去到二月

我地班中學雞最重視當然係情人節,

今年情人節我地係放緊假

所以大家幻想學生妹著住校服喺度派朱古力

呢個場面唔會出現



講起情人節我就真係可以唔使提

話說上年雖然都係二月新年

不過就係二月下旬,

比今年更加遲

情人節嗰日就係新年假前最後一日



講起上嚟真係慘淡

囡囡送俾我嘅朱古力,

簡直係寥寥可數

就連Cyrus都多過我

最慘竟然係芊靈都冇俾我



咁我冇理由行埋去問佢點解冇架嘛

面係人地俾架係自己丟

都知咩事啦係咪先

重使乜問

我重記得上年上緊堂嗰陣

有位女仔整咗好撚多朱古力

但係派下派下都重未到派到我同Cyrus

佢個人本身唔錯幾好人



於是我兩個就夾計,

一於主動出擊唔好再等啦

喺度猜包剪揼,

猜輸嗰個就去負責引佢出去

猜贏嗰個就喺度偷朱古力,

本身我個位就坐佢斜後面

一望就望到佢啲朱古力擺喺邊度,



嗰陣佢隔離嗰個又冇返

成件事係天衣無縫

之後隨著Cyrus引咗佢出去

我就靜靜雞拎咗四粒

之後分返一半俾Cyrus

事後好彩個女同學唔覺啫

重行埋嚟俾我地兩個

嗰度又多幾粒



所以其實我上年收嗰啲朱古力,

其實有好多都係嚟自同一個人

最慘嗰個人唔係我預期嗰個人,

真係抵死

冇期望自然冇失望呢句野係真嘅。

講返今年先喇

原本我都唔係好記得情人節



你知啦毒撚點會在意呢個咁嘅節日係咪先

講出嚟都俾人笑啦屌

係正日嗰日有人sms我先知

重有邊個女仔會sms我丫

芊靈:「咁多情人

一陣有冇街出

我:「痴線幾時話過我多情人

芊靈:「口花花話你冇情人我真係唔信呀

我:「傻豬嚟嘅

你估我成日對住人口花花

咁咪冇價值

芊靈:「聽到都打冷震

我:「講

有咩目的

芊靈:「你又知我有目的嘅

我:「平時你點會呢個鐘數搵我

重唔係喺度瞓緊覺

芊靈:「唔係囉好冇

成日喺度屈人瞓覺

你唔瞓覺嘅

我:「重唔係講中咗

芊靈:「哈哈唔知呀唔知喎唔知啵

我:「低能

芊靈:「有人約你出街

制唔制

我:「邊撚個先得

芊靈:「你真係好蠢呀

蠢人蠢人蠢人

自己諗啦,

諗到打俾我

跟住我又戇鳩鳩真係喺度諗

原本重想諗住開套鹹片打下丁嘅

跟住真係唔理咁多一野打過去

我講打電話啫

我:「屌你都冇講邊撚個

芊靈:「諗咗幾個字就係講呢啲

我:「我咁靚仔大把人想約我架啵

芊靈:「唔係喎唔係好多咋喎

係得我咁傻先至會咋喎

我:「屌原來你講你自己

早講啦

芊靈:「點估到你咁蠢啫

俾晒貼士都唔得

我:「你想去邊呀

單身走去情人節出街

重唔俾人閃死

芊靈:「唔出街咁放下狗仔都得嘅啫

我:「又好

芊靈:「你依家過嚟

我:「好呀

放狗嘅途程就唔多講啦

都唔係重點

行咗成個鐘準備返去佢屋企嗰陣,

我地無啦啦講起上年情人節啲野

我:「你條撚樣又係衰嘅

成日陪你朱古力都唔整粒俾我食

芊靈:「呢度冇人係你講嗰兩隻字喎

我:「你條友又係衰嘅

成日陪你朱古力都唔整粒俾我食,

咁樣得未呀

芊靈:「你係邊個呀

點解要整俾你食呀

我:「心都噏埋嗰啲咁嘅野

芊靈:「咁你知我唔識整野食架啦

不過我會學

唔會俾你睇死

我:「話學就學到呀

你就唔會到依家都重未識啦

芊靈:「哈哈我依家冇需要煮丫嘛

講真我真係會學

其實我好想學西餐呀

我:「唔好問我因為我都唔識

講起上嚟你又真係好撚奇怪,

正常女仔鍾意嘅裁縫,煮野食,

你就冚唪唥都唔鍾意

芊靈:「唔得嘅咩

我:「梗係得啦

你喎芊靈姐喎

做乜撚都得

芊靈:「又喺度亂噏

跟住佢一野又扭我耳仔

我對住呀bi講:「睇住你主人呀

躁狂架無啦啦扭人

一陣容乜易扭埋你

芊靈:「呀bi咁可愛點會埋佢

你就唔同啦真係抵扭

去到佢樓下嗰陣

我:「走喇拜拜

芊靈:「唔好走住

我:「做咩呀

芊靈:「我上去拎啲野俾你

等我五分鐘

果然佢真係好快就落返嚟

佢拎住一袋野行過嚟

芊靈:「俾你呀拜拜

跟住佢又走咗

等佢走咗我梗係打開袋野睇下咩嚟

原來係六粒朱古力

再加多一張咭

佢都真係幾撚鐘意寫咭

依家呢個文化好似消失咗,

果然唔同年代嘅人會有唔同嘅生活文化

呢句說話雖然好廢不過係真理

返返嚟先,

打開張卡睇下佢寫乜春

「哈哈我特登唔講上年情人節,

因為真係好失敗好失敗好失敗!!!!!!

其實我唔係冇整朱古力囉,

我真係有整,

只係好唔成功結果就益晒垃圾桶……

我特登唔當面同你講呀,

咁樣你咪駁唔到我囉嘻嘻,

今年我特登秘密訓練咗一個月,

終於知道要點樣整,

上網睇晒食譜,

你知你條友,

鍾意食甜鍾意食奶,

唔可以跟上網嗰個份量,

如果唔係就唔夠甜,

你話你幾麻煩,

不過冇計啦我太好人,

咁戇居嘅野我都肯做,

你識做啦下次,

同埋我真係冇請幫手,

媽咪話想入嚟幫我,

我都嗌佢唔好,

唔計原材料真係全部都自己整,

我自己偷偷地食咗一粒,

講真唔係話好好食啦不過真係唔難食,

你要相信我,

唔準亂咁劈亂咁扔呀,

同埋真係唔好食咁你都要體諒丫,

你知我真係好少整野食,

係咪先,

我都估你話係啦,

就係咁你慢慢食啦。」

跟住食落去真係好甜

好彩本身食得甜

所以先至唔抗拒

唔錯唔錯,

佢條友啲記性真係幾好

咁都記得我鍾意食奶食甜

跟住梗係sms佢啦

我:「講堅幾好食

雖然係氹緊你

芊靈:「我望你第一句嗰陣開心咗一秒

點知你第二句已經將事實揭破

我:「兩樣野有衝突咩

我真係講堅呀

芊靈:「好得閒無聊冇野做咪整下囉

我:「咁你真係幾得閒喎

芊靈:「你鍾意食就得啦

我:「多謝

擦下鞋都要架喇

芊靈:「傻仔

永遠記得會考嗰年,

有個女仔喺好無聊,好得閒,冇野做嗰陣整咗半打長方形嘅朱古力

我雖然有寫開日記嘅習慣,

但係有幾單野唔使睇返本日記,

仍然可以記得起所有細節

過咗一年過咗五年甚至乎去到今年已經過咗十年,

都重係好記得當日所發生嘅事。