美星搬左黎我地度住已經有三日,條友既惡習同以前仍然一樣。

所有野都要我執手尾,唉果然同我之前諗既一樣,真係好麻煩。

朝朝都要我煮多份早餐,洗多份餐具,仲要我叫醒埋佢。

話時話…

我:「喂你唔洗返café架咩?日日係屋企hea咁濟。」



美星:「呢番說話竟然由你把口講出黎真係神奇,明明你自己都日日唔返工。」

好想搵位駁佢,可惜真係搵唔到。

美星見到我就笑左兩下,之後就繼續飲我沖既咖啡。

美星:「嘛,仲記得我教你沖咖啡既方法喎。」

我:「因為Cherry鐘意飲吖嘛,我成日都會沖比佢飲。」



「講開又講,點解你要送部咖啡機比我做入伙禮物?明明我都唔飲咖啡。」

美星:「低能,邊個話係送比你?我送比阿妹架。話時話,你呢幾日搞乜,成日都失哂魂咁既?」

呀,連美星都咁覺得呀?睇黎我情況真係幾嚴重下。

唔知點解,硬係覺得有事要發生咁。我真係希望係自己錯覺,就算唔係錯覺,我都希望唔好係壞事。

我:「因為你搬左黎,搞到我多左好多野要煩囉。」



美星:「哈哈,黎緊你仲多野煩吖傻仔。」

我:「你話黎緊…?」

美星:「呀呀呀!我記得啦今日我要返café一轉,你換衫同我出去啦。 」

我:「痴線既你自己有野做咪自己返去,我做乜要去? 」

美星:「屌你你留係屋企有乜做啫,出去行下好過啦死廢青。你信唔信我而家就打比老豆老母叫佢地返黎睇下你而家呢個樣似乜。」

我呢個年紀都仲叫廢青…?我都差唔多三十歲人仲拎老豆老母黎壓我…? 

我廢事同佢再嘈,直接換衫跟佢行就算。

呢個家姐咁多年都係咁霸道,真係抵佢無人要。



去café既路程中,我同美星都無乜點講野,大家都只係各自各玩電話。

就算係去到café,佢都只係叫我坐埋一邊等佢。

到頭來,我都唔知自己黎呢度做乜。

嗯?咩事個邊突然咁熱鬧咁既?有咩好睇?

出於好奇,我決定企起身,走過去睇下發生咩事。

好多人圍住係收銀處同蛋糕櫃附近,仲係咁講「唔好喊啦」之類既說話。

我拍一拍身邊既同事,問佢呢度咩事,佢話有個客人要去買D野,放低左個女係度一陣比佢地睇住,點知個客走左無耐,佢個女就開始扭計,仲喊起上黎。



咁就真係令人頭痛呢…

我慢慢走上前,最後終於比我行到去呢個妹妹既身邊,見到佢喊到對眼腫哂,真係睇見都心痛。

唔知係邊黎既勇氣,我拎出一張紙巾,踎係度幫呢位小妹妹抹走臉上既眼淚,仲問佢到底發生咩事。

可憐既小妹妹喊到講一句完整既句子都有困難,大概既意思係「我要媽媽」之類。

咁惹人憐愛既語調,真係聽到我都想喊。

我安慰佢,同佢講話佢媽媽只係去買少少野,好快就會返黎接佢。

不過呢D咁理性既說話又點會對一個咁細既小妹妹有效吖,佢仲係喊哂口咁話要去搵媽媽。

啊…咁睇黎要出絕招啦…



我轉而望向蛋糕櫃,故意放聲話D蛋糕睇落好似好好食咁,終於比我成功轉移到妹妹既注意力,佢都開始望住蛋糕櫃,甚至連喊聲都開始減弱。

我當然唔會放過呢個機會啦,即刻追住問妹妹會想食入面邊款蛋糕,佢用佢個隻可愛既手仔督左幾件蛋糕。

芒果,朱古力,士多啤梨呀…?

