[真人真事][校園][純愛]《兩個我加一個妳》: 第四十六章

之後我梗係幫佢執返

我:「嗱 」

芊靈:「你講真架 」

呢個時候我當然要扮認真

如果咁快俾人揭穿就唔好玩



我:「嗯 」

芊靈:「點解無啦啦咁嘅 」

我:「屋企人講好咗

同埋嗰邊有我呀姨喺度，

又唔係真係窮到冇錢洗咪扔我過去幾年 」



芊靈:「一定要去 」

我:「屋企人話事

邊有得揀 」

芊靈:「咁又係嘅

你過到去會唔會掛住睇鬼妹唔讀書架 」



我:「傻嘅

喺香港對住你我都照讀書啦

對住吸引力低一班嘅鬼妹

點會被迷惑 」

芊靈:「服咗你呀

去到依家重講笑 」

我:「不嬲都係講真

係你唔信咋嘛 」



芊靈:「如果今次都係講大話就 」

其實嗰陣我係聽唔到最尾佢講咩

因為最尾佢係特別細聲

我:「做咩呀 」

芊靈:「冇呀

呀bi，

變態哥哥遲啲唔可以成日同你一齊散步喇 」



我:「點解我係變態哥哥 」

芊靈:「你係囉哈哈 」

我:「呀bi千祈唔好聽你主人講

小弟正直不阿 」

芊靈:「去到唔好掛住溝鬼妹呀

香港重有好多同學架 」

我:「有邊個會理我呢條蛋散丫

分分鐘Cyrus都唔得閒應酬我 」



芊靈:「點會呀你又吹水啦 」

我:「講堅

咁耐冇見梗係會生疏啦

就好似依家我已經冇搵返以前班朋友咁樣 」

芊靈:「過到去唔準咁呀 」

我:「點解 」

芊靈:「er



你捨得香港嗰班同學咩

我:「唔捨得都冇計 」

芊靈:「依家資訊咁發達

msn咪得囉

同埋你買個鏡頭返嚟重可以視像通話 」

我:「係咪想見到我個靚仔樣呢 」

芊靈:「冇人想呀

不過

買一個返嚟都唔拘嘅

當係俾呀bi見你囉 」

我:「佢想見定係你想見呀 」

芊靈:「佢呀

我都只係陪佢咋

你知啦狗仔點會識開msn 」

我:「你真係好唔老實 」

芊靈:「幾時走 」

我:「月尾囉 」

芊靈:「幾個禮拜咋喎 」

我:「係呀

原本話想遲啲先走嘅，

但係最後決定不如早啲過去啦 」

芊靈:「都係嘅，

早走定係遲走，

一樣都係離開。」

我:「聖誕節返嚟見 」

芊靈:「我要聖誕禮物 」

我:「到時先講啦 」

芊靈:「講定啫 」

可能你地覺得佢講到好出面啦

但係嗰陣我地成日都咁樣玩

所以一啲都唔覺得佢係對我有野。

之後嗰幾個禮拜，

佢真係成日搵我出去

拖狗散步有，打羽毛球有

有一次出去買野都有

芊靈:「到時我要嚟送機 」

我心諗

你嚟送機咪拆穿晒

唔得唔得點可以俾呢件事發生

我:「唔好喇嗰晚我應該係凌晨機

好辛苦 」

芊靈:「點解唔安排其他班次呀

朝早機我都嚟丫 」

我:「痴線又唔係以後冇得見 」

芊靈:「亂講野

好好笑咩 」

我:「你放心

就算死都會返嚟

放心半夜一定唔會嚇你 」

芊靈:「唔好講呢啲野啦 」

我:「好啦好啦 」

芊靈:「咁

你要小心喇 」

我:「上機前sms你

過到去又msn你

咁樣夠安全啦 」

芊靈:「講過至好呀 」

我:「好啦真係拜拜

聖誕再見 」

芊靈:「拜拜 」

結果我扮上機嗰日，

真係凌晨三四點send sms俾佢

點知佢竟然秒覆

我:「上機喇

過到去搞掂好晒搵你 」

芊靈:「嗯

一路順風 」

我:「竟然重未瞓 」

芊靈:「煲劇煲耐咗哈哈 」

我:「係咪特登同我講一路順風先唔瞓覺呀 」

芊靈:「你鍾意點樣諗我阻止唔到你嘅 」

我:「唔講啦真係就快上機

拜拜 」

芊靈:「拜拜 」