「短篇」「小小傻瓜，大大幸福」: 惡夢

惡夢最可怕既地方係咩？係佢無比真實，令你分唔到你到底係發緊夢定係真係發生緊。

更令人驚既係惡夢入面發生既事有時偏偏就係你係現實入面最怕發生既事，佢完完全全咁重現左一次俾你睇，你話幾咁恐怖。

最近呢幾年都好小發惡夢，無諗過一黎就整單大野，真係嚇死我，嚇到成個背脊都濕哂。

好彩嚇醒個陣無嘈到佢啫…

我輕手輕腳咁離開佢身邊，自己一個行出廳斟杯水冷靜下。

而家腦入面全部都係頭先個夢既畫面，個天都唔知係咪想玩死我，明知我最怕呢樣野，偏偏就係咁比我睇。

係夢入面，我同佢都係一間手術室入面，入面一地都係血，仲有一堆全部都係血既紗布。

呢D場景本身已經夠恐怖，而令件事更加恐怖既係佢痛苦既叫聲，聽到令人好心痛。

我個心好似被千刀萬割一樣，但我係夢入面居然咩都做唔到，我係打算衝埋去捉住佢隻手，想同佢一齊捱過，但有一堆醫生護士攔住我唔俾我過去，最後仲要拉左我出手術室。

夢既最後我仲聽到佢用一把虛弱無力既聲綫叫我個名，但手術室既大門已經隔開左我地兩個。

夢就係呢度結束，結局係乜我都唔知。

我不停同自己講只係夢黎架啫，唔洗太在意，現實未必…唔係，現實一定唔會係咁既。

我一定係睇得太多電視劇先會夢到呢d情節，現實邊會有呢d野。

佢咁健康，一定會係順產既。

諷刺既係，我對自己講咁多安撫既說話，但我既心卻比頭先更亂，雙手更係震個不停。

啊…真係麻煩喇今次…點算好呢…今晚一定訓唔著啦…

極力去淡忘，卻愈來愈深刻，真係玩死人，明明已經飲緊冰水，但個身仍然出緊汗，仲愈來愈多。

唉都係再沖多次涼吧喇，成身痴立立感覺好唔舒服。

就係咁，我又去左沖一次涼。

就算係沖涼期間，上天都無放過我，佢繼續瘋狂replay堆畫面比我，令我痛苦不堪。

我甚至開始懷念其實呢個係上天比我既啟示，要我做好心理準備咁。

死啦…我係咪開始接受左呢個夢會變成現實？唔可以架…

美星：「喂，做乜咁夜又專登走出黎沖多次涼？

」

就係沖完涼打開廁所門既時候，美星就出現係我眼前。

美星：「喂…你無野呀，臉色咁差既？邊度唔舒服？

」

似乎就算係不解人意既佢，都睇得出我有唔妥，即刻捉住我問我咩事。

唔知係咪因為意識到自己終於有宣洩既渠道，我居然直接喊左出黎，眼淚ba ba聲咁流。

我：「家姐…

」

我從來無諗過，自己會因為一個惡夢而崩潰。

我地行左去梳化坐低，之後就將一切一切都同美星講哂，佢今次既反應都以往既都唔同。

佢無好似平時咁一邊聽一邊嘲諷我，而係好認真咁聽，就好似一個同你做專訪既記者咁。

到我終於將成個夢境描述哂出黎，佢都無乜大反應，而係深深咁嘆左一口氣，之後就上前攬實我，仲用手輕撫我後腦。

美星：「傻仔黎既…夢黎咋嘛，咁驚做咩啫。」

我：「但係個夢真係好真實…而且…」

美星：「無事既…信家姐講啦，阿妺佢咁健康，之前d檢查全部都話佢同BB都正正常常，加上你又照顧得佢咁好，邊會有事啫。」

我：「唔係呢…」

美星：「唔會有事架魯路修，夢始終都只係夢，唔係真，你要分清楚。」

我當然知道呢d野，但我而家就係擔心緊之後會變成咁…

美星：「陀仔個個都未驚呢d野，你呢個做人爸爸既就自己先驚起上黎，咁點得呀？」

「阿妹就快生，壓力應該一日比一日大，甚至可能會發你岩岩講個類夢，呢個時候你就係佢最大既精神支柱，你明唔明我想表達咩？」

大概明白啦…意思係如果我而家唔擺脫呢個惡夢，第時Cherry需要我既話我不旦幫唔到手，反而會令到Cherry更擔心，更脆弱。

嗯…點解我意識唔到呢個道理架…淨係掛住自己唔開心…點解無考慮到Cherry…

我擦去臉上既眼淚，離開美星既懷抱並抬起頭。

出奇既係，係同美星講完之後，惡夢既片段就無再出現係我腦入面。

係因為我搵人宣洩左？定係有其他原因？

我唔知，亦唔想去搵原因。唔再出現就好，邊個得閒理佢點解無左啫係咪先。

美星：「睇你個樣應該無野啦？咁就好喇。」

我：「嗯，唔該你呀家姐…咁夜仲捉住你逼你聽咁多無謂野…真係麻煩到你啦…」

美星：「唔會唔會~聽細佬既心事係家姐應該做既野黎既~~邊會麻煩呢，我好開心你肯同我分享心事添。話說我諗我都差唔多搬走啦，都打擾左你地半年有多，我屋企終於都叫搞掂。」

我：「唔係，可以既話我想你留係度多一陣，可以的話留多兩三個月就最好。」

美星：「嗯？點解呀？阿妹佢都就生囉，我都應該係時候功成身退先係，廢事阻住你地一家三口。」

我：「正因為咁，我先需要你留低幫我手照顧佢，我一個男人未必識咁多女人野，我怕到時佢生完我無辦法照顧得佢妥妥當當…