「短篇」「小小傻瓜，大大幸福」: 家庭

美星：「喂。」
 
我：「做乜呀？」
 
美星：「你第時想自己屋企會係點？」
 
我：「嗯？啊…全屋都擺滿高達掛？最好就有好多display櫃啦。」
 
美星：「白痴，我唔係問你想自己間屋點裝修呀，我係問你第時自己個家庭會係點呀傻仔，會有幾多仔女之類呀。」
 


我：「哎麻煩女人，你問野唔可以直接D架咩？」
 
我馬上就後悔自己點解咁直接講出心底說話，因為我知道我面前呢個人一定會用恐怖手段去報復。
 
果然如我所料，呢個麻煩女人即刻使出佢係港產片學返黎既功夫黎對付我，咩「納爾遜式鎖」，「霹靂追魂鎖」全部都用哂出黎，仲一路扭一路大聲鬧我。
 
玩到咁大，當然會驚動到老母，搞到佢係廚房煮煮下飯都走出黎睇咩事，多得咁我先甩到身，執返條命仔。
 
無啦啦打哂交，老母當然會問到底發生咩事啦，條契弟居然即刻告狀，仲加鹽加醋，講到我好似十惡不赦既大罪人咁。
 


我就一於少理，因為我相信我媽既眼睛係雪亮的，所以我就乖乖地食媽媽煮既餸就算~~
 
老母聽完佢講故仔之後笑得好開心，仲附和佢話我真係衰，之後就結束話題齊齊食飯。
 
正當我以為話題已經好似我個碗咁放低左既時候，母親大人居然係夾菜既時候同時將話題夾返起都有。
 
媽：「咁講開又講，如果你到時結左婚，你會打算組織一個點既家庭？我都有興趣想知。」
 
我：「我呀…？我諗…」
 


當我想正正經經答老母既問題個下，美星又突然插把口埋黎。
 
美星：「問佢有鬼用咩媽咪，諗真D佢呢份人又邊會有人要吖哈哈。」
 
食屎狗，鬼唔望你一朝早飲咖啡嗆死。
 
媽：「又唔好咁講，我個仔咁好，一定會有人要既，唔好岔亂歌柄啦，俾細佬答左我先。」
 
媽都講到咁，美星都乖乖收聲，望住我等我答，搞到我有D緊張。
 
我：「啊…如果娶到老婆，或者會生兩個仔女既。」
 
媽：「哦？咁咪同我地屋企一樣？想要仔定女？」
 
我：「咁呢D野輪唔到我決定既，不過問我的話我會想第一個係女，等我可以好好教佢點樣做個好家姐。」


 
點會有人估到，二十年後呢段對話居然會成真。  
而家既我，結左婚已經有一段時間，時間過得真係快，快到我同佢都嚇親，原來大家已經結左婚咁耐。
 
差唔多五年，我地都未有特別打算生小朋友，仲係諗住係事業上奮鬥一番先。
 
Eh…至少佢應該係咁諗既，我就無乜所謂，努力工作太麻煩了。
 
唔？有本相簿係度既？係之前拎左出黎無放返埋去啊？
 
你問我係邊？我咪係自己屋企執緊野囉，我係個好老公黎架嘛。
 
咩話？你問我呢個鐘數唔洗返工咩？唔好意思雖然間公司規模係細D，但細佬我都可以叫做係老細之一，所以返工呢回事呢…嘻嘻。
 
我拎起本相簿，原本打算放返入櫃，但一時既心血來潮令我決定打開黎睇。


 
入面全部都係由結婚開始影既相，突然咁重溫真係幾有意思，好多當時既片段突然都重現係自己腦海入面。
 
我仲記得當時接新娘個陣搞到好大陣仗，又話拆門拆盛，好彩最後有Cherry佢出手解圍，如果唔係我諗D鄰居九成會報警。
 
啊…睇睇下有D眼訓添…
 
「喂，傻佬，做乜你呢個鐘數會係屋企架？你又唔返工呀？」
 
唔…真係訓著左呀我…呢把聲咁熟既…
 
我慢慢擘大眼，想話睇下邊個叫我，不過其實我都知道係邊個黎架啦。
 
只係想睇下佢個樣啫。
 


一擘大眼，就見到佢個靚樣。
 
我老婆，Cherry。