[真人真事][校園][純愛]《兩個我加一個妳》: 第四十五章

之後就係放暑假嘅日子

不過咁樣，

由於會考得返唔夠一年

所以其實都係冇得抖

我諗好多個都係喺度操卷



操完之後就對

唔識一係就問人

一係就上網查，

不過十一年前嘅互聯網，

始終都唔係今時今日咁發達



所以其實都唔係話真係好方便

我自己就多數就對答案啫

芊靈佢係文科幫我唔到

中文英文又唔知有咩好問

所以就好少同佢傾學術上嘅話題



最多咪問下Cyrus

唔識就齊齊唔識架喇

咁當然啦，

學術上接觸唔到芊靈啫

唔代表冇其他方法

就係陪佢同埋呀bi散步

一個禮拜見兩次到啦

呀bi個死仔見親我都好熱情



有時坐低一抱佢上嚟就即刻反 ，

手手腳腳任我地舞

好鬼過癮

芊靈:「唔講以為你先係佢主人 」

我:「唔係呀我見佢係人都衝埋去嘅 」

芊靈:「梗係唔係啦

有次有個親戚上嚟我屋企，



佢話佢自己係驚狗

所以上到嚟就冇行過去搵呀bi

呀bi嗰次又好搞笑喎

個親戚上到嚟，

又真係冇行過去搵佢 」

我:「啲人成日話狗有靈性

可能真係 」

芊靈:「真係冇諗住養返隻 」



我:「唔囉

可能真係我冇用

對於生死個經驗重幼嫩

唔想再經歷多一次隻狗唔喺度嘅情況 」

芊靈:「我都知

我反而最驚呀bi第時老咗嗰陣，

唔想見到佢多病痛咁辛苦



到時我就好矛盾

因為唔想佢走而盡量延續佢生命，

但係佢自己又會好辛苦喎

可能走咗係一種解脫，

不過我又會唔捨得 」

我:「信我啦

諗咁多係冇用

因為到時真係發生嗰陣你個腦邊度會諗到咁多野 」

芊靈:「又係嘅 」

我:「都重未講養一隻狗幾多野要麻煩

玩人地嗰隻就易

冇時間真係唔好養 」

芊靈:「估唔到 」

我:「估唔到咩呀 」

芊靈:「冇

我話估唔到原來你咁有愛心 」

我:「痴線咩叫估唔到 」

芊靈:「望落去唔似掛哈哈 」

我:「大佬邊有得睇架呢啲

唔好話你想砌我生豬肉 」

芊靈:「你當係啦哈哈 」

其實以前呢啲日子真係好開心

陪自己鍾意嘅女仔同埋一隻狗輕鬆散步，

嗰種無憂無慮真係好正。

跟住落嚟我唔知發咩癲

突然間諗到一樣野玩

完全冇契機

真係失驚無神諗出嚟

或者係我覺得成功嘅話會好好玩，

一定好刺激

以前就係咁無聊

調返轉講丫，

有幾多個中學生唔無聊先得

睇下玩咩嘅啫

咁究竟係咩呢

就係我無啦啦鳩吹，

話我要去外國讀書

原本諗住呃晒所有朋友嘅

但係諗諗下我地班嗰啲唔呃得喎，

點樣講都係同一班

一陣老師話冇喎冇聽過壹仔唔喺度讀喎，

咁我真係含撚都唔掂

各位應該知我想呃邊個啦

唔同班又要熟嘅，

都係得一個啫

其實真係冇乜原因要咁樣玩

純粹覺得過癮

睇下佢咩反應都好

當然喺發生之前一早同Cyrus傾掂數啦

大家有默契唔使教點樣做啦

當然佢都有問我點解要咁樣玩

我都係好似上面咁樣答返佢，

咁佢都話好呀玩啦

有時真心朋友就係咁，

明知冇意義都會陪你去做

咁樣喺八月嘅某一日

我同芊靈照舊帶呀bi去散步，

突然之間我就講

我:「係喇，

遲啲唔係成日可以同你一齊帶呀bi去散步 」

芊靈:「做咩呀 」

我:「我要去外國 」

芊靈:「幾時返

重有一個月開學咋喎 」

我:「我去外國讀書

讀完就返 」

跟住芊靈就跌咗支水，

重停咗一停。