落完車之後,

原本想即刻拎本手冊出嚟睇

但係你知一路行一路拎住啲野嚟睇幾論盡架

加上我重有一把遮喺身

咁就算啦反正都唔急



喺屋企先慢慢睇

一返到去開電腦就見到Cyrus搵我

Cyrus:「今晚應該打唔到機要出去

依家打返幾鋪先啦

我:「好



其實我同佢咁多年都係咁

夜晚都係會打機

喺嗰個年代就梗係玩online game啦,

有經歷過,

就一定明online game有幾大衝擊



絕對唔係依家死氣沉沉

至於依家我同佢都係咁

夜晚一直都冇變過

都係一齊打機,

我地份工又唔使ot嘅

除非有時真係有野做啦

如果唔係就真係開定部ps4等佢

咁多年都係咁



又講得太遠返返嚟先

咁樣當打到七點幾

佢出去食飯,

咁我都同佢收線,

自己亦都要食飯

食完之後先發覺一樣野

梗係即刻拎本手冊出嚟啦



揭去最尾嗰頁,

準備加芊靈嘅

點知一望嗰陣先發現

原來佢條友仔撚化我

喺最尾嗰頁寫低

「死人頭,慢慢估啦。」

簡直係離晒譜

我真係好想知點樣估



依家唔係淨係number

包埋英文架大佬

唔係講笑霍金都估唔到

呢個時候我梗係sms芊靈

問佢究竟喺度玩乜鬼先。

以前玩sms嗰陣,

心態真係同依家whatsapp唔同



嗰陣係冇在線時間,

亦都唔會顯示佢睇到未

當你send咗個訊息之後,

唔係講笑其實個心真係不其然會緊張

究竟佢睇咗未呢

究竟我咁樣打好唔好呢

究竟我應該邊個時間搵佢好呢

你會諗好多問題,

最好笑其實平時你係唔會諗呢啲因素

係唔知點解對住某一個人,

所做嘅野就變得綁手綁腳

不過咁,

當你收到佢個sms嗰陣,

就將頭先嘅疑慮一掃而空

跟住重不停咁樣自high

細個就係咁傻

講返當時先

我梗係即刻sms問佢,

究竟msn係乜

芊靈:「搞錯呀夜晚搵人地都唔講晚安

我:「早唞得唔得

芊靈:「咁我依家瞓覺嚕

我:「咪住先呀

日瞓夜瞓就會變豬

芊靈:「你唔好瞓覺呀

如果唔係你都會變埋

我:「我變有咩所謂

你唔同呀,

到時冇咗個靚樣

知唔知係我地全級男仔嘅損失

芊靈:「把口咁乖係咪想問msn

我:「幾時都話你芊靈姐姐話頭醒尾

一啲都冇講錯

芊靈:「諗下先啦

我:「你晏晝寫咁耐就係寫呢幾個字

有冇搞錯呀

芊靈:「不如你俾一個理由我

我覺得ok嘅就俾你好唔好

我:「因為我靚仔

芊靈:「有自信係好事

不過過咗籠就唔係,

你放心我唔會周圍同人講

我:「因為我有型

芊靈:「證明你冇聽我講野啦頭先

都話有自信係好事不過唔好過籠,

你放心我都係唔會周圍同人講

我:「因為你冇野做

搵我傾計解悶就啱晒

芊靈:「其實夜晚我可以做好多野

聽歌睇戲甚至溫書

唔一定要同你傾呀哈哈

我:「咁呀

我覺得我同你相識並唔係偶然,

所以我地一定要拉近距離增進感情

唔可以浪費呢一份咁奇妙嘅緣分

芊靈:「係咪諗咗好耐

我:「唔係喎,

根本唔使諗

一望住你個電話,

自自然然諗起你個名你個樣,

咁我就知道我要點樣講

芊靈:「太誇張喇師傅

我:「係咪好似情聖先

芊靈:「你真係冇聽我講野

有自信係好事不過唔好過籠

我:「我覺得好似喎

芊靈:「咁你同第二個講啦

講完之後話返俾我知嗰個女仔嘅反應

我:「咁你就錯喇

對住其他女仔講唔出,

因為根本就冇靈魂

芊靈:「口花花

我:「係咪暗爽呢

芊靈:「唔好意思真係唔係

我:「你都唔坦白嘅

芊靈:「你啲幻想力太豐富

唔用嚟作故仔嘥晒

我:「咁樣啲理由你滿唔滿意先

芊靈:「死人頭你自己睇你學校本手冊啦

一早寫咗俾你喇

我:「最尾嗰頁見唔到喎

芊靈:「邊個叫你淨係睇最尾嗰頁

我都好攰喇我瞓覺先

跟住我就起勢咁樣喺度睇學校本手冊,

都真係未試過咁認真去睇呢本野

睇下睇下去到第65頁

終於見到佢個電郵地址

「死人頭返到去add我啦

[email protected]。」

跟住我就即刻喺msn加佢做聯絡人

加完之後好快佢就喺msn覆返我,

芊靈:「終於搵到喇

我:「你真係騎呢

點會喺中間到寫架

點樣搵呀

芊靈:「唔知呢唔知呢

我:「早唞啦你

芊靈:「早唞喇拜拜

好耐好耐我先察覺到,

佢寫喺第65頁絕對唔係偶然

要怪只可以怪當初嘅我。