之後運動會就冇乜特別

我同芊靈走嗰陣都各自搵自己嘅朋友,

既然係咁就無謂嘥口水講喇

跟住放新年假

老實講十幾日冇得見芊靈梗係覺得唔爽啦



不過又邊有辦法啫

因為我真係冇佢聯絡

sms,msn都冇,

不過依家諗返起,

嗰陣嘅自己真係有啲痴線架



有時冇野做嗰陣,

會特登行去芊靈住嗰度

睇下可唔可以搏懵

因為其實我住嗰度同佢住嗰度其實唔係差好遠路

首先我可以搭巴士去啦,



你見我同佢返嚟係同一架巴士就知

但如果行過去都唔係好遠嘅啫,

都係三四個字到

既然係咁咪行過去撞下彩囉,

多數都係去佢屋苑個商場

嗰啲大型超級市場呀,食肆呀等等,

當然我都好明白自己真係冇乜中獎運

事實上今次都係,



全部都係得個桔

唔緊要啦,

都唔係第一次搏懵失敗

從以前我成日喺巴士上面見唔到佢,

我已經接受咗呢個咁殘酷嘅現實

有啲野,

幾努力,用心去做都係冇用,



唔係話你想咁樣就咁樣

特別係人與人之間嘅相遇更加係充滿變數,

當然嗰陣我重未留意到,

又或者唔想去承認一點

其實我同佢,

根本就冇緣。



新年假就放完喇



終於可以同芊靈再見

對於毒撚嚟講,

呢樣絕對係返學嘅果實

返咗成日其實就係等放學嘅呢一刻

話說我地逢禮拜二禮拜四咪要喺學校玩嗰個學會嘅

咁樣玩完之後就一齊搭車返屋企啦,

基本上呢兩日都係會咁



一齊走一齊返屋企

嗰日亦都唔例外,

上到車之後

芊靈:「死人頭今個禮拜得唔得閒呀

我:「冇名你叫

芊靈:「唔應就算啦

當然最後我都係好唔爭氣咁樣應咗

毒撚係咁架啦,

見到女神問你得唔得閒,

個心都飛咗去第二度啦

重點會有志氣去同佢鬥頸呢

我:「得呀做乜春

芊靈:「我諗住帶呀bi,

即係我隻狗呀

去散步,

你嚟唔嚟

我:「你地諗住去邊架

一陣間有呢度散到去柴灣就唔好預我

芊靈:「你有冇搞錯呀

邊有人會散咁遠步

真係吹水怪

我:「但我見你又喺度笑喎

芊靈竟然迅速變面

所以話女人真係五時花六時變

芊靈:「冇呀

我:「又真係幾好野喎咁快變到

芊靈:「唔好玩住先喇

去唔去呀

我:「你地去邊架

芊靈:「多數都係去公園啫

我:「唔辛苦

芊靈:「咁樣都辛苦你唔去踢波喇

我:「都好喎預埋我啦咁就

其實頭先嗰啲都係藉口嚟啫

佢約到我點會推佢呀,

我講咁多廢話都係想同佢傾多啲計啫

有邊個毒撚唔會咁樣做

芊靈:「咁呀

你有冇sms呀

我:「有呀

芊靈:「人囝

我:「你蠱惑呀你

為咗想同我sms就抄我

芊靈:「先生你會唔會諗多咗

我:「即係咁我都知同我傾計好過癮

不過你都唔使做到咁樣丫

芊靈:「話說你唔識路嘅話我可以帶你去睇醫生

妄想症呀

我:「人少少認咗佢

芊靈:「不如咁丫,

其實係咪你抄我所以先同我同台

人少少認咗佢

我:「我話係你信唔信

芊靈:「講真定講假

講真嗰句我唔信

我:「即係講假嗰句你信

芊靈:「係呀

我:「咁係啦哈哈

芊靈:「原來真係

我:「我覺得上天嘅安排對於我同你實在係太有緣

既然係咁就不如交換埋msn

芊靈:「我有話你知我有咩

我:「中學生冇msn你玩我呀

芊靈:「醒咗啵

我:「比埋我啦

我喺屋企其實用msn多啲

芊靈:「好你瞇埋眼先

我:「點解

芊靈:「費事俾你偷睇

我:「超你寫低我返屋企都睇到架啦

芊靈:「瞇啦瞇啦

我:「好喇

麻鬼煩

跟住我就俾本手冊佢寫

因為嗰陣我冇紙,

就叫佢寫低喺最尾嗰頁

我見重未落車咁咪同佢癲下

芊靈:「寫咗喇

我:「頂你寫咁耐架

芊靈:「唔覺呀

你就嚟落車喇

我:「係喎走先返到去搵你

芊靈:「你未拎遮呀

我:「係喎係喎今次真係唔該

芊靈:「話咗你冇帶腦出街

又唔記得

我:「今次唔窒你

拜拜

芊靈:「拜拜