「短篇」「小小傻瓜，大大幸福」: 麻煩
同呢個女人做左咁多年姊弟，佢打緊咩壞主意我都大概估到。
咁突然話想見我地又咁好笑容，肯定有野想我地幫佢手啦。
我好小心咁提防眼前呢個人，就算坐低左我都唔敢亂掂檯面上面既野，好怕有伏。
我唯一敢做既就係雙手抱胸坐係度啤住佢，睇佢會點出招。
不過我居然唔記得左，我身邊仲有個唔安定因素。
Cherry好開心咁同美星研究緊個餐牌…
我好細聲咁叫Cherry小心D，因住美星有咩古惑招，不過佢好似唔明我意思，只係眼甘甘咁望住我，表情相當困惑。
但坐係對面既美星呢，就明白我意思啦，佢即刻企起身，隔住張檯起勢咁又摷又抆我個頭。
美星：「你個死仔，咁耐無見，我對你同阿妹好唔得既？係都要懷疑我有咩企圖既？
」我：「唉呀得啦得啦唔好再整啦，好痛呀！
」Cherry：「係囉家姐，lulu都知錯架啦，你就放過佢啦。
」多得Cherry求情，美星先肯放手，屌真係差D頭皮都佢扯出黎，真係痴線架呢個女人。
佢都講到咁，我都唔好意思再以小人之心度君子之腹，我都開始睇下食乜好，因為我真係好撚肚餓。
其實佢都講得岩既，我好似都有半年無見佢了。
過左一陣，檯面已經擺滿了一碟又一碟既野食。
我明明只係揀左兩樣野食，點解會黎左咁多…
我反射性咁望向坐係我身邊既好老婆Cherry，發現佢都笑笑口咁望住我，仲嘻嘻左兩聲，好似係想話我知D野食係佢叫既咁。
點解佢食咁多都仲可以咁瘦架…
嘛，其實都習慣架啦，咁多年黎我地都咁過既。
佢地兩個一邊食一邊閒話家常，傾邊度D衫靚，咩化妝品好同最近有咩餐廳好食。
所有野都好似以前咁，唔同既係我地已經大個了。
時間過得真係快。
死喇自從睇過本相簿之後我成個人都好似怪怪地咁既？不停係度loop緊舊時既？
Cherry：「lulu，啊~~
」佢突然叫我，我下意識望過去佢個邊，就見到一件pizza隊左埋黎。
Cherry：「你試下呢個吖，好好食架。」
咁體貼，我又點會拒絕佢，就算已經飽飽地都照樣擘大口食左塊pizza。
又真係幾好食喎，唔錯唔錯。
Cherry：「好呀無問題吖。
」嗯？咩無問題？我係咪miss左D乜？
今次到我一臉困惑望住Cherry，想知道佢地到底講緊乜。
佢都好快get到我意思，開始解釋返比我知。
Cherry：「家姐屋企要裝修，所以想黎我地屋企暫時住一排囉。」
聽完之後我差D成杯凍檸茶噴哂出黎，屌我都估到呢條八婆一定唔會咁簡單。
我：「喂你咁大個人就自己搵地方住啦，再唔係就返自己間café訓囉，做乜要搞到我。
」美星：「我想可以日日見到我既Cherry BB吖嘛~你老婆應承左我架啦，你呢個做人老公既唔係打算要個老婆失信於人呀？
」屌你吖死八婆…
Cherry：「唔緊要啦，家姐都係住一陣啫，咪幫下佢囉，可以慳返唔少錢架。」
我：「哎…但同佢一齊住好麻煩架…痛！！
」我講完「好麻煩」三隻字都無三秒，Cherry就已經用佢既全力meet落黎我大脾，痛到我不停狂抹自己大脾。
佢眼神相當兇狠，好似想殺左我咁，而美星就係對面食花生。
我：「得得得！一D都唔麻煩！！咁ok唔ok呀女王大人？
」Cherry：「咁咪乖囉~~抵錫~
」抵錫又唔係真係錫喎，係咁易摸下我塊臉就算，頂。
之後我地就埋單走人，準備去美星屋企收拾行裝。
唉，感覺又會變得好麻煩了。