我同Cherry知道左晨哥帶黎既係禮物係BB車同床之後都慌起上黎。

我地無諗過佢地會送D咁有份量既禮物,呢D野都唔係平架,唔可以隨便就收。

我:「喂晨哥呢個唔收得,要俾返錢你先可以。」

晨:「嗯?點解唔收得呀?應該岩你地用先係架?阿欣仲話你地一定未買,叫我快D買比你地。」

Cherry:「係就係未買…但係無理由BB床呢D野要你地送俾我地既…」



我:「係囉,我地做父母,呢d野應該自己買返先係。」

晨:「有咩唔得啫,唔通你而家要我拎返走咩,我同阿欣短期內都唔會用到呢d野喎。」

欣:「係囉,我地短期內都唔會生小朋友架~」

我:「咁就等我俾返錢你,當係你幫我地買啦好唔好?」

晨哥聽到之後同阿欣交換眼神,商量我既提議,唔洗一分鐘就有左決定。



晨:「可以呀,咁你俾二萬三我啦。」

二…二萬三???呢兩樣野要二萬三??認真呢??

可能因為個價錢太嚇人,我控制唔到自己既表情,驚訝之情比晨哥睇到哂,睇到佢笑到卡卡聲。

晨:「無呃你架真係呢個價,兩樣都係靚野黎架。」

唉屌,說話都講左出口,無理由而家先黎縮沙既,係就係肉赤D,唯有俾啦。



我:「你等我一陣呀…我入書房拎支票簿先…」

正當我打算動身入書房既時候,晨哥伸手攔住我既去路。

晨:「得啦,當我放住係你地度,借住俾你地用先啦。」

「到第時我同阿欣有左細路個陣,我再問你地拎返啦。」

晨哥…

欣:「係個日之前,你地要幫我地好好保管呀~」

嘩呢個下台階真係搭得靚,靚過羅浮宮!仲要大家都用得著呢下妙!

Cherry係呢個時候都企左出黎,走埋我身邊講左句「我地一定會好好保管」去幫手結束呢個回台。



令大家尷尬既事終於告人段落,我地四個都開始係度談天說地,不過今次既主題唔再係中學既野,而係懷孕既野。

阿欣似乎對懷孕非常有興趣同好奇,佢坐係Cherry旁邊不停打聽有關懷孕既事,例如會有乜感覺,身體會有咩變化之類。

佢仲伸隻耳去聽BB既狀態,似乎真係好想做媽媽咁。

故此,我望左去晨哥度,只見佢望住阿欣,好似十分感慨咁。

晨哥會有咁既反應非常少見,甚至可以話係稀有過抽蛋出六星。

或者佢地都有佢地自己既故事,自己既難處,每個人都有既,我地呢d外人就唔好過問太多啦。

如果人地想講既話就自然會講架啦。



人地咁好心專登帶左咁厚禮上黎探我地,我當然應該要一盡地主之誼啦。

所以我又打算施展技能表上寥寥可數既技能之一,煮飯。

萬幸既係佢地無拒絕我既邀請,晨哥仲主動同我一齊去買餸,你話神奇唔神奇。

於是,我煮出一餐六人份量既晚餐去招待我既好朋友。

點解要煮咁多?一來Cherry呢排好好胃口啦,二來係留俾美星的,條友最鐘意一開飯就出現。

果然如我所料,美星出現係晚餐,不過唔阻大家享受晚餐,大家都食得好開心。

晨哥同阿欣驚訝點解我煮野咁勁,原本我都沾沾自喜,無諗過Cherry仲開心過我,同阿欣佢地講話我D廚藝係佢訓練出黎,美星都講埋一份,話自己都有份教我。

係既,佢地係有教過我既,一兩味餸囉。



食完飯之後美星即席揮亳,話整甜品俾大家食,阿欣同Cherry都加入埋一份一齊整。

我呢,就搬晨哥送黎既禮物入書房安置好,以免有人唔小心撞到啦。

就係我即刻安頓好一切既時候,晨哥走左入黎搵我。

晨:「要做人爸爸啦喎魯路修,感覺如何。」

呀呀,果然係呢個問題。

我:「想知道答案既話,自己去同阿欣生返個咪會知道囉。」

一聽到我咁講,佢dup低左頭,嘆左一口氣。



呢一口氣,聞唔到有咩味道但就feel到十分沉重。

晨:「我知道佢好想做媽媽,可惜既係我而家身上太多制肘,根本無辦法保證到我既小朋友可以係一個快樂無憂既環境下成長,所以我一直都同佢講話未係時候生。」

「見到佢對芷晴有左既反應之後,我真係覺得好內疚,我最愛既人想要既野我居然俾唔到,我點解會咁無力。」

果然,每個人都有自己既故事。

快樂無憂既環境…我俾唔俾到我既仔女呢?

但我都未開始諗呢個問題,另一個問題就已經搶先登場。

一埸惡夢。