[真人真事][校園][純愛]《兩個我加一個妳》: 第六十八章

第二日就係聖誕節正日啦

八點零九點就已經醒咗

喺呢度有時間等我又講幾句廢話

唔知點解我呢條友硬係瞓唔得耐

即使依家都係，



禮拜六日放假嗰陣，

都係八點零就彈起身

總係唔可以瞓到黃朝百晏

老實講有時我都幾羨慕有啲人可以咁樣

禮拜六日就瞓到日上三竿



但係返工嗰陣就可以控制到七點幾醒

返返嚟先，

當日我醒咗

自不然就開電腦啦

唔講咁多梗係晨光第一炮



後生仔精力旺盛丫嘛，

做完正經野就梗係上網啦

我以前部電腦呢，

就撳咗自動登入msn嘅

即係一開機就會自動登入，

好彩msn冇顯示出嚟我睇緊乜野

如果唔係真係含得撚

跟住上上下網上見到有人震我



我講得出嚟大家都應該知邊個啦

芊靈:「咁早醒咗嘅 」

我:「你唔係 」

芊靈:「啱啱先起身囉 」

我:「我都係啱啱先起身 」

芊靈:「女仔直覺話我聽你唔係 」

我:「屌你講晒啦 」



芊靈:「咁係咪啫

唔好講大話 」

我:「係呀芊靈姐

你真係好撚醒呀 」

芊靈:「講咗架啦

今日你去邊呀 」

我:「你唔係話今日要同佢地出去咩 」

芊靈:「係呀



其實你想唔想嚟 」

我:「咁多人唔好預我 」

芊靈:「好啦你話點就點啦

咁你今日去邊呀 」

我:「傻嘅

梗係喺屋企打機 」

芊靈:「聖誕節又係打機



真唔真呀 」

我:「晏晝溫一陣書囉 」

芊靈:「好勤力喎 」

我:「梗係啦屌 」

其實我真係唔係吹水

我真係諗住今日溫書

個零兩個鐘好過冇啦

事關咁多年小弟其實唔係好抗拒溫書，

雖然成績唔標青，

咁都只係因為我蠢啫

但係要講成拎起本書嚟溫，

其實都唔係話一件好難嘅事

芊靈:「咁今晚再搵你丫 」

我:「搵我做咩 」

芊靈:「冇野係咪唔搵得你 」

我:「梗係得啦

你喎 」

芊靈:「唔好掛住打機唔聽電話呀 」

我心諗你又幾心水清

咁都俾你發現到

晏晝溫完一陣書就開始打機啦

打打打打到呀媽叫食飯

食完飯再廝殺

我同Cyrus兩個都唔係打到凌晨三四點嗰啲人嚟

基本上去到十一十二點就收皮

特別我尋晚夜瞓今朝又早起身

都開始有啲疲態

咁就決定聽日再打過

冇幾耐芊靈佢真係打過嚟

條友真係幾講口齒

芊靈:「咁快聽嘅 」

我:「心靈相通囉 」

芊靈:「冇人同你心靈相通呀死人頭 」

我:「知道你打過嚟即刻唔打機

你望下我地幾夾 」

芊靈:「唔夾囉好冇 」

我:「你打過嚟做咩呀 」

芊靈:「原來港島呢邊啲燈重靚呀 」

我:「去咗邊撚度 」

芊靈:「頭先去sogo行咗一陣

行完之後就去咗金紫荊 」

我:「唉自己一個去

又唔帶我出去得我一個喺屋企毒 」

芊靈:「叫咗你囉好冇

你自己唔出咋嘛 」

我:「重要打過嚟曬命 」

芊靈:「想同你講下啫

你條友真係太黑心 」

我:「走未呀 」

芊靈:「差唔多喇一陣會去返灣仔嗰邊搭車 」

我:「你老友冇節目咩 」

芊靈:「你講邊個 」

我:「有拖拍嗰啲 」

芊靈:「冇呀全部都話各自返屋企 」

我:「聖誕節竟然夜晚唔開工 」

芊靈:「你條友啲思想真係好污穢

個個好似你咁咩淨係諗埋啲咁嘅野 」

我:「頂你我一個字都冇講出嚟

咁你都知 」

芊靈:「識咗你幾耐呀咁都唔知你想講乜 」

有句說話我冇喺佢面前講，

其實講真嗰句佢真係好撚了解我

有時有啲野講得冇咁白佢都知我講乜

如果係一個男仔，

我覺得咁樣唔係好難，

你知啦，

大家男仔傾啲乜野都心中有數

但對於佢係一個女仔嚟講，

有時做咩諗咩都瞞唔到佢

唔知點解真係好出奇

我:「至叻係你啦 」

因為成班都係住同一區

所以就一齊搭車，

只不過唔係一齊落車咁解

原本我話想落車接佢

不過佢話太夜唔好

都唔知係咪隔離有仔喺度哈哈

芊靈:「咁夜危險呀

同埋你知你幾無聊成日喺度玩

唔想好似尋晚咁提心吊膽 」

我:「你驚呀

緊張呀

擔心呀 」

芊靈:「咩呀……唔係囉

總之咁夜危險唔好出嚟啦

同埋我今日唔係好肚餓唔想食糖水哈哈 」

我:「你再食糖水就變波 」

芊靈:「你要為頭先嗰句付出代價

你隻耳仔準備受罪啦 」

我知佢條友真係講得出做得到

即刻扮死狗

我:「唔好呀對唔住我錯喇 」

芊靈:「冇用呀 」

我:「芊靈女神你內外在美兼備

唔好同我呢啲蛋散計較啦

以後小弟會謹慎發言 」

芊靈:「咁呀

諗下先囉 」

我:「真係對唔住呀我唔會再亂講野呀 」

芊靈:「上車喇死人頭

遲啲再講啦拜拜 」

我:「拜拜 」