[真人真事][校園][純愛]《兩個我加一個妳》: 第十三章

當然啦，

第二朝我係撞唔到佢嘅

明明我已經喺返嗰日嘅時間出門

諗下諗下突然靈機一觸

又或者我真係好無聊啦



我決定每一日都喺唔同時間出門

睇下邊一班車先係中正目標

因為我大約知道我嗰班車班次與班次之間係隔幾耐

其實原本我想行過去佢上車嗰個站嘅，

但係諗諗下又好似真係太明顯



太過出面我唔認為係一件好事

戇鳩啲就戇鳩啲啦，

最衰嗰陣係冇巴士app

變相就時間嗰度係好麻煩，

唉



鬼叫自己得閒得濟冇野做咩

有時有啲野明知冇結果都照做架啦

理性嚟講其實我知道有好多變數，

例如芊靈都可能日日唔同時間出門

咁呢啲野冇得走啦，

或者真係唔試唔心息，

試過，唔得嘅話，

都起碼知道個結果



蠢就一定係蠢架喇，

不過有啲野真係中學先至會做

他日重邊度會有咁嘅時間去揮霍，

特別係我依家做咗上班族(亦即係港奴)

先明白空餘時間嘅珍貴，

因為確實係唔多

我唔係想扮老屎忽，



而係有啲野真係經歷過就會知

所以要揮霍嘅話一定係喺讀書時期嗰陣做

有本錢唔用唔通要等到冇本錢先用呀

講返件事先啦，

結果喺嗰一兩個月，

我係完全掌握唔到佢返學嗰班次

因為真係好似我頭先所講，

日日都唔同



所以之後我就決定寧早莫遲

咁都好彩唔係完全食白果

叫做有返啲安慰啦。

話說跟住落嚟我收到嗰啲風係關於芊靈

講起上嚟Cyrus條友仔做到野

Cyrus:「我之前係咪同你講過芊靈中三拍過拖嘅 」

我:「係呀做乜 」



Cyrus:「我知佢地點解散

近排問咗人知道內幕 」

我:「頂嗰條友係咪作故仔 」

Cyrus:「唔知呀，

之前佢同我講嗰啲野事後證明就堅嘅

來源應該可信 」

我:「講嚟聽下好過冇嘅 」

Cyrus:「佢話芊靈係同一個叫做呀偉嘅人拍拖 」

我:「邊撚個叫做呀偉 」

Cyrus:「打籃球嗰個呢

幾高大架 」

我:「未見過

完全唔識 」

Cyrus:「陣間帶你睇下啦 」

我:「好

睇下係咩何方神聖，

咁跟住呢 」

Cyrus:「我來源話佢偷食點知俾芊靈知道咗

之後芊靈俾咗一次機會，

點知呢個呀偉又再偷食

跟住芊靈就斬欖 」

我:「呢個呀偉應該係傻撚咗

有芊靈都重喺度偷食 」

Cyrus:「跟住芊靈就冇再拍過拖

中間都有唔少男仔追佢，

同級又有師兄都有，

好似話連呀偉都想翻撻

不過聽聞食晒檸檬 」

我:「唔知詳細係點呢

最衰我同佢唔係好熟冇得問佢，

問完佢又唔知點，

一陣佢以為我八卦咪死 」

Cyrus:「係呀好奇心係會害死人

聽我個來源咁講佢好似依家想單身喎

定係餘情未了呢

所以唔敢開始新戀情，

你今次高難度呀壹仔 」

我:「冇呀，

聽完你咁講，

我都係諗住見步行步就算 」

Cyrus:「咁難得你依家同佢有計傾

去馬啦屎忽鬼 」

我:「話去就去咩

玩show hand都要睇形勢先去啦 」

的而且確呢單秘聞如果係真嘅話

芊靈依家唔接受其他男仔，

一係佢暫時唔想再拍拖，

一係就真係重鍾意緊嗰個乜撚野呀偉

所以唔敢同其他人向前行一步，

真係有啲棘手