[真人真事][校園][純愛]《兩個我加一個妳》: 第六十七章

我地喺尾站落

我:「起身喇 」

結果冇反應

好死唔死俾我見到佢喺度笑左一下

咁就知佢係扮蟹啦



一於又同佢玩下先

我:「起身喇

芊靈豬 」

嗰句「芊靈豬」我重特登chok晒聲咁樣講

跟住佢即刻彈起身啦



芊靈:「你叫到好核突呀 」

我:「夠你核突

扮晒蟹瞓覺

點知嘴角含春

喺度偷笑 」



佢俾人踢爆咗重唔面紅咩

呢個時候架車去到最後一個交通燈位，

重可以坐多陣先

見佢依家咁嘅樣重唔搣佢面珠登呢

我:「面紅喎小姐 」

芊靈:「死人頭你真係好煩呀

好煩好煩好煩 」

發覺佢有時真係好鍾意連講三次



每次都係冇多冇少

啱啱好三次

我:「唔好擰歪面呀拎過嚟丫 」

跟住佢隻手唔知喺幾時拎咗出嚟

跟住我隻耳仔就遭殃

芊靈:「死人頭

你梗係扭得少 」



我:「放手呀放手呀

芊靈豬 」

芊靈:「重叫 」

我:「係喇係喇唔叫唔叫 」

芊靈:「咁就乖仔 」

跟住我地就落車

芊靈:「死人頭

不如去食啲野好唔好 」



我:「你唔眼瞓咩

成點喇喎 」

芊靈:「頭先搭車恰咗一恰

唔知點解唔眼瞓哈哈 」

我:「你想食咩先 」

芊靈:「附近有間糖水開到好夜

去唔去食 」



我:「屌

假民主

睇死你都係想去啦扮 」

芊靈:「你真係好醒嘅啫 」

行多兩三個字就到佢嗰間糖水

佢話不如叫一個兩份食好唔好

因為唔想臨瞓前食得太飽

驚一陣瞓唔著

咁啱我正有此意

因為我都驚瞓唔著

所以就應承咗佢

之後我地就叫咗一碗野喇，

其實我記得碗野係咩

但係因為碗野個名係間舖個名

所以唔講出嚟費事自爆啦哈哈

總之嗰碗野有幾種生果有涼粉重有少少西米

落單嗰陣，

咁就芊靈負責叫啦

原本都冇乜特別

點知聽到最後一句，

佢無啦啦講:「多奶丫唔該 」

跟住當落單嗰條友走咗

我就梗係問佢啦

我:「識食喎

知道要多奶 」

芊靈:「唔係喎 」

我:「下 」

芊靈:「咁我知有人乜都鍾意多奶丫嘛

咖啡係咁奶茶又係咁 」

跟住佢拎個膊頭撞一撞我

芊靈:「係咪先 」

可能你地唔明呀

又或者甚至芊靈佢都唔明，

其實嗰刻真係幾開心

先別論佢係咪芊靈，

雖然嗰個人只係記得你飲食習慣

一樣咁微不足道嘅野

但起碼真係有用心

肯浪費位置去記低一啲唔關佢事嘅野，

對於當時咁單純(又或者係戇鳩)嘅我嚟講，

真係覺得幾窩心

之後食嗰陣佢話想玩啲野

嗰陣我地坐兩人枱，

唔算迫隔籬又冇人

就話不如喺度講數字

講到三嘅倍數就拍手

玩完一舖之後就講四嘅倍數

如此類推咁樣加上去

輸咗就餵對方食野

咁我樂意同佢玩囉，

贏就可以餵佢

輸就可以俾佢餵

又點算係一個懲罰呢

最後邊個贏邊個輸多啲我就唔記得咗

淨係記得啲畫面，

芊靈:「擘大口 」

我:「餵得幾好喎 」

芊靈:「我成日餵呀bi

駕輕就熟 」

我:「主人我要摸摸 」

芊靈:「呀bi唔會咁囉好冇 」

我:「你肯拖我手我做狗都冇問題 」

芊靈:「痴線 」

下一鋪

芊靈:「我要哈密瓜 」

我:「擘大口 」

芊靈:「唔錯喎

啲位就得幾靚

講，

係咪成日餵女仔 」

我:「唔好笑我毒撚啦 」

芊靈:「唔信 」