我:「唔…不如哥哥請你食呢幾件蛋糕,你一邊食一邊等媽媽返黎好無? 」

妹妹:「但係媽咪平時唔比我食蛋糕…話會肥…」

我:「係啊…?咁當係哥哥慶祝你生日啦,乖,跟個姐姐過去個邊坐低,我好快就會拎蛋糕過黎~ 」

妹妹似乎終於抵受唔住蛋糕既誘惑,好開心咁跟住個女同事去一邊坐低,騷動終於都可以得而平息。



而我當然都有遵守承諾,叫同事幫手拎個幾件蛋糕過去。

你問我我自己做左D乜?我當然唔只做咁少野啦。

我仲親自整左杯朱古力比呢位小妹妹架。 

啊啊無諗過氹個小妹妹都會咁攰,即刻覺得好眼訓添。

不過算啦,見到個妹妹而家開心返都算係值得既。

哈哈,見到佢飲到成嘴都係朱古力泡,真係可愛。 

就係我攰到就快訓著,太陽就快落山個陣,美星終於捨得返過黎搵我。

美星:「係幾好野喎魯路修。」

我無力咁抬起頭,望住佢問佢咁講係咩意思。

佢無即刻答我,而係笑笑口放左杯荼係我面前,之後就坐係我對面。

美星:「我係話個細路女呀,幾條友都氹唔掂佢,你一出馬就即刻搞掂。」

我:「哦…小事啫…呢D情況對小朋友都係投其所好最穩陣架。」

美星:「哈哈,睇黎你都有照顧小朋友既天份喎,第時肯定會係個好爸爸既。 」

我:「或者會啦,至少我唔會係自己仔女十一歲既時候就長期唔係佢身邊啫。」

美星:「嘩咁多年前既事你仲記住架?估唔到你份人原來咁鬼小氣。

我:「無,咁岩諗起啫,我都知道佢地係為左搵食先咁做,我無怨過佢地既。」

美星:「係就最好啦,好!見你今日咁幫得家姐手,今晚一於等我煮返餐好既俾你同阿妹食!行啦我地去買餸! 」

我:「但係café…」

美星:「哎呢D野交畀D細既去做咪得囉,黎!行啦! 」

我連野都未講得出口,荼都未能飲得上一啖就俾佢拉走左。

呢個家姐真係…

佢買就買得好開心,而我就拎得好鬼傷心。

佢買到好似準備做冬咁,問佢做乜要買咁多,佢就只係簡單講左句:

「開心囉! 」

唉,由佢啦,最多分幾日食架啫。

我幫佢拎完d餸返屋企,再坐一陣又再準備出去,準備去接Cherry收工。

臨出去之前我仲千叮萬囑美星,叫佢千萬唔好燒左我間屋。

佢既回應就只係笑笑口咁話okok,真令人擔心。

不過佢咁大個人,應該唔會有乜問題…掛? 

坐左陣巴士,我終於去到Cherry公司樓下,就係咁岩佢就係呢個時候行出大廈。

我地黎遠就見到對方,佢開心到即刻跑過黎搵我,而我都迎合佢,慢慢行過去攬住佢。 

Cherry:「點解你會黎既?你唔係成日嫌遠唔肯黎架咩? 」

我:「唔…今日一時興起想黎囉!開唔開心?意唔意外? 」

Cherry:「衰人又口花花,咁我地而家去買餸,今晚我煮飯當獎勵你好唔好? 」

我:「唔洗啦,美星見我今日湊個細路女湊得好,佢話今晚佢煮飯當補數,仲已經買左好多餸。」

Cherry:「細路女啊…? 」

Cherry一聽到我提起呢件事語氣就顯得有D失落,唔通佢以為我係俾緊咩說話佢聽?真係傻。

為左消除佢既疑慮,我決定做返D野,主動拖佢隻手帶佢走。

呢招果然有效,佢好受落,成個人挨住我咁行。 

嘛,有無小朋友呢D野邊急得黎架。 

拖住既呢雙手一直都無分開,就算上巴士都無,直至我地返到屋企門口。

未開口都聞到好香,美星係有D料喎。 

但一打開門口,我就嚇傻左。

三個人食咁多餸…?