「短篇」「小小傻瓜，大大幸福」: 禮物
Cherry：「老公呀…你其實有無野想問我架…？」
係一個平凡既下午茶時間，佢又突然問D咁既問題，真係心臟差D都會比佢嚇死。
好彩我訓練有素，呢d野我已經習慣哂，雖然都係打左個突，但我相信自己表情仍然相當淡定的。
我：「唔？做乜我無啦啦有野想問你呀？」
Cherry：「上星期你咪陪我一齊去做檢查既~~你唔想知道醫生講咩咩？」
我就估到你係想我問呢樣架野，你估我唔想問咩，我當然想知啦，但我又怕問既話會比到壓力你…唉…
我：「見到你睇完之後咁開心，我就知道一定無咩壞消息，咪唔問囉~」
正當我講完準備繼續食我既公司三文治之際，佢卻突然一手搶走份三文治。
我抬起頭，打算睇下咩事，發現佢竟然嬲爆爆咁。
Cherry：「你都唔關心我同BB既，都唔問下我地點。
」哇…罪名真係任你定架喎，日日當你英女王咁服侍你都可以話我唔關心你地既…
唉，為人老公真係甚艱難呀…
我捉住佢對手，夾硬係佢手上食左份三文治，搞到佢係度哇哇叫。
呢度我地屋企黎架，你嗌破喉嚨都無人救到你架啦。
到我食完再抹埋嘴，佢都仲係鼓埋泡腮望住我。
係啦我知啦，要氹返你吖嘛老婆大人。
我：「我怕問你既話會無形中比嬮力你吖嘛，我日日都咁俾心機照顧你，又點會唔關心你呢？」
Cherry：「最起碼都問下醫生講左D乜吖~我仲以為你會問係仔定女，結果你咩都無問…」
我：「嘛…其實仔定女都唔重要啦係咪先..？」
我講完之後察覺到佢既表情有明顯既變化，唔再感到有不滿既氣息。
佢好似對我岩岩講既野好有興趣，係差左對眼無發光啫。
見到佢咁既反應我就知道自己應該乘勝追撃啦。
我：「仔定女其實都唔重要啦，仔定女都係我地既BB，我都會一樣咁錫既。」
佢聽到之後即刻有返笑容，仲用手搣我塊臉，態度變得快過人地慣性飄移。
我唔知大家以前有無玩過PS2既「連合VS扎多 II PLUS」，入面有個game mode就係你做一件事就會影響到你同其他角色之間既關係。
我而家感覺就係真人玩緊隻game咁，Fuck me。
Cherry：「果然係我既好老公~同我既諗法完全一樣~~」
「其實我都無問到底係仔定女啊，諗住到時生既時候先揭盅。」
what???
Cherry：「我覺得呢個BB係天俾我地兩個既禮物，總無可能係拆禮物之前就用X光照下入面係咩黎咁衰既。」
嘩…好玄..佢係幾時開始信教架？
不過，其實佢講既野我大部分都認同。
我：「咁…」
正當我想講野既時候，旁邊既電話突然響起。
我：「喂？邊位？」
晨：「喂！係唔係屋企呀？」
晨哥？做乜會突然打黎既…？
我：「啊..係呀做..」
都未講得出個「乜」字，佢就已經cut左我線。
Cherry：「咩事呀？邊個打黎？」
我：「無，晨哥啫，神神化化咁都唔知搞乜。」
我地亦無將呢件事放係心上，繼續一齊煲劇。
但過左五分鐘，竟然有人㩒鐘。
本著好奇心既我打算開左木門，想話睇下係邊個啦。
點知打開門之後見到既居然就係晨哥仲有阿欣，佢地身後仲有幾箱野。
晨：「唷，朋友我黎左啦~
」What the fuck…?
突如其來既到訪令我一時間唔識點俾反應好，成個人呆左咁企係度，隔住度鐵閘望住佢地兩個。
我個腦而家高速運轉，思考緊到底發生緊咩事。
五分鐘前打黎問我係咪屋企…就係為左上黎，話時話佢點解會知道呢度既？我記得搬左新屋之後我無話比中學同學知架…
唉不過對方係佢既話都唔需要認真諗理由啦，反正最後答案都只會係「因為佢係藍洛晨」。
晨：「喂喂望夠未呀，肯開門俾我地入黎未呀？」
啊屌係喎，都唔記得左開門比佢地添，真係失禮死人。
我意識到自己失禮之後即刻向佢地道歉，之後即刻開門帶佢地入屋，晨哥笑笑口咁拖住阿欣入黎，仲輕輕力拍左我心口一下，講左聲唔該。
見到來訪者係晨哥同阿欣，Cherry一時間都顯得有D慌張，急忙企起身埋黎迎接佢地。
阿欣見到咁都即刻走埋去扶Cherry，話大住肚唔洗咁好客啦，佢地會唔好意思。
Cherry聽到之後都話咁就恭敬不如從命，唔招呼佢地，叫佢地當自己屋企就可以。
兩個女既就係咁一邊笑談天地，一邊行返去梳化，由得我地兩個男既繼續係門口。
嘛…佢地都入左黎，都係閂門先啦，我諗門口個幾箱野應該係隔離屋架啦？
晨：「啊等等先，仲要搬埋出面個幾箱野先，魯路修你過黎幫下我手啦。」
呀呀呀，個幾箱野果然係佢帶黎架，又要我搬，麻鬼煩…
不過晨哥係無法違抗的，即使佢而家已經唔再係我同學都好，呢個定律都係不變的。
唔順佢意的話都唔知會唔會發癲，話唔埋會放火燒左我間屋架真係，呢D風險真係搏唔過。
兩個男人搬三箱野，兩三下就搬完啦，但到底入面係咩黎呢，到而家我都唔知道。
晨：「好奇入面係咩黎呀？」
廢話喔，搬三箱野黎人地屋企，之後問人地想唔想知入面係咩黎，師兄你都幾搞笑。
晨：「不過話時話…你呢度真係裝修得幾好喎，好靚下，自己設計定搵人設計架？」
講講下個幾箱野居然跳左去講屋企裝修，話題跳脫得咁快都有既。
講起裝修就開正Cherry個範啦真係，呢間屋既裝修可以話係佢嘔心瀝血既傑作，每一個角落都係佢親自設計，佢要求嚴到同D裝修師父嘈左好幾次，最後唔係我係中間調停既話我諗真係可能要打官司。
要求高出黎既結果就係我地有一個完美既屋企，日日返到黎都好舒服，值得既。
一如我所料，Cherry好熱情咁向晨哥同阿欣介紹我地既屋企，好似人地係黎買我地層樓咁。
係繞場一周之後，大家既注意力終於都返返黎個幾個箱度，真係謝天謝地。
晨：「啊唔記得左講添，呢D係我同阿欣既小小心意，揀左好耐架啦，希望你地鐘意啦。」
我：「我…可唔可以打開黎睇下？」
晨：「當然可以啦，呢D係比你地既禮物，你地梗係可以開黎睇啦。」
事不宜遲，我即刻係大家面前拆開呢幾個箱。
BB車仲有BB床..？