我:「我成日喺屋企餵我呀媽食野

就係為咗今日可以餵你

養兵千日用在一時 」

芊靈:「咁都得嘅咩 」

我:「咩唔得呀 」

玩下玩下終於食完

原本諗住我俾錢嘅，

點講都係一碗野啫

貴得去邊

點知佢話係佢想食所以佢俾

跟住就一支箭衝咗去收銀嗰度

埋完單就送佢返屋企啦

始終嗰陣都點幾兩點，

唔送佢就講唔通啦

去到佢門口嗰陣，

芊靈:「死人頭壹仔 」

我:「做咩呀 」

芊靈:「今日玩得好開心

多謝你 」

我諗每個男仔最期待就係聽呢啲野

每次同完自己心儀嘅女仔去街，

事後最想就係聽到佢話開心，滿足

有時有啲野就係咁盲目，

明知有可能只係客套說話，

但係自己已經唔理咁多

覺得佢咁講就一定係咁，

諗嘅野全部都係正面主觀

忽然間會冇晒理智，

我都唔例外

我:「唔好咁講

應份嘅應份嘅 」

芊靈:「返到去記住sms我

一定要一定要一定要

千祈要記住記得 」

我:「講到咁誇張

係喇得喇知道喇

滿意未 」

芊靈:「咁就差唔多

咁我都走喇拜拜 」

我:「拜拜 」

當過咗三四分鐘嗰陣，

無啦啦電話響

一見到原來係芊靈

我:「做咩呀有野未攞咩 」

芊靈:「乜淨係有野攞先至可以打俾你咩 」

我:「唔係唔係

你打俾我簡直係無上嘅光榮 」

芊靈:「哈哈驚你一個人返屋企驚呀

睇下我幾好人 」

我:「痴線我使驚呢啲野 」

芊靈:「真唔真呀一個人咁夜行返去唔驚咩 」

我:「未驚過喎 」

突然之間我又諗到野玩

我:「哎呀 」

跟住特登喺度唔出聲

我聽到芊靈係咁話

「做咩呀做咩呀。」

我扮晒野話:「唔好打呀 」

芊靈:「下

做咩事呀 」

過咗幾秒我終於同佢講返電話，

我:「返嚟 」

芊靈:「你啱啱做咩呀

咩事呀 」

我:「冇

有人見到我同一個咁靚嘅女仔出完街

唔抵得咪打我囉

不過冇事嚕 」

芊靈:「死人頭好好玩咩

知唔知頭先好驚呀

以為你唔知有咩事呀 」

我:「傻嘅我一個打十個

驚咩 」

芊靈:「我幾驚因為送我返屋企陪我食野搞到有事呀

死人頭好好玩咩呢啲野 」

我:「因為你太靚引人犯罪咋 」

芊靈:「無聊鬼

收線喇 」

跟住佢真係收線

好似玩大咗添

條友真係唔玩得

當然我都係死死氣sms返佢啦

我:「唔好嬲啦 」

芊靈:「唔睬你呀 」

我:「我都係想俾你關心啫係咪先

俾女神關心喎

幾多人恨都恨唔到 」

芊靈:「冇人關心你喎 」

我:「係咩

等我諗多咗添 」

芊靈:「唔睬你呀 」

我:「你依家咪應咗我囉 」

芊靈:「係喎哈哈 」

我:「警告你唔好喺度偷笑呀 」

芊靈:「痴線我冇囉 」

我:「我一定信你 」

芊靈:「就算係又點呀

唔俾偷笑咩 」

我:「你話點就點啦

你就梗係得啦係咪先 」

芊靈:「死人頭口花花你就最叻

返到去真係sms我呀

都係唔好，

開電腦msn好啲

咁就肯定返咗去 」

我:「收到娘娘 」

返到屋企當然係即刻開電腦先啦，

同佢講聲返到先沖涼

就係咁，

我同佢第一次過嘅聖誕節終於完咗

雖然過咗咁多年，

但係我望返日記嗰陣，

都重係好記得當時所發生嘅野

你見我呢個聖誕節講咁耐就知道有幾深刻啦

特別在我唔係一個記性好嘅人，

咁你諗下呢次聖誕節有幾難能可貴。