[真人真事][校園][純愛]《兩個我加一個妳》: 第八十一章

講真嘅

等緊嘅期間我真係有一刻擔心過佢會唔會唔落嚟

我唔係講衰野乜野落唔到嚟嗰啲

而係唔知佢係咪真係玩野

搞到個戇鳩鳩喺度等咗成晚



當然啦隨著兩三分鐘之後見到佢行緊過嚟

疑慮就一掃而空啦

我見佢又係拎住袋野

芊靈:「幾驚你真係以為我玩你走咗

唔等我落嚟 」



我:「不過我肯等 等一生都等 」

芊靈:「咁夜唔好咁大聲唱歌啦

一陣嘈到人俾人投訴，扔野就死 」

我:「如果以呢個角度嚟講

假使真係有人扔野



中你嘅機會率係大過我 」

芊靈:「死啦你

搵我做擋箭牌 」

我:「呢袋咩嚟架 」

芊靈:「你估下係咩嚟囉 」

我:「我估野真係好差 」

芊靈:「死人頭呢啲你又咁蠢

你覺得可以係咩嚟 」



我:「屌真係唔知 」

芊靈:「警告呀

我走咗你先好拆依家唔好拆 」

我:「好 」

芊靈:「咁好啦拜拜 」

我:「拜拜 」

芊靈:「我就準時過你嘅嘻嘻 」



我:「噏乜撚呀 」

芊靈:「睇完你就知架喇 」

跟住佢又係頭也不回咁樣走咗

跟住我一路行返屋企嗰陣就拆咗嗰個野佢

一打開原來見到有個毛毛cushion

毛毛個意思唔係嗰個公仔，

而係解質地

上面重有隻狗做圖案



好撚過癮

呢啲攬住瞓覺真係一流

事關我真係好撚鍾意用毛毛質地嘅野陪寢

唔係講笑真係好舒服

跟住再睇落去原來又有張咭

今次就唔係聖誕做背景

而係Happy Birthday



的而且確，

以前同依家最大分別係寄語嘅方法

依家好多人都係用社交平台嚟表達自己心意

事實上我都明

依賴科技某程度上睇都係時代嘅一種進步，

但係我成長嗰個年代社交平台冇依家咁發達

唔係冇電腦唔係冇社交軟件，

但係寄語個風氣重係維持緊用咭表達

雖然唔會好似依家咁樣得到咁多人祝福

但係正正物以罕為貴，

少咗人同你講生日快樂，

反而更加記得有邊個係有講

可能睇緊嘅你地覺得好無聊，

生日卡啫有乜野咁值得高興啫

依家開一開Instagram ，whatsapp甚至係冇乜人用嘅面書，

一年收到祝賀語嘅數目多過你以前幾年啦

我亦都唔係喺度曬命又或者吹奏以前點點點

我只係想講自己嘅立場，

寧願冇乜人祝賀我不過收到一張有靈魂嘅咭，

都好過大把人同我講一句冷冰冰嘅生日快樂

對我嚟講咁樣先係實在

實在嘅意思，

係幾年之後都重記得邊一年打一年

例如我唯一一次收到嘅生日咭就係2008年喇咁樣，

呢啲先係真正有血有肉

唔會撈亂邊一年打邊一年，

特別對於我呢啲記性唔好嘅人嚟講，

更加有說服力。

跟住我睇下張卡講咩

「我寫咗呢張卡好耐呀，

你唔好唔睇晒佢呀，我嬲架!!!

記得你鍾意毛毛質地嘅野，係咪好勁呢嘻嘻，

你話你介意啲人送啲唔知乜野你，

有啲野明明你自己就唔鍾意但又夾硬要收，

我堅有聽你講呀嘻嘻，

希望你會啱用啦壹仔，原諒我要出去買因為唔識自己整，

17歲生日快樂呀傻仔。」