[真人真事][校園][純愛]《兩個我加一個妳》: 第十二章

結果嗰日放學之後，

我就去巴士站等芊靈啦

今日終於唔使喺學校扮踢波

光明正大等佢

等咗陣大約四點一左右，



就見到佢喺遠處行過嚟

我:「咁快嘅

諗住你重未嚟我就走人喇 」

其實講笑啫，

點會唔等佢丫



唔好玩啦，

芊靈:「我好講口齒嘅

話咗嚟點會唔嚟呢

壹仔 」

點解佢會知我叫咩名嘅



呢個時候一定係扮唔知，

詐傻先係上策

我:「你講咩呀

邊q個係壹仔 」

芊靈:「有人唔認喎 」

我:「究竟你講緊邊個呀 」

芊靈:「xx壹(我全名)

唔好扮野喇 」



我:「冇人識佢喎 」

芊靈:「咁你都唔識呀

好鍾意問人地無聊iq題嗰個喎 」

我:「你講錯喇 」

芊靈:「講錯咩 」

我:「算啦冇野喇 」

芊靈:「古古怪怪咁



上車啦 」

其實我未試過問第二個一啲咁無聊嘅iq題

不過佢一直都唔知，

重以為我好鍾意用啲咁嘅屎橋去識女仔

當然最後我都冇澄清

就等佢一直都誤會，

反正我講咗出嚟佢都唔會信

倒不如慳返啖氣，



繼續諗埋啲無聊嘅iq題，

有邊個男仔，

會唔想引起自己女神嘅注意先得架，

根本冇一個會例外

最理想嘅就梗係好似陳冠希金城武咁樣

乜都唔使做就咁行出嚟，

已經吸引到其他人，



當然我係有自知之明

從來都知道自己係咩料子，

就算點樣ff都唔會諗到咁誇張，

咁既然我唔可以用個樣嚟吸引自己女神，

咁咪唯有扮小丑囉

喺佢面前做一個笑匠，

努力做好自己想扮演嘅角色，

咁就已經夠。



上到車之後

我:「話說點解你會知我個名架 」

芊靈:「咁你又點解知 」

我係唔可以同佢講真相出嚟，

如果唔係佢一定會以為我係痴漢

衰啲都要架喇

求其講個大話算數

我:「嗰次我喺學校見到你

跟住問我個friend你係邊個

跟住佢就講左 」

芊靈:「做乜見到我唔打招呼呀 」

我:「我最憎就係打招呼

調返轉我都唔鍾意有人同我打招呼

打擾我平靜嘅生活

你同我打招呼，

老實講我就唔想應你

但係唔應你又好似我唔啱

應又唔係唔應你又唔係，

實在係太煩擾 」

芊靈:「原來咁架

咁下次見到你唔叫你嚕

點頭得喇掛 」

我:「靚女點同呀

一定應你啦 」

芊靈:「做乜把口無啦啦咁好 」

我:「講事實啫 」

芊靈:「我先唔信你丫 」

其實我真係講真，

不過佢好似唔信咁樣

咁算啦，

費事繼續糾纏喺啲咁無謂嘅事上面

芊靈:「不過點解你無啦啦過嚟呢度讀嘅

我都覺得奇怪幾年入面都未見過你，

原來你係轉校生 」

我:「咁你都知呀 」

芊靈:「總之我有方法啦哈哈

秘密唔講你知

不過有冇講中先 」

我:「我話唔係轉校生你信唔信 」

芊靈:「唔信 」

我:「咪就係囉

講你又唔信，

唔信你又問 」

芊靈:「問兩句都咁串嘴

唔講就算啦 」

我:「唉其實冇乜特別野啫

屋企人話搬屋咁咪搬囉 」

芊靈:「同原本嗰班朋友分開咗慣咩 」

我:「有得唔慣咩

如果我搬咗過嚟，

都重喺原本嗰間中學度讀書，

我起碼五六點就要醒

夏天都算你知冬天架啦

早起身真係好鬼辛苦

日日都咁早咪即係攞我命啫，

二揀一我一定係揀轉校 」

芊靈:「嘻嘻係呀

喺度讀咗幾個禮拜適唔適應到呀 」

我:「ok啦間間中學都係差唔多啫 」

芊靈:「乜係咩真係唔知喎 」

我:「有啲唔同嘅

呢度啲女同學靚啲囉 」

芊靈:「係真唔係呀

你條友返學淨係掛住睇女仔 」

我:「有邊個男仔返學係唔睇女仔

你搵出嚟我同佢當面對質

一係佢就扮野，

一係佢就基佬 」

芊靈:「個個好似你咁咩 」

我:「你要知道每個人都鍾意欣賞啲靚野 」

芊靈:「包裝得幾好喎 」

我:「梗係要包裝啦

唔講住喇我落車，

拜拜 」

芊靈:「你重未開估你嗰條iq題呀 」

我:「俾多幾日你慢慢諗啦 」

芊靈:「又好啫

拜拜 」

經歷過今日之後，

我諗以後我都要提早出門口

希望我唔止可以同芊靈放學，

重可以一齊搭巴士返學

早起身就早起身啦，

值唔值得

起碼之後嗰幾年，

我都重係每日維持早啲出門口呢個習慣，

有啲野唔使講出嚟，

用行動話俾你聽已經夠。