[真人真事][校園][純愛]《兩個我加一個妳》: 第七十四章

溫書嗰度冇乜特別

要知道我同佢唔係同班亦唔係同一科

而且大家都鍾意喺屋企溫書

好難講到溫書情節出嚟

所以電視劇嗰啲一男一女去自修室情節，



喺呢度係冇發生

係有時佢會搵我

叫我加油囉

即係嗰啲戇鳩打氣方式

不過見係佢就算啦



屌，

人不嬲都雙重標準架啦

你地點樣屌柒我，

我都係咁講架喇

既然係咁就不如跳去講佢生日



唔知大家重記唔記得啦

我喺度再提多次

佢係三月二號生日

其實早排我同佢有講過，

就嚟生日出唔出去慶祝

點知佢話想溫書

咁講真我都同意嘅

的而且確唔係淨返好多時間



我:「咁唔幫你慶祝架喇

唔係我唔幫你呀，

係你話唔好昨 」

芊靈:「要同我講生日快樂呀 」

我:「真係咁緊要咩

都係一句啫 」

芊靈:「對於負責講嗰個，



咪就係一句咁簡單囉

但係對於負責聽嗰個就唔係咁 」

我:「真唔真呀

啲人同唔同我講生日快樂咪又係咁

又唔會少忽肉 」

芊靈:「你自己係咁啫

可能你唔信啦，

我依家重會因為有人同我講生日快樂而好開心



真係架 」

我:「女人真係易呃

求其講一兩句就開心 」

芊靈:「你識咩呀 」

我:「講真我真係唔識 」

芊靈:「我要生日禮物呀 」

我:「你要咩先得 」



芊靈:「未諗到喎

爭住先嘻嘻 」

我:「講真丫你係有錢女

要乜撚都得

使q我呢啲人送咩 」

芊靈:「有冇搞錯呀

意義都唔同啦

傻仔 」

我:「咪又係禮物 」

芊靈:「係咪男仔女仔睇嘅野唔同呢 」

我:「可能啦 」

芊靈:「爭住先份禮物

哈哈 」

我:「頂你講到一定要送咁樣 」

芊靈:「係呀 」

我:「有拖冇欠 」

芊靈:「好

唔好諗住走我數我會記得 」

我:「我都知你好記仇 」

唔知大家以前中學雞嗰陣，

會唔會好似我呢條戇鳩仔咁樣

明明係有人生日唔關自己事，

但結果就日日喺度數住

每日任務就係記錄重差幾多日

基本上由嗰個禮拜開始已經係咁樣，

重有六日，重有三日

去到最後一日，

單位就由日變成小時

講真自己生日都唔會咁樣

呢啲咪就係皇帝唔急太監急，

有時都唔知為乜

點解要咁上心

我記得上年同佢講生日快樂嗰陣係喺學校，

嗰陣特登夾定三點零二分同佢講

最後佢都有發現添

言談間重幾開心

不過點講都好，

如果用廿四小時制，

晏晝三點零二分其實真係唔係03:02

而係15:02

咁樣就已經唔同啦

所以今天決定變招

決定凌晨同佢講(因為第二日唔使返學丫嘛哈哈)

咁就係真真正正嘅03:02

當然啦做咁多野都係只係博紅顏一笑，

甚至乎卑微到只係純粹滿足自己

唔理對方知唔知，

亦都唔會理對方洞唔洞察到，

總之就講咗先

即使最後佢冇讚你有心思都好啦，

都已經係後話

記得嗰晚打機打到十二點

溫書啫唔係唔可以打機呀話

溫咗成日淨係玩兩三個鐘唔係好過份丫

跟住Cyrus話頂唔撚順要瞓覺

於是我就要自己一個頂到去三點，

唔係講笑呀真係有啲辛苦

平時我十二點就上床啦

依家重要喺度吽多三個鐘

啲咖啡都冇用嘅

差啲喺度釣魚

我好記得去到三點搭正嗰陣

就拿拿臨去刷牙

刷完返嚟見到03:01

就即刻開msn同埋撳入佢個對話視窗

打定句「生日快樂，芊靈bb。」

一去到03:02即刻send出去

跟住梗係瞓覺啦

已經攰到七彩

第二朝都係九點醒

一起身開電腦就見到佢嘅離線訊息

芊靈:「你個傻仔又幾有心機

今次有啲記性喎

尋晚係咪好眼瞓呢哈哈

不過可唔可以唔好講芊靈bb

真係好核突

點講都好啦，

多謝 」

見到呢段野，

就已經知尋晚捱更抵夜係值得

從來冇人比我更加有資格去評論咁樣做值唔值得。