Cherry:「等我睇過~你又買左咩玩具要放入迷你倉呀? 」

佢講完就放低手上既咖啡,走埋去睇個幾個紙皮箱。

我無阻止佢,因為根本無呢個需要。

我心入面反而有D想佢睇下箱入面既係咩黎,嘻嘻。 

我故作鎮定,繼續飲我既紅茶,仲望到美星係度望住我,我即刻啤住佢啤到實一實。



我未嬲完架食屎狗,Cherry將咁大件事交託比你你都做唔好,有無搞錯? 

害我老婆白白擔驚受怕左幾日,如果佢有黑眼圏我真係唯你是問。 

Cherry:「lulu…呢D係…你平時唔係好鐘意玩呢D架咩?做乜要放係迷你倉呀?

啊啊…比佢發現左添…嘛不過我專登放係最頂比佢睇既。 

我扮到若無其事咁轉身問佢做乜,只見佢好詑異咁指住第一個紙皮箱。



我:「嗯,我打算放入迷你倉呀,有乜問題? 」

Cherry:「但我見你幾乎每星期六日都會匿係書房玩呢D噴油野架,做乜咁突然話放入迷你倉既?」

無錯,我將我平時成日玩既噴油設備連根拔起,一件不留。

我:「呃…因為D油有天拿水成份,而家你有左,我唔想比你同BB吸到呢D天拿水,所以咪放入迷你倉囉~」

我一邊從後攬住佢,一邊講呢番甜言蜜語。



Cherry:「但係…你都唔洗搬走D野咁誇張掛?呢d係你既興趣黎…」

我:「我最大既興趣咪陪住你囉,你係我身邊我咪唔洗其他興趣,而且第時bb出左世,屋企又要多D位黎放佢既雜物,倒不如我而家就執好先~ 」

「同埋呀,我收起左你大部分既高踭鞋,只係留低D左比較安全既,你知啦你而家重左,行起路上…」

我都未講完成句野,佢就已經用兩隻玉手輕輕拍左落我塊臉度。

Cherry:「你話邊個肥左呀!」

我無提過個肥字喎小姐… 

不過我都知道佢唔係真係嬲既,因為佢一秒之後就笑笑口咁行去門口,揀左對波鞋著返工。

今次我真係落左功夫去做好件事架。



人生一個重要階段,點可以求其?一定要做好萬全準備先得。

啊…雖然係好麻煩,不過…

唔知點解我好開心。

跟住就係…

我望返過去餐檯個邊既美星,佢仲係度「飲」佢個杯一早無哂既咖啡,睇緊個份掉轉左既報紙。

我:「喂,記唔記得阿爸阿媽呢排會唔會返香港?」

美星:「um…好似下星期會返黎,你想見佢地?」



我:「嗯,都要話比佢地知Cherry有左既事既。」

我開始搬起地下既紙皮箱,仲準備call貨van,但就比美星放低杯既動作所打斷。

唔知點解,我會想探頭去睇下佢做乜事。

佢放低杯之後,用返佢平日既語氣同我講野。

美星:「魯路修,你覺得你咁做好咩?」

我:「你想講咩呀?有咩就直接講啦,成日都轉彎抹角。」

美星:「唔講咁多啦,你自己參透下先有用。老豆個邊我會幫你聯絡,其他野你自己搞掂啦。」

「最後講多句,你已經唔係當年個個讀Form 5既𡃁仔,處事要成熟D啦。」



佢講完就自己行左入房,留低一堆餐具要我執。

痴線,都唔知佢想講乜。