[真人真事][校園][純愛]《兩個我加一個妳》: 第二十三章

老實講

拎到芊靈啲聯絡方法梗係爽啦

我諗各位巴打都明白，

唔需要好詳細去形容

總言之你會將佢擺喺個腦入面



重要擺好耐，

無論他日你兩個發展好唔好，

甚至從來都冇發展過都好，

點樣再冇意義，

都重會記得某個人嘅電話號碼同埋其他聯絡方法



自己覺得每個人心入面都有個咁嘅人

返返嚟先

咁我拎完佢sms同埋msn之後，

我絕對冇好似嗰啲狗公咁樣

成日喺度搵佢



你知啲狗公架啦

失驚無神就無啦啦煩人地

講嗰啲話題真係好尷尬

我覺得呀，

想拉近距離都唔使用啲咁嘅方法啫

特別係冇野講但係又想R水吹

講嗰啲話題真係唔係人講

「你點呀 」



「出面好大雨喎。」

「今日好猛太陽呀有冇帶遮呀 」

淨係諗都打冷震

都唔使講出口

咁就知嗰個程度啦

咁樣喺禮拜六之前嗰一晚

佢就喺msn搵我



因為之前已經講夜晚嘅話就用電腦搵我啦

除非我msn冇on啫

芊靈:「聽日晏晝三點半 」

我:「好

但係喺邊度等 」

芊靈:「你知我住邊度架啦 」

唔通我同佢講，

我曾經好無聊咁樣去過佢屋苑樓下撞佢咩



所以我點都話唔知著數啲

我:「唔知 」

芊靈:「xxx呀

你去到嗰度呢會有個商場嘅

商場樓下有一間七仔，

七仔門口等 」

我:「好



使唔使幫你隻狗買野食 」

芊靈:「唔好呀

依家我都驚佢太肥

都已經唔敢俾太多零食佢 」

我:「即係我咩都唔使帶就可以 」

芊靈:「你放心，

我會幫你帶埋報紙同埋一樽水

俾你去廁所 」

我:「幽默咗喎芊靈姐 」

芊靈:「都係跟你啫 」

我:「你隻狗鍾唔鍾意生保人架 」

芊靈:「佢見人都會玩

佢點都會行埋嚟搵你同你玩

亦都唔會興奮到咬人

所以唔使驚 」

我:「咁好啦聽日見啦 」

芊靈:「咁好啦拜拜 」

我:「等陣先 」

芊靈:「做咩呀 」

我:「我屋企重有一條狗繩

聽日使唔使帶埋出嚟

易啲拖住你 」

芊靈:「唔使啦留返俾你自己帶住啦 」

我:「用手拖住得唔得 」

芊靈:「死人頭你真係好鬼煩

唔得呀 」

我:「咁好啦真係拜拜喇 」

芊靈:「早唞 」

我重記得嗰晚臨瞓前喺張床度好鬼興奮

估唔到聽日禮拜六都可以見到芊靈

當然毒撚梗係唔會將自己最真實嘅感情表露無遺啦

所以我諗聽日都要盡量抑制

跟住第二朝好快就醒咗，

好彩嗰陣重係二月

唔算好熱，

咁就唔使驚陣間出汗搞到臭晒

你知呢啲野好緊要架啦

或者喺佢心目中，

我自己個形象根本就對佢冇影響

佢唔會上心，

但係自己都重係會好無聊咁樣做好佢

跟住三點鐘我就出門口，

慢慢行去佢嗰個屋苑個商場

一路行重一路諗，

唔知佢會點著呢

由於我預鬆咗時間嘅關係

所以我去到嗰陣佢都重未到

跟住我就開始喺七仔門口徘徊，

講開又講我咁多年都係咁樣，

永遠等人嗰陣，

我都係鍾意行嚟行去

唔鍾意企定定喺度

正當我喺度徘徊嘅時候，

我就聽到後面有把聲叫我

芊靈:「咁快到咗嘅 」