、我袋住你個木牌仔、你買我唔鐘意嘅煙肉蛋畀我做早餐、我陪你補完習飲你鐘意嘅凍朱，慢慢你開始係我心入面佔有一個位置，我開始少咗諗起佢，或者就算諗起，都無再咁難受，因為對佢嘅回意，同埋，同你相處嘅片段，兩樣嘢開始係我個腦入面出現重疊，你帶畀我嘅甜，慢慢中和佢留畀我嘅苦。我開始真係覺得，你係真係嚟救我。個晚係電話度‧‧‧我喊‧‧‧之後唔知點解你就失咗蹤，雖然仲有SMS，但係一直都再見唔到你，然後我係恒生撞到你，望住你個一下，我先知道自己真係有掛著你，不過你見到我同Peggy‧‧‧於是又消失，而且仲係連SMS都無咗。一路一路去到考試個段時間，我第一次，因為你，覺得苦。」



袁頌婷定神望著我﹕「陳政，嘿，我第一次‧‧‧聽你一口氣講咁多嘢‧‧‧講咁多關於自己嘅嘢‧‧‧原來唔止唱歌，你講嘢都幾好聽呀，點解唔多啲開金口呢？嘻，男人老狗你講嘢咁文鄒鄒嘅？你會唔會考慮去寫小說呀其實？」
「你呢個回應好唔啱Mood囉小姐。」

但的而且確，活了二十年的人生，第一次面對面在一個女孩子面前剖開自已的內心。

「你未答我，咁即你放低咗佢未？」