「短篇」「小小傻瓜，大大幸福」: 傻瓜

好快就又過左一星期，今日就係見Cherry父母既日子。

呢一星期我可以話非常勤力，將屋企大部分無用既野都執好，務求盡可能騰出更多空間比即將到來既BB。

除左執野之外我都有研究關於大肚婆既飲食，希望可以整多D對Cherry身體有益既野食。

真係成世仔都未試過咁認真看待一件事，我諗美星之前講既處事要成熟D應該就係呢個意思啦。

不過…硬係覺得好似邊度唔係咁岩咁…

Cherry：「老公？你行得未？差唔多夠鐘啦。」

Cherry一句說話將我由沉思拉返出黎，就好似黑暗入面既燈塔咁。

我：「嗯，行啦。」

之後我地就揸車去搵Cherry父母飲荼，仲將呢個好消息話比佢地知。

外父外母知道呢個消息都非常開心，特別係外母，知道左之後成餐飯都笑唔停。

我當然都有參與到其中，向佢地承諾我會好好照顧Cherry之類。

雖然看似係門面說話，但每句都係出自真心，我真係想好好照顧佢。

飲完茶，送左兩位返去之後仲有好多時間剩，我就問老婆有無地方想去，佢諗左一陣之後就提議不如返學校附近行下。

起初我對佢呢個提議有少少詫異，但我都係照做。

都好既，返去睇下而家變成點。

揸車返去既路程入面，我發現周邊既街景好多都唔同左，好多以前既野已經無左。

本來我想同佢講架，但我見佢訓著左，仲要係訓得好冧個隻，所以我都唔忍心嘈醒佢。

點解佢連訓覺都可以咁靚架呢？咩構造架佢？

就算到左學校佢都係仲訓緊，我望一望隻錶，覺得時間尚早所以就由得佢訓，泊低架車係一邊。

佢訓覺，咁我做乜？除左睇住佢訓之外，我仲落左車，打量緊周圍既環境。

呢度感覺仲係同以前一樣。

以前日日係度同Jason，師父佢地係度鳩下鳩下既日子好似係尋日既事咁，時間過得真係快。

係喎，講開又好似好耐無搵佢地食飯，過兩日約下先。

我唔覺意望左去學校旁邊既斜路，頓時笑左出聲。

呢條斜路真係可以話改變左我呢個傻仔既一生啊。

如果我當日淆底無去公園，而家既我會係點呢？

Cherry：「嗯…lulu？」

咦睇黎佢終於訓醒啦喎，我仲諗住再過十分鐘佢仲唔醒我就送佢去醫院添。

我：「醒嗱睡公主？」

Cherry：「做乜唔叫醒我喎…」

佢一邊講一邊落車，仲伸左一個大懶腰。

我：「見你訓得咁冧，我地又唔係趕時間咪唔叫醒你囉~」

Cherry：「唔~~好啦我地行啦咁！」

佢講完就跑過黎捉住我，帶我去學校既方向前進。

起初我以為佢係想帶我去公園，重溫一次昔日既場景啦，點知又唔係喎，佢居然帶住我入去學校。

雖然我幾次叫佢唔好，但佢好似完全聽唔到咁，係都要入去。

今日星期六，而家又成三點幾四點，學校仲有無人架…

Cherry：「唔該~~我地係舊生，想返黎探下老師架。」

佢敲敲看更亭既玻璃，等人地開門比我地。

起初我見無人應，以為連校工都收左工啦，點知居然突然有個校工走出黎開門比我地喎，仲要好鬼死好笑容。

星期六返工返到而家都未有得收工，真係辛苦你喇…

向呢位校工致謝過之後，我地兩個就開始慢慢行入校舍。

奇怪啦…今日應該唔洗返學先係，但點解咁多人聲既…？

唔係日光日白咁猛呀…？

「魯路修..？」

邊個叫我！！！

一聽到有人叫我個名我即刻搵下係邊度傳黎，咁大反應當然會驚動我身邊位美人啦，佢用手指篤一篤我，指俾我睇係邊個叫我。

我一望過去，發現原來係以前既班主任Miss張。

見到班主任，我即刻變到死狗咁，係咁打招呼。

一瞬間，我好似變返當年Form 4咁，一個天真任性重度中二既男仔。

Miss張確認到係我之後就開始慢慢叉住腰行埋黎，個樣仲好似想鬧人咁。

喂大佬，我地咁多年無見，你唔係一見面就要鬧我呀？仲要係我老婆面前？？俾下面好喎大佬！

Miss張：「真係你呀魯路修？你都好耐無返黎學校探我地啦喎，又會揀星期六返黎既？

」

我：「哈哈…啱啱同太太食完飯，佢話想返黎行下咪過黎囉，係呢…點解星期六學校都仲咁嘈既…？

」

我恭恭敬敬咁答Miss張，同時亦釋出心入面既疑慮，想睇下自己係咪真係撞鬼。

Miss張：「哦~~係呀D學生係度準備緊遲D校慶，所以係會熱鬧D，係呢你岩岩話你太太…呢位我記得好似係…

」

Miss張將目光放左係Cherry，而Cherry亦好得體咁自我介紹左一次。

Miss張：「哦哦！我記得啦，哈哈哈哈時間過得真係快，幾年無見你地又變左咁多，出到街我真係唔認得你地，係呢你地而家做咩架？

」

我：「我就係做廣告公司，佢就係寫專欄。」

Miss張：「哦！叻仔叻女喎，等我帶你地參觀下而家學校？」

Miss盛意拳拳，身為學生既我又點可以推卻呢，反正都想上去行下，有個導遊就更好啦係咪先。

就係咁，我同Cherry就接受左Miss張既邀請，三個人遊覽學校。

點講好呢，話佢無變又得，話佢變左好多又得，學校真係好神奇。

好多外觀都已經改變，但一眼望落去總感覺同以前一樣，好似自己仲係度讀書咁。

經過一條走廊都可以諗起自己以前做左幾多蠢事，仆街啦，跳窗啦，仲有排隊入禮堂。

Cherry：「喂…個個…係咪你個名黎架？」

我：「唔？哇係喎！

」

唔係佢提一提，我都唔為意禮堂幅牆上面居然有自己個名。

「傑出學生魯路修」

上面仲有幾個人名，都係話傑出學生，我係排最後。

哇我居然都可以留名，真係無諗過，上次返黎都唔覺有呢D野。

Miss張：「係喎你係傑出學生，有無興趣遲D校慶返黎演講下，同D師弟師妹分享下？

」

我：「eh…聽落好似好麻…」

未講到個煩字，我隻左手已經feel到一股好強既握力。

我：「我會好好考慮下，睇下公司有無野做先。

」

Miss張：「講起你公司…你公司會唔會接拍學校校慶片？我地今次想搵D專業人士拍靚佢。」

我：「可以呀，我留低卡片俾你，你叫負責既老師聯絡我地啦，價錢方面有得傾~」

Miss張：「好~唔該你先。呀係，我記得之前執野執到張你地班既相，我而家去拎！」

佢講完就匆匆忙忙咁離開左禮堂，留低我同Cherry係禮堂。

Cherry唔知咩事望住我笑得好開心，望到我都有D尷尬。

我：「做咩呀？」

Cherry：「無，無諗過我既傻佬都可以名留青史啫，有幾分激動。」

我：「哈哈，我仲記得呢個傑出學生係你幫我拎既，你功不可沒。」

Cherry：「梗係啦，所以我其實係覺得自己好叻，簡直就係造王者呀哈哈